ރަޝިޔާގެ ރިޔާސީ އިންތިޚާބު: ފަސޭހަކަމާ އެކު އިތުރު ދައުރަކަށް ޕޫޓިން

ރަޝިއާގެ ރައީސް ވްލާޑިމިއަރ ޕޫޓިން ހަ އަހަރުގެ ރިޔާސީ އިތުރު ދައުރަކަށް ފަސޭހަކަމާ އެކު ހޮވިވަޑައިގެންފިއެވެ.

އާދީއްތަ ދުވަހު ބޭއްވި އިންތިޚާބުގައި ރައީސް ޕޫޓިން ވަނީ ވޯޓްގެ 75 އިންސައްތަ ކާމިޔާބު ކުރައްވާފައެވެ.

ކޮމިއުނިސްޓް ޕާޓީގެ ކެނޑިޑޭޓް ޕަވެލް ގްރުޑިނިންއަށް 13 ޕަސެންޓް ލިބިވަޑައިގެންނެވިއިރު ނޭޝަނަލިސްޓް ޕާޓީގެ ވްލާޑިމިއަރ ޒިރިނޮވްސްކީއަށް ލިބިވަޑައިގެންފައި ވަނީ 6 ޕަސެންޓެވެ.

ނަތީޖާއާ އެކު ރައީސް ޕޫޓިން ވަނީ މާނޭޒްނަޔާ ސްކްއެއަރގައި ސަޕޯޓަރުންނާ ބައްދަލުކުރައްވައި ޝުކުރު އަދާކުރައްވާފައެވެ.

ރައީސް ޓްރަމްޕް ވިދާޅުވީ މިހާރު އޮތް އެއްބައިވަންތަކަން ދަމަހައްޓަން ޖެހޭ ކަމަށެވެ.

އިންތިޚާބާ ބެހޭ ކޮމިޝަނުގެ ނަތީޖާތަކަށް ބަލާއިރު ވޯޓް ލާފައި ވަނީ ވޯޓް ލުމުގެ ހައްގު ލިބިގެންވާ މީހުންގެ 59.5 އިންސައްތަ މީހުންނެވެ.

ދުނިޔޭގެ އެންމެ ބޮޑު ގައުމުގައި ބޭއްވި އިތިޚާބު އޮބްޒަރވް ކުރުމަށް 145،000 މޮނިޓަރުން މަސައްކަތް ކުރަމުންދާއިރު އޭގެ ތެރޭގައި ގައުމުން ބޭރުގެ އަދި އިދިކޮޅު ލީޑަރު އަލެކްސީ ނެވަލްނީގެ 1،500 މަންދޫބުން ހިމެނިވަޑައިގަންނަވައެވެ.

ނެވަލްނީ އަމިއްލަ ފުޅަށް ވަނީ އިންތިޚާބުގައި ވާދަ ނުކުރައްވަން ނިންމަވާފައެވެ.

އުމުރުން 65 އަހަރުގެ ޕޫޓިން ވަނީ 1999 ވަނަ އަހަރުން ފެށިގެން 2008 ވަނަ އަހަރުގެ ނިޔަލަށް ރަޝިއާގެ ރައީސްކަން ކުރެއްވުމަށް ފަހު އެ އަހަރުން ފެށިގެން 2012 ވަނަ އަހަރުގެ ނިޔަލަށް އެ ގައުމުގެ ބޮޑު ވަޒީރުކަން ވެސް ކުރައްވާފައެވެ. އަދި އެ މަގާމު އަދާކުރެއްވުމަށް ފަހު އޭނާ ވަނީ އަނެއްކާ ވެސް ރައީސްކަމުގެ މަގާމު ހޯއްދަވާފައެވެ.