މަނަދޫ އަމާންވެށި ހުޅުވައި، އެތަނަށް ކުދިން ބަދަލުކޮށްފި
މަނަދޫ އަމާންވެއްޓަށް 9 ކުއްޖަކު ވަނީ ބަދަލުކޮށްފައި
މަނަދޫ އަމާންވެއްޓަށް ކުދިން ބަދަލުކުރުން
ނ. މަނަދޫގައި ގާއިމްކޮށްފައިވާ އަމާންވެށި ރަސްމީކޮށް ހުޅުވައިފިއެވެ.
ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން ބުނީ, މިމަހުގެ 24 ވަނަ ދުވަހު މަނަދޫ އަމާންވެށި ރަސްމީކޮށް ހުޅުވާފައިވާކަމަށެވެ. އެތަން ރަސްމީކޮށް ހުޅުވައި, ދައުލަތުގެ ބެލުމުގެ ދަށުން ފިޔަވަތީގައި ބަލަހައްޓަމުންދިޔަ 9 ކުއްޖަކު އަމާންވެއްޓަށް ބަދަލުކޮށްފައިވާކަމަށް ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން ބުނެފައިވެއެވެ.
ދައުލަތުގެ ބެލުމުގެ ދަށުގައި ތިބޭ ކުދިންނަކީ އިޖުތިމާއީ އަދި އާއިލީ ގުޅުމުގެ ތެރެއިން ހެދިބޮޑުވާ ކުދިންކަން ކަށަވަރުކުރުމަށްޓަކައި، ފިޔަވަތީގައި ބަލަހައްޓަމުންދާ ކުދިން އަމާންވެށިތަކަށް ބަދަލުކުރުމުގެ މަސައްކަތް ސަރުކާރުން ގެންދަނީ ކުރަމުންނެވެ.
ރާއްޖޭގެ 5 ސަރަހައްދެއްގައި ގާއިމްކޮށްފައިހުރި އަމާންވެށިތަކުން މިހާރު ޚިދުމަތް ދެމުންދެއެވެ. އެއީ ހއ، ށ، ނ، ބ، ޏ އަތޮޅުގައި ގާއިމްކޮށްފައިވާ އަމާންވެށިތަކެވެ. މ، ދ، އަދި ލ އަތޮޅުގައި ގާއިމްކޮށްފައިވާ އަމާންވެށިތައް މިއަހަރުތެރޭ ރަސްމީކޮށް ހުޅުވުމަށް ސަރުކާރުން ވަނީ ނިންމާފައެވެ.
މި ތަންތަނަށް ކުދިން ފޮނުވަމުންދާއިރު، އަމާންވެށިތަކަށް ކުދިން ބަދަލުކުރުމުން އެ ކުދިންގެ އުޅުމަށް ހެޔޮ ބަދަލުތަކެއް އައިސްފައިވާކަމަށް ޖެންޑަރ މިނިސްޓްރީން ބުނެފައިވެއެވެ. އެ ރަށްރަށުން އެކުދިން ބަލައިގަތްގޮތުން، އެކުދިންނަކީ މުޖުތަމައުން ބަލައިގެންފައިވާ ބައެއްކަމުގެ އިހުސާސް އެކުދިންނަށް ކުރެވިގެންދިޔަކަމަށް މިނިސްޓްރީން ބުނެފައިވެއެވެ.
ހަޔާތުގައި ކުރިމަތިވެފައިވާ ބައެއް ހާދިސާތަކާއި ހާލަތްތަކުގެ ސަބަބުން އެފަދަ ކުދިންގެ ނަފްސާނީ ދުޅަހެޔޮކަމަށް ޚާއްސަ ސަމާލުކަމެއް ދީގެން މަސައްކަތްތަކެއް ކުރެވެމުންދާއިރު، އެ ކުދިން މުޖުތަމައަށް ރުޖޫއަކުރުމުގައި ގޮންޖެހުންތަކެއް ހުންނާނެކަން ގަބޫލުކުރަންޖެހޭ ކަމަށާއި، މިފަދަ ގޮންޖެހުތައް ހައްލުކުރުމުގައި ދައުލަތުގެ އިދާރާތަކާއި މުއައްސަސާތަކުގެ ދައުރުގެ އިތުރުން، މުޅި މުޖުތަމައުގެ ޒިންމާތަކެއް ވާކަމަށް ޖެންޑަރ މިނިސްޓްރީން ބުނެފައިވެއެވެ.
