މާލޭގެ ގެއަކުން ވައްކަންކޮށްފައިވާ ކަމަށް ތުހުމަތުކުރެވޭ މައްސަލައިގެ ތަހުގީގަށް މީހަކު ހާޒިރުކުރަން ބޭނުންވާތީ، އެމީހާގެ ވަނަވަރު ފުލުހުން ހާމަކޮށްފިއެވެ.

އެކަމާގުޅިގެން ފުލުހުން ބުނީ، މާފަންނު ޕޮލިސް ސްޓޭޝަނުން ތަހުގީގު ކުރަމުންދާ، މާލޭގެ ގެއަކުން ވައްކަންކޮށްފައިވާކަމަށް ތުހުމަތުކުރެވޭ މައްސަލައިގެ ތަހުގީގަށް މީހަކު ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައިނުވާތީއާއި، އާއިލާއަށްވެސް އޭނާ އުޅޭ ވަކިތަނެއް އެނގިފައިނުވާތީ، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާގޮތުގެ މަތިން ތަހުގީގަށް ހާޒިރުވުމަށް އަންގައި އިއުލާނުކުރާކަމަށެވެ.

ތަހުގީގަށް ހާޒިރުވުމަށް ފުލުހުން ހާމަކޮށްފައިވާ މީހަކީ، ލ. ކުނަހަންދޫ / ބަހާރުގެ އުމުރުން 33 އަހަރުގެ ސަލީމާ އަދުނާނެވެ. މިމީހާ ހާޒިރުވާން ޖެހެނީ މެއި 31 ވަނަ ދުވަހުގެ 10:00ށް، މާފަންނު ޕޮލިސް ސްޓޭޝަނަށް ކަމަށް ފުލުހުން ބުނެއެވެ.

މިމީހާއާ ބެހޭ އެއްވެސް މައުލޫމާތެއް ލިބިފައިވާނަމަ މާފަންނު ޕޮލިސް ސްޓޭޝަންގެ ނަންބަރު 9660183ށް ގުޅައި ހިއްސާކުރުމަށް ވަނީ އެދިފައެވެ.