ހަތަރު މަހުގެ މުސާރަ ކުޑަކުރަން އެސްޓަން ވިލާގެ ކުޅުންތެރިން އެއްބަސްވެއްޖެ
25 އެޕްރީލު 2020 | ހޮނިހިރު 16:18ކުޅުންތެރިންގެ މުސާރައިން 25 އިންސައްތަ ވަނީ އުނިކޮށްފައި
އެސްޓަން ވިލާގެ ކުޅުންތެރިން އުފާފާޅުކުރަނިކޮށް
އިނގިރޭސި ޕްރިމިއާ ލީގުގައި ވާދަކުރަމުން އަންނަ އެސްޓަން ވިލާގެ ކުޅުންތެރިންގެ މުސާރަ ކުޑަކުރަން ނިންމައިފި އެވެ.
މިހާރު ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ކްލަބަށް ދިމާވާ މާލީ ގޮންޖެހުންތަކުން އަރައިގަތުމަށް އެސްޓަން ވިލާގެ ކުޅުންތެރިން ވަނީ ކުރިއަށް އޮތް ހަތަރު މަހުގެ މުސާރައިން 25 އިންސައްތަ އުނިކުރަން އެއްބަސްވެފައެވެ. އަދި އެޓީމުގެ ސީނިއަރ މެނޭޖުމަންޓާއި ހުރިހާ ކޯޗުންގެ މުސާރަ އިންވެސް ވަނީ 25 އިންސައްތަ އުނިކޮށްފައެވެ.
އެސްޓަން ވިލާގެ ޗީފް އެގްޒެކްޓިވް ކްރިސްޓިއަން ޕާސްލޯ ވިދާޅުވީ ކުޅުންތެރިންނާއި، ސީނިއަރ މެނޭޖުމަންޓުގެ އިތުރަށް ކޯޗުންގެ މުސާރަ ކުޑަކުރުމުގެ މައިގަނޑު ބޭނުމަކީ އެ ކްލަބުގެ މުވައްޒަފުންނަށް ބަރާބަރަށް މުސާރަ ދިނުން ކަމަށެވެ. އެގޮތުން އެ ކްލަބުގެ އެއްވެސް މުވައްޒަފަކު ނޯޕޭ ލީވް އަށް ނުފޮނުވާނެ ކަމަށް ވަނީ ވިދާޅުވެފައެވެ.
އެސްޓަން ވިލާގެ ކުޅުންތެރިންގެ މުސާރަ ކުޑަކުރަން ނިންމިއިރު، މީގެ ކުރިން އާސެނަލް، ޝެފީލްޑް ޔުނައިޓެޑް، ސައުތެމްޓަން އަދި ވެސްޓް ހޭމް ޔުނައިޓެޑުންވެސް ވަނީ އެޓީމުގެ ކުޅުންތެރިންގެ މުސާރަ ކުޑަކޮށްފައެވެ.
