އެސްޓަން ވިލާގެ އެއްބަސްވުން ގްރީލިޝް އާކޮށްފި

އެސްޓަން ވިލާއާއެކު ހަދާފައިވާ އެއްބަސްވުން އިންގްލެންޑްގެ މިޑްފީލްޑަރު ޖެކް ގްރީލިޝް އާކޮށްފިއެވެ.

އުމުރުން 25 އަހަރުގެ މިޑްފީލްޑަރު އެސްޓަން ވިލާގެ އެއްބެސްވުން އާކޮށްފައިވަނީ އިތުރު ފަސް އަހަރަށެވެ. އެހެންކަމުން 2025 ވަނަ އަހަރުގެ ހޫނު މޫސުމުގެ ނިޔަލަށް އޭނާ އެސްޓަން ވިލާގައި މަޑުކުރާނެއެވެ.

އެސްޓަން ވިލާގެ އެއްބަސްވުން ގްރީލިޝް އާކުރިއިރު، އޭނާ ހޯދުމަށް މެންޗެސްޓާ ޔުނައިޓެޑުން މަސައްކަތް ކުރަމުން އައި ކަމަށް ވަނީ ރިޕޯޓުކޮށްފައެވެ.

މިދިޔަ ސީޒަނުގެ އިނގިރޭސި ޕްރިމިއާ ލީގުގައި މޮޅު ކުޅުމެއް ދެއްކި ގްރީލިޝް ވަނީ މިދިޔަ ސީޒަނުގައި ޖުމްލަ 10 ލަނޑު ކާމިޔާބުކޮށްފައެވެ. މީގެ ތެރެއިން އަށް ލަނޑު އޭނާ ކާމިޔާބުކުރީ އިނގިރޭސި ޕްރިމިއާ ލީގުގައެވެ.

އެއާއެކު މި މަހުގެ ކުރީކޮޅު ކުޅުނު ޔުއެފާ ނޭޝަންސް ލީގުގެ މެޗުތަކަށް އެކުލަވާލި އިންގްލެންޑްގެ ގައުމީ ފުޓްބޯޅަ ޓީމުގެ ސްކޮޑުން ގްރީލިޝްއަށް ފުރުސަތު ލިބިގެންދިޔައެވެ. އަދި ޑެންމާކާ ދެކޮޅަށް އިންގްލެންޑް ކުޅުނު މެޗުގައި ގްރީލިޝްއަށް ފުރުސަތު ދީފައިވާއިރު، މިއީ އިންގްލެންޑްގެ ޖާޒީގައި ގްރީލިޝް ކުޅުނު ފުރަތަމަ މެޗެވެ.

އުމުރުން އެންމެ ހަ އަހަރުގައި އެސްޓަން ވިލާއާ ގުޅުނު ގްރީލިޝް، އެސްޓަން ވިލާގެ ސީނިއާ ޓީމަށް އެންމެ ފުރަތަމަ މެޗެއް ކުޅެދީފައިވަނީ 2014 ވަނަ އަހަރުގެ މެއި މަހުގައެވެ. އޭގެ ފަހުން ގްރީލިޝް ވަނީ މިހާތަނަށް އެސްޓަން ވިލާއަށް ކުޅެދިން 186 މެޗުގައި 25 ލަނޑު ކާމިޔާބުކޮށްފައެވެ.

ޕްރިމިއާ ލީގުގައި ވާދަކުރަމުން އަންނަ އެސްޓަން ވިލާއިން މި ސީޒަނުގެ ޕްރިމިއާ ލީގުގައި އަދި މެޗެއް ކުޅެފައެއް ނުވެއެވެ. އެޓީމުން ލީގުގައި ކުޅޭ ފުރަތަމަ މެޗުގައި މި މަހުގެ 21 ވަނަ ދުވަހު ނުކުންނާނީ ޝެފީލްޑް ޔުނައިޓެޑާ ދެކޮޅަށެވެ.