ޕްރިމިއާ ލީގު: އެސްޓަން ވިލާ އަތުން މޮޅުވެ ސިޓީ އިން ލިވަރޕޫލާ އަރާ ހަމަކުރަނީ

އިނގިރޭސި ޕްރިމިއާ ލީގުގައި މެންޗެސްޓަރ ސިޓީ އަދި އެސްޓަން ވިލާ ބައްދަލުކުރި މެޗު ފަސޭހަ ކަމާއެކު ސިޓީން ކާމިޔާބުކޮށް ލީގު ތާވަލުގެ އެއްވަނައިގައި އޮތް ލިވަރޕޫލާއި ތިން ޕޮއިންޓް ކައިރިއަށް ޖެހިލައިފިއެވެ.

ސިޓީގެ ދަނޑުގައި ކުޅުނު މި މެޗު ސިޓީން ކާމިޔާބުކުރީ 3-0 ގެ ނަތީޖާ އިންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު ސިޓީން ވަނީ އެސްޓަން ވިލާގެ ހާފަށް ބާރުބޮޑު ކޮށް ގިނަ ހަމަލާތަކެއް ފޮނުވާލައިފައެވެ. މި ހާފުގައި އެސްޓަން ވިލާ ކުޅުންތެރިންގެ ފަރާތުން މޮޅު ޑިފެންސިވް ގޭމެއް ފެނިގެން ދިޔައިރު އެސްޓަން ވިލާ ކުޅުންތެރިން ވަނީ ސިޓީއިން ފޮނުވާލި ގިނަ ހަމަލާތަކެއް ދިފާއު ކޮށްފައެވެ.

މެޗުގެ ފުރަތަމަ ހާފު ނިމިގެންދިޔައީ 0-0 ގެ ނަތީޖާ އަކުންނެވެ.

މެޗުގެ ދެވަނަ ހާފު ފަށައިގެން މިނެޓެއްގެ ތެރޭގައި ސިޓީން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ރަހީމް ސްޓާލިންގ އެވެ.

މި ލަނޑަށްފަހު ވެސް ސިޓީ ކުޅުންތެރިންވަނީ މޮޅު އެޓޭކިންގ ގޭމެއް ކުޅެ ފުލުފުލުގައި އެސްޓަން ވިލާގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 65 ވަނަ މިނެޓުގައި ސިޓީން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ކެވިން ޑި ބްރައިނާގެ އެހީތެރިކަމާ އެކު ޑޭވިޑް ސިލްވާ އެވެ.

ސިޓީން ޖެހި ފަހު ލަނޑު މެޗުގެ 70 ވަނަ މިނެޓުގައި އެޓީމަށް ކާމިޔާބު ކޮށްދިނީ އިލްކޭ ގުންޑުއާން އެވެ. މި މެޗުގެ އެންމެ މޮޅު ކުޅުންތެރިޔަކީ މެންޗެސްޓަރ ސިޓީގެ ފޯވާޑް ސްޓާލިންގ އެވެ.

މެޗަށްފަހު ނޫސްވެރިންނާ ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނީ ސިޓީން ކުޅެން ނިކުންނަ ކޮންމެ މެޗަކީ ވެސް މޮޅުވާން ނިކުންނަ މެޗުތަކެއް ކަމަށާއި ލީގު ތާވަލާއި މެދު އަދި ނުވިސްނާ ކަމަށެވެ. އަދި މި މެޗުގެ ފުރަތަމަ ހާފުގައި ކުޅުންތެރިންގެ ފަރާތުން ގިނަ ގޯސްތަކެއް ހެދުނު ކަން ފާހަގަ ކުރަމުން އޭނާ ބުނީ އެގޮތަށް ސިޓީން ކުޅޭނަމަ ސިޓީން ރެލިގޭޓް ވާނެ ކަމަށާއި އެކަން ކުޅުންތެރިން ރަނގަޅު ކޮށް ދެވަނަ ހާފުގައި ދެއްކި ކުޅުމާއި މެދު ހިތްހަމަ ޖެހޭ ކަމަށެވެ.

މިނަތީޖާ އާއެކު ސިޓީއިން ލީގު ތާވަލުގެ ދެވަނައިގައި އޮތީ ލިބުނު 22 ޕޮއިންޓާއެކުގައެވެ. ތާވަލުގެ އެއްވަނައިގައި އޮތް ލިވަރޕޫލަށް 25 ޕޮއިންޓު ލިބިފައިވާއިރު މެޗުން ބަލިވި އެސްޓަން ވިލާ ލީގު ތާވަލުގެ 14 ވަނައިގައި އޮތީ 11 ޕޮއިންޓާ އެކުގައެވެ.