ބޫބަކާ ކަމާރާ އެސްޓަން ވިލާއަށް
23 މެއި 2022 | ހޯމަ 16:22އެސްޓަންއާއެކު އަލަށް ހަދާފައިވަނީ 5 އަހަރުގެ އެއްބަސްވުމެއް
މާސޭއަށް މި ސީޒަންގައި ކުޅުނު ބޫބަކާ ކަމާރާ
ފްރެންޗް ލީގުގައި އެންމެ ހައިކޮށް ރޭޓްކޮށްފައިވާ އެއް މިޑްފީލްޑަރ ބޫބަކާ ކަމާރާ އެސްޓަން ވިލާއާ ގުޅެން ނިންމައިފިއެވެ.
އުމުރުން 22 އަހަރުގެ ކަމާރާ މިއަންނަ ސީޒަންގައި އެސްޓަންއާ ގުޅެން ނިންމާފައި ވާއިރު، ފްރާންސްގެ މާސޭއާއެކު އޭނާ ހަދާފައިވާ އެއްބަސްވުމުގެ މުއްދަތު މިއަންނަ މަހުގެ ނިޔަލަށް ހަމަވާނެއެވެ. އެސްޓަންއާއެކު އަލަށް ހަދާފައިވަނީ ފަސް އަހަރުގެ އެއްބަސްވުމެކެވެ.
ކުރިއަށް އޮތް ނޭޝަންސް ލީގު މެޗުގައި ކުޅުމަށް ކަމާރާއަށް ވަނީ ފްރާންސްގެ ސީނިއަރ ގައުމީ ޓީމުން ޖާގަ ލިބިފައެވެ. މިއީ ފްރާންސްގެ ސީނިއަރ ގައުމީ ޓީމަށް ކުޅެން ކަމާރާއަށް ލިބުނު ފުރަތަމަ ފުރުސަތެވެ.
ކަމާރާއާ ގުޅޭގޮތުން އެސްޓަންގެ ކޯޗު ސްޓީވެން ޖެރާޑް ބުނީ، ޔޫރަޕު ފުޓްބޯޅައިގެ އެންމެ އުންމީދީ އެއް ކުޅުންތެރިޔާ ޓީމަށް ގެނެވުމުން އުފާކުރާކަމަށެވެ.
ކަމާރާ ވަނީ މި ސީޒަންގައި މާސޭ، ފްރެންޗް ލީގުގެ ދެވަނާގައި ނިންމާލުމުގައި މުހިންމު ދައުރެއް އަދާކޮށްފައެވެ.
