މިވަގުތު ގިނަ ފިޒިކަލް މައްސަލަތަކެއް އެބަ ހުރި ކަމަށާއި، ނަމަވެސް ކުރިމަގާ މެދު ވަރަށް އަވަހަށް ގޮތެއް ނިންމާނެކަމަށް އޭސީ މިލާންގެ ސްޓަރިކަރ ޒްލަޓާން އިބްރަހިމޮވިޗް ބުނެފިއެވެ.
އޭސީ މިލާނަށް އިބްރަހިމޮވިޗް ބަދަލުވީ 2019 ވަނަ އަހަރުގެ ޑިސެމްބަރު މަހުއެވެ. އެއަހަރު އޭނާ އެ ޓީމާ ގުޅުނީ އެއް އަހަރުގެ އެއްބަސްވުމެއްގެ ދަށުންނެވެ. އޭގެ ފަހުން އޭނާ ވަނީ އެ ކުލަބާއެކު ހަދާފައިވާ އެއްބަސްވުން ދެ ފަހަރެއްގެ މަތިން އައުކޮށްފައެވެ. އެންމެ ފަހުން އޭނާ އެ ކުލަބާއެކު ހެދި އެއްބަސްވުން މި ސީޒަނުގެ ނިޔަލަށް ހަމަވާނެއެވެ.
އޭސީ މިލާނާއެކު މިއަަހަރުގެ ސެރީއާގެ ޗެމްޕިއަންކަން ހޯދުމަށްފަހު އޭނާ ބުނީ ފިޒިކަލް ގިނަ މައްސަލަތަކެއް މިވަގުތު އޭނާގެ ހުރި ކަމަށެވެ. ނަމަވެސް އޭނާގެ ކުރިމަގާ މެދު ވަރަށް އަވަހަށް ގޮތެއް ނިންމާނެކަމަށެވެ. މީގެ އިތުރުން އޭނާ ބުނީ އިޓާލިއަން ލީގުގެ ތަށި ލިބުމުން އެކަން ޚާއްސަ ކުރާނީ މިނޯ ރައިއޯލާއަށް ކަމަށެވެ. އަދި މިއީ ރައިއޯލާ ނެތި އޭނާއަށް ހޯދުނު ފުރަތަމަ ތަށި ކަމަށެވެ. ރައިއޯލާއަކީ އޭނާގެ އެޖެންޓެވެ. މިދިޔަ އޭޕްރީލް މަހުގެ ތެރޭގައި ރައިއޯލާ ވަނީ މަރުވެފައެވެ.
އެންމެ ފަހުން އޭސީ މިލާނަށް ބަދަލުވުމަށްފަހު އިބްރަހިމޮވިޗް ވަނީ އެ ކުލަބާއެކު މޮޅު ކުޅުމެއް ދައްކާފައެވެ. އުމުރުން 40 އަހަރުގެ އިބްރަހިމޮވިޗް ވަނީ އޭގެ ފަހުން އޭސީ މިލާނަށް ކުޅެދިން 59 މެޗުން 33 ލަނޑު ޖަހާފައެވެ. އޭނާ އެންމެ ފުރަތަަމަ އޭސީ މިލާނަށް ކުޅުނީ ލޯނު އެއްބަސްވުމެއްގެ ދަށުން 2010 ވަނަ އަހަރުއެވެ. އޭގެ ފަހުން 2011 ވަނަ އަހަރު އޭނާ ވަނީ އެ ކުލަބާއެކު ދާއިމީ އެއްބަސްވުމެއް ހަދާފައެވެ.
އޭސީ މިލާނުން މި އަހަރުގެ އިޓާލިއަން ކާމިޔާބުކުރުމާއެކު، މިއީ ފާއިތުވި 11 އަހަރުގެ ތެރޭގައި އެ ޓީމަށް ލީގު ކާމިޔާބުކުރެވުނު ފުރަތަމަ ފަހަރަށެވެ.
