ޒިންޗެންކޯ ތަށި ޚާއްސަކުރީ ޔޫކްރެއިންގެ ރައްޔިތުންނަށް

އެސްޓަން ވިލާ އަތުން މޮޅުވެ މިއަހަރުގެ އިނގިރޭސި ޕްރިމިއަރ ލީގު ކާމިޔާބުކޮށް، ތަށި ޚާއްސަ ކުރަނީ ޔުކްރެއިންގެ ރައްޔިތުންނަށް ކަމަށް ޒިންޗެންކޯ ބުނެފިއެވެ.

މެޗަށްފަހު ޒިންޗެންކޯ ވަނީ ލީގުގެ ޗެމްޕިއަން ތަށީގައި ޔުކްރެއިންގެ ދިދަ އޮޅާފައެވެ. އެވަގުތު އޭނާއަށް ރޮވުނެވެ. އޭނާ ބުނި ގޮތުގައި މި ލިބުނު ބޮޑު ކާމިޔާބީ އޭނާ ޚާއްސަ ކުރާނީ އޭނާގެ އަމިއްލަ ޤައުމުކަމަށްވާ ޔުކްރެއިންގެ ރައްޔިތުންނަށް ކަމަށެވެ.

ޒިންޗެންކޯ ބުނީ މިއީ އޭނާއަށް ވަރަށް ޖަޒުބާތީ ވަގުތެއް ކަމަށާއި، އެކަން ހަނދާނުން ފޮހެލަން އުނދަގޫވާނެ ކަމަށެވެ. އަދި ރަޝިޔާގެ ސަބަބުން އޭނާގެ ޤައުމުގެ ރައްޔިތުން އިހުސާސްކުރަމުންދާ ހިތް ދަތި ދުވަސްތަކުގެ ވާހަކަ ވެސް އޭނާ ވަނީ ބުނެފައެވެ.

މީގެ އިތުރުން އޭނާ ބުނީ ޔުކްރެއިންގެ ރައްޔިތަކަށްވުމަކީ އޭނާއަށް ލިބޭ ވަރަށް ބޮޑު ފަޚުރެއް ކަމަށެވެ. އަދި އެއީ އޭނާ ޔޫކްރެއިންގެ ރައްޔިތުންނަށް ހޯދި ތައްޓެއް ކަމަށާއި، އެއީ ޔޫކްރެރިންގެ ރައްޔިތުންނަށް ހައްޤު އެއްޗެށް ކަމަށް ވެސް އޭނާ ބުންޏެވެ. އޭނާ ބުނީ އޭނާގެ ހުރިހާ ވެސް އެއްޗަކީ އެ ގައުމުގެ ރައްޔިތުންނާއި ސަޕޯޓަރުންކަމަށެވެ. އޭނާގެ ހަޔާތުގައި ދިމާވި އެންމެ ހިތް ދަތި ވަގުތުގައި އަޅާލާ އެހީތެރިވެދިން މީހުންގެ މަތިން ދުވަހަކުވެސް ހަނދާން ނުނެތޭނެ ކަމަށް އޭނާ ބުންޏެވެ.

ޒިންޗެންކޯ ބުނީ ހަނގުރާމަ ފެށި ދުވަސްކޮޅު ފުޓުބޯޅައިގެ މަތިން އޭނާ ހަނދާން ނުހުންނަކަމަށެވެ. ސަބަބަކީ އޭނާގެ ގައުމުގައި ވަމުންދާ ގޮތް ފެންނަކަމަށާއި، ދިރިއުޅެވޭނެކަމާ މެދު ޔަގީންކަން ނޯންނަކަމަށެވެ. ނަމަވެސް، މި އެންމެންގެ އެހީތެރިކަމާއެކު އެކަންވެސް ހުރަސްކުރެވުނު ކަމަށް އޭނާ ބުންޏެވެ.