ފަހަތުން އަރައި މޮޅުވުމާއި ގުޅޭ ގޮތުން ސުވާލުކުރުމުން ގާޑިއޯލާ ދިނީ ތަފާތު ޖަވާބެއް

އިނގިރޭސި ޕްރިމިއަރ ލީގުގެ ފަހު މެޗުގައި ފަހަތުން އަރައި އެސްޓަން ވިލާ ބަލިކުރުމާއި ގުޅޭ ގޮތުން ސުވާލު ކުރުމުން މެންޗެސްޓަރ ސިޓީގެ ކޯޗު ޕެޕް ގާޑިއޯލާ ތަފާތު ޖަވާބެއް ދީފިއެވެ.

ލީގުގެ ފަހު މެޗަށް ނިކުތްއިރު ސިޓީ އޮތީ މޮޅުވާން މަޖުބޫރު ހާލަތެއްގައެވެ. ރޭގެ މެޗުގައި އެސްޓަން ވިލާއިން ވަނީ ދެ ލަނޑު ޖަހާ ލީޑު ނަގާފައެވެ. ނަމަވެސް ސިޓީން ވަނީ ދެ ވަނަ ހާފުގައި ފަސް މިނެޓުގެ ތެރޭގައި ތިން ލަނޑު ޖަހައި މެޗުން މޮޅުވެފައެވެ. އެއާއެކު މި އަހަރުގެ ލީގު ޗެމްޕިއަންކަން ލިބުނީ ސިޓީއަށެވެ.

މެޗަށްފަހު ނޫސްވެރިޔަކު ވަނީ އެކަމާ ގުޅޭ ގޮތުން ގާޑިއޯލާ އާއި ސުވާލުކޮށްފައެވެ. ނޫސްވެރިޔާ ސުވާލުކުރީ ފަސް މިނެޓުގެ ތެރޭ ތިން ލަނޑު ޖަހާ، ތަށި ހޯދީ ކޮންކަހަލަ އުކުޅެއް ބޭނުންކޮށްގެންތޯއެވެ. އެ ސުވާލަށް ގާޑިއޯލާ ދިނީ ތަފާތު އަދި މަޖާ ޖަވާބެކެވެ. ގާޑިއޯލާ ބުނީ އޭނާ ގުޅީ ރެއާލް މެޑްރިޑަށް ކަމަށާއި، އޭނާއަށް އެޑްވައިސް ދިނީ އެ މީހުންކަމަށެވެ.

ގާޑިއޯލާ މިހެން ބުނެފައިވާއިރު ރެއާލުން ވަނީ ޗެމްޕިއަންސް ލީގުގެ ސެމީގައި ފަހަތުން އަރައި މޮޅުވެ ސިޓީ ކަޓުވާލާފައެވެ. ސިޓީގެ ދަނޑުގައި ކުޅުނު ފުރަތަމަ ލެގުން ސިޓީ މޮޅުވީ 3-4 ންނެވެ. އަދި ރެއާލްގެ ދަނޑުގައި ކުޅުނު މެޗުގައި ވެސް ފުރަތަމަ ލަނޑު ޖަހައި ލީޑު ނެގީ ސިޓީންނެވެ. ނަމަވެސް ރެއާލުން ވަނީ ފަހު ވަގުތުގެ ތެރޭގައި ތިން ލަނޑު ޖަހައި ސިޓީ ކަޓުވާލާފައެވެ. ރޭގެ މެޗަށްފަހު ގާޑިއޯލާ ދިން ޖަވާބަކީ އެ މެޗާ ގުޅުވާ ދިން ޖަވާބެއް ކަމަށް ބައެއް މީޑިއާތަކުގައި ވަނީ ރިޕޯޓުކޮށްފައެވެ.

މިއަހަރުގެ ލީގު ޗެމްޕިއަންކަން ސިޓީ ހޯދިއިރު، މިދިޔަ ހަ އަހަރުގެ ތެރެއިން ސިޓީއަށް ލީގު ގެއްލުނީ އެއް ފަހަރުއެވެ. ސިޓީން ވަނީ ހަ ފަހަރު ލީގުގެ ޗެމްޕިއަންކަން ހޯދާފައެވެ.