އެމެރިކާގެ ރައީސް ޖޯ ބައިޑަން ޖަޕާނަށް ވައިޑައިގަންނަވައިފި

އެމެރިކާގެ ރައީސް ޖޯ ބައިޑަން ޖަޕާނަށް ވަޑައިގަންނަވައިފިއެވެ.

ބައިޑަން ޖަޕާނަށް ވަޑައިގަންނަވާފައި ވަނީ އާދިއްތަ ދުވަހުއެވެ. މިއީ އެމެރިކާއިން އިންޑޯ-ޕެސިފިކްގެ ގައުމުތަކާއެކު އޮންނަ އިގުތިސާދީ ގުޅުން އިތުރަށް ބަދަހިކުރުމަށް ޚާއްސަ ޕްރޮގްރާމެއް ލޯންޗުކުރުމަށް ކުރެއްވި ދަތުރުފުޅެކެވެ.

އެމެރިކާގެ މިޕްރޮގްްރާމް ލޯންޗުކުރުމުގެ ކުރިންވެސް މިޕްރޮގްރާމަށް ގިނަ ބައެއްގެ ފާޑުކިއުން ވަނީ އަމާޒުވެފައެވެ. އެގޮތުން މިޕްރޮގްރާމުން އެމެރިކާއަށް ފައިދާތަކެއް ކުރިނަމެސް އިންޑޯ-ޕެސިފިކް ގައުމުތަކަށް ކުރާ ފައިދާ ކުޑަވާނެ ކަމަށް ބުނެއެވެ.

އެމެރިކާގެ އިންޑޯ-ޕެސިފިކް އިކޮނޮމިކް ފްރޭމްވޯރކް ފޮރ ޕްރޮސްޕެރިޓީ (އައިޕީއީއެފް) ލޯންޗުކޮށްދެއްވާނީ ރައީސް ޖޯ ބައިޑަންއެވެ. ރިޕޯޓުތައް ބުނާގޮތުން މި ޕްރޮގްރާމް ލޯންޗުކުރުމަށް ހަމަޖެހިފައި ވަނީ ހޯމަ ދުވަހު، ޖަޕާންގެ ޓޯކްޔޯގައެވެ.

ބައިޑަން ޖަޕާނަށް ކުރައްވާ ދަތުރުފުޅުގައި އެގައުމުގެ އެމްޕަރަރ ނަރުހިތޯއާއި ބޮޑުވަޒީރު ފުމިއޯ ކިޝިދާއާ ބައްދަލުކުރައްވާނެއެވެ.

އޭޝިއާއަށް ބައިޑަން ކުރައްވާ ދަތުރުފުޅުގައި ޖަޕާނަށް ވަޑައިގަންނަވާފައި މިވަނީ ދެކުނު ކޮރިއާއަށް ވަޑައިގެންނެވުމަށްފަހުއެވެ.