މެންޗެސްޓަރ ސިޓީއަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑިބްރައިނާ އިތުރު ތިން އަހަރު އެ ކުލަބުގައި މަޑުކުރަން ނިންމައިފިއެވެ.

އުމުރުން 30 އަހަރުގެ ޑިބްރައިނާ ސިޓީއާއެކު ހަދާފައިވާ އެއްބަސްވުމުގެ މުއްދަތު މިއަހަރު ހަމަވާނެއެވެ. އޭނާ ވަނީ އިތުރު ތިން އަހަރު އެ ކުލަބުގައި މަޑު ކުރުމަށް ނިންމާފައިވާކަން ހާމަކޮށްފައެވެ. އެއާއެކު އޭނާ 2025 ވަނަ އަހަރާ ހަމައަށް އެ ކުލަބުގައި މަޑުކުރާނެއެވެ.

މިކަމާ ގުޅިގެން އޭނާ ބުނީ ސިޓީއަށް ކުޅެމުން އަންނަތާ މިހާރު ހަތް އަހަަރުވެއްޖެކަމަށެވެ. އަދި ސިޓީދެކެ އޭނަ ލޯބިވާކަމާއި، ސިޓީއަކީ އޭނާގެ ޓީމު ކަމަށް އޭނާ ބުންޏެވެ. މީގެ އިތުރުން އޭނާ ބުނީ އިތުރު ތިން އަހަރު މަޑުކުރުމުގެ ހުށަހެޅުމެއް ލިބިފައިވާކަމަށެވެ. އަދި ޔަޤީނުން ވެސް އޭނާ މަޑުކުރާނެ ކަމަށް ވެސް ޑިބްރައިނާ ބުންޏެވެ.

އިތުރަށް ވާހަކަ ދައްކަމުން ޑިބްރައިނާ ބުނީ އިތުރު އެހެން ޓީމަކަށް ބަދަލުވުމުގެ ވިސްނުމެއް އޭނާގެ ނެތް ކަމަށެވެ. ސިޓީގައި މަޑުކުރާނެ ކަމާއި، ސިޓީއަކީ އޭނާގެ ޓީމުކަމަށް އޭނާ ވަނީ ތަކުރާރުކޮށް ބުނެފައެވެ.

ޑިބްރައިނާ ސިޓީއަށް ބަދަލުވީ 2015 ވަނަ އަހަރުއެވެ. އޭނާ އެ ޓީމަށް ބަދަލުވީ ވުލްވްސްބާގުގައި ހުރުމަށްފަހުއެވެ. ސިޓީއަށް ބަދަލުވި ފަހުން މިވީ ހަތް އަހަރުގެ ތެރޭގައި ޑިބްރައިނާ ވަނީ އެ ޓީމަށް 207 މެޗު ކުޅެދީފައެވެ. އަދި އޭނާ ވަނީ އެ ޓީމަށް 57 ލަނޑު ޖަހާދީފައެވެ. ޑިބްރައިނާ ވަނީ މިހާތަށް ސިޓީއާއެކު އިނގިރޭސި ޕްރިމިއާ ލީގު ހަތަރު ފަހަރު، އެފްއޭ ކަޕް އެއް އަހަރު، ކަރަބޯ ކަޕް ފަސް ފަހަރު އަދި އެފްއޭ ކޮމިއުނިޓީ ޝީލްޑް އެއް ފަހަރު ހޯދާފައިވެއެވެ. މީގެ އިތުރުން އޭނާ ވަނީ ސިޓީއާއެކު 21-2020 ވަނަ ސީޒަނުގެ ޔުއެފާ ޗެމްޕިއަންސް ލީގުގެ ރަނަރަޕް ކަން ހޯދާފައެވެ.