ޓައިވާންގެ ދިފާއުގައި ބާރުގެ ބޭނުންކުރަންވެސް ތައްޔާރު: ބައިޑަން

ޓައިވާން ދިފާއުކުރުމަށް ބާރުގެ ބޭނުންކުރަންވެސް ތައްޔާރުކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.

އެމެރިކާގެ ރައީސް ޖޯ ބައިޑަން މިހެން ވިދާޅުވެފައި ވަނީ އެމަނިކުފާނު ޖަޕާނަށް ކުރެއްވި ރަސްމީ ދަތުރުފުޅުގެ ތެރޭގައި ހޯމަ ދުވަހުއެވެ.

ބައިޑަން ވަނީ ޗައިނާއަށް ވަރަށް ބޮޑަށް ފާޑު ވިދާޅުވެ އެމެރިކާއިން ޓައިވާނާ ދޭތެރޭ ގެންގުޅޭ ސިޔާސަތަށް އެއްވެސް ބަދަލެއް ނާންނަކަމަށް ވިދާޅުވެފައެވެ. ޓައިވާނަކީ އަމިއްލައަށް ވެރިކަންކުރުމުގެ ބާރުލިބިގެންވާ މިނިވަން ދައުލަތެއްކަމަށް އެމެރިކާއިން ބުނެއެވެ. ނަމަވެސް ޗައިނާގެ "ވަން ޗައިނާ" ޕޮލިސީގެ ދަށުން އެގައުމުން ގަބޫލުކުރާ ގޮތުގައި ޓައިވާނަކީ ޗައިނާގެ ބައެކެވެ. ޓައިވާންގެ މައްސަލާގައި މި ދެގައުމުން ގެންގުޅޭ ވިސްނުމަކީ ދެގައުމުގެ ދެމެދު އޮތް ގުޅުމަށް އެންމެ ބޮޑަށް ބުރޫއަރާ މައްސަލައެވެ.

ޖަޕާންގެ ބޮޑުވަޒީރު ފުމިއޯ ކިޝީޑާ އާއެކު ހޯމަ ދުވަހު ބައިޑެން ބައިވެރިވެވަޑައިގެން ނޫސްވެރިންގެ ބައްދަލުވުމުގައި ޓައިވާނަށް ހަމަލާދޭން ފަށައިފިނަމަ އެގައުމުގެ ދިފާއުގައި އެމެރިކާއިން ނުކުންނާނެތޯ ނޫސްވެރިއަކު ސުވާލުކުރުމުން ބައިޑަން ވަނީ އެސުވާލުގެ ޖަވާބުގައި އާއެކޭ ވިދާޅުވެފައެވެ. ބައިޑަން ވަނީ ޓައިވާން ދިފާއުކުރުމަށް އެމެރިކާއިން ވައުދުވެފައިވާނެ ކަމަށް ވިދާޅުވެފައެވެ.

ބައިޑަން ވަނީ ވަން ޗައިނާ ޕޮލިސީއަށް އެމެރިކާއިން ތާއިދުކުރާ ކަމަށާއި އެކަމުގެ ހުރިހާ އެއްބަސްވުމެއްގައިވެސް އެގައުމުން ސޮއިކޮށްފައިވާނެ ކަމަށް ވިދާޅުވެފައެވެ. އެހެންނަމަވެސް ޗައިނާއިން ބާރުގެ ބޭނުން ކޮށްގެން ޓައިވާނަށް އަރައި ޓައިވާން ހިސާރުކުރުމަކީ ބަލައިގަނެވޭނެ ކަމެއް ނޫންކަމަށް ބައިޑަން ވިދާޅުވިއެވެ. އަދި މިފަދަ ކަމެއް ނުހިގާނެކަމަށް އުންމީދުކުރައްވާކަމަށް ބައިޑަން ވިދާޅުވިއެވެ.

އެމެރިކާއިން އެގައުމަށް ދޭ އެއްބާރުލުމަށް ޓައިވާންގެ ފޮރިން މިނިސްޓްރީން ޝުކުރުއަދާކޮށްފައިވާއިރު، މިކަމާ ގުޅިގެން ޗައިނާއިން ވަނީ ހިތްހަމަނުޖެހުން ފާޅުކޮށްފައެވެ.

މީގެކުރިން އޮކްޓޫބަރު މަހުވެސް ބައިޑަން ވަނީ މިފަދަ ވާހަކަތަކެއް ދައްކަވާފައެވެ. އޭރު ވައިޓް ހައުސްގެ ތަރުޖަމާނެއް ބަނީ އެމެރިކާގެ ސިޔާސަތުތަކަށް ބަދަލުގެނެސްފައިވާކަން ބައިޑަން އިއުލާން ނުކުރައްވާކަމަށް ވިދާޅުވެފައެވެ. ވައިޓް ހައުސްއިން އެމެރިކާގެ ސިޔާސަތަށް ބަދަލެއް ނާންނަކަމަށް ބުނި ނަމަވެސް ބައިޑަން ވިދާޅުވި ބަހުގެ މާނަ ވަރަށް ސާފުކަމަށް ބައެއް އެނަލިސްޓުން ބުނެފައިވާކަމަށް ރިޕޯޓުތައް ބުނެއެވެ.

ޓައިވާނަށް ބަޔަކު ހަމަލާދީފި ނަމަ އެގައުމަށް އެހީތެރިކަން ފޯރުކޮށްދިނުމަށް އެމެރިކާއަށް ގާނޫނުން ލާޒިމުކުރި ނަމަވެސް އެގައުމުން ގެންގުޅޭ ސްޓްރެޓީޖިކް އެމްބިގުއިޓީ ސިޔާސަތުގެ ސަބަބުން ހަމަލާއެއް ދީފި ނަމަ ހަތިޔާރު ފޯރުކޮށްދިނުމުގެ އިތުރުން އެގައުމުގެ ދިފާއުގައި އެމެރިކާއިން ބާރުގެ ބޭނުންކުރުމަކީ ނާދިރު ކަމެކެވެ. ނަމަވެސް ހޯމަ ދުވަހު ބައިޑަން ވިދާޅުވި ބަސްފުޅާއެކު ޗައިނާއިން ޓައިވާނަށް ހަމަލާދީފި ނަމަ އެމެރިކާއިން މަޑުން ނޯންނާނެކަމަށް ވަރަށް ސާފުކަމަށް މާހިރުން ބުނެއެވެ.