އިމެއް ނެތި ފަރުމަހުގެ ވަކި ބާވަތެއް ބާނާނަމަ އެ ދިރުން ހުސްވެދާނެ: ސްޓޭޓް މިނިސްޓަރު ނަސީރު
24 މެއި 2022 | އަންގާރަ 02:07ފަރުމަހުގެ މަސްވެރިކަމާ ބެހޭ ޕްލޭނެއް އެކުލަވާލުމުގެ މަސައްކަތް ފިޝަރީޒް މިނިސްޓްރީން ދަނީ ކުރަމުން
ފަރުމަސްތަކެއް
އިމެއް ނެތި ފަރުމަހުގެ ވަކި ބާވަތެއް ބާނާނަމަ އެ ދިރުން ހުސްވެދާނެކަމަށް އެންވަޔަރަންމެންޓް މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަސީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ޑރ. ނަސީރު ވިދާޅުވީ އިމެއް ނެތި މަސްވެރިކަން ފަދަ ކަންކަން ކުރަން ދޫކޮށްލާފައި އޮންނަ އޮތުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. ރާއްޖޭގައި ފުޅާދާއިރާއެއްގެ ކަނޑުމަހުގެ މަސްވެރިކަން ކުރަމުންދާއިރު ފަރުމަހުގެ މަސްވެރިކަންވެސް ފުޅާ ދާއިރާއެއްގައި މިހާރު ކުރަމުންދާކަމަށް ވިދާޅުވިއެވެ.
ފަރުމަހުގެ މަސްވެރިކަން ފުޅާ ދާއިރާއެއްގައި ކުރަމުންދާއިރު، ފަތުރުވެރިކަމާއި ގުޅުވައިގެން ވަކި ބާވަތްތަކެއްގެ ފަރުމަސް ހިފުން އިތުރުވެފައިވާކަމަށް އޭނާ ވިދާޅުވިއެވެ. އޭނާ ވިދާޅުވީ ފަރުމަހުގެ ބާވަތްތަކަކީ ފަޅެއްގެ ތެރޭގައި އެ ދިރުންތަކުގެ މުޅި ދިރިއުޅުން ހޭދަކޮށް ނިމިގެންދާ އެއްޗެހި ކަމާއިމެދު ވިސްނަންޖެހޭ ކަމަށެވެ.
ފަރުމަސް ހުންނާނީ ކޮން ތަނަކުކަން ޔަޤީންކޮށް އެނގޭހިނދު އެތަނަކަށް ގޮސް އެއްފަހަރާ ގިނަ އަދަދެއްގެ މަސް ނަގާ، ފަރެއްވެސް ހުސްކޮށްލެވިދާނެ ކަމަށް ޑރ. ނަސީރު ވިދާޅުވިއެވެ. މިގޮތަށް މިހެން ވާނަމަ ދިރުންތައް ހިމާޔަތްކުރުމުގެ މިސްރާބަށް ދާންޖެހިދާނެ ކަމަށާއި، އިމެއް ކަނޑައެޅުން މުހިންމު ވަނީވެސް މި ސަބަބާހުރެ ކަމަށް އޭނާ ވިދާޅުވިއެވެ.
މިކަމުގައި އިމެއް ކަނޑައަޅާ ގަވާއިދުތައް ހެދުން މުހިންމު ކަމުގައި އޭނާ ވިދާޅުވިއެވެ. މިއީ އެކަމެއް ހުއްޓުވުމުގެ ނިޔަތުގައި ކުރާ ކަމެއް ނޫން ކަމަށް ޑރ. ނަސީރު ވިދާޅުވިއެވެ. މިއީ އެކަމުން އާމްދަނީއެއް ހޯދުމަށް މަސައްކަތްކުރާ ބަޔަކަށް އެންމެ ރަނގަޅު ގޮތުގައި މިކަން ކުރެވޭނެ ގޮތް މަގުފަހިކުރުމަށް ކުރާ ކަމެއް ކަމަށް ޑރ. ނަސީރު ވިދާޅުވިއެވެ.
މިހާރު މިނިސްޓްރީ އޮފް ފިޝަރީޒްއިން އެކި ބަވާތް ބާވަތުގެ ފަރުމަހުގެ މަސްވެރިކަމާ ގުޅޭ ޕްލޭންތައް ހަދަމުންދާކަން ޑރ. ނަސީރު ވަނީ ވިދާޅުވެފައެވެ. މިހާރުވެސް މިފަދަ ޕްލޭންތަކެއް ހަދާފައިވާނެ ކަމަށާއި، އެހެންނަމަވެސް އިންތައް ކަނޑައެޅިގެން މަސްވެރިކަން ކުރުމުގެ ޕްލޭނެއް ކަނޑައަޅާފައިނުވާކަމަށް ވިދާޅުވިއެވެ.
