ތިލަމާލެ ބްރިޖަށް ކޮންކްރީޓް ސަޕްލައިކުރުމަށް އެސްޓީއޯއާ ހަވާލުކޮށްފައިވާ މަސައްކަތުގެ ތެރެއިން, ޓެސްޓު ތަނބުގެ މަސައްކަތް ކާމިޔާބުކަމާއެކު ނިންމާލައިފިއެވެ.

މި މަސައްކަތް އެސްޓީއޯއާ ހަވާލުކޮށްފައިވަނީ މިމަހުގެ 12 ވަނަ ދުވަހުއެވެ.

ކޮންކްރީޓް ސަޕްލައިކުރުމަށް އެސްޓީއޯއިން ކުރަމުންދާ މަސައްކަތްތަކުގެ ތެރެއިން މިހާރު ވަނީ ޓެސްޓު ތަނބުގެ މަސައްކަތް ނިންމާލެވިފައިކަމަށް އެސްޓީއޯގެ މެނޭޖިން ޑިރެކްޓަރ ހުސެއިން އަމްރު ރަޝާދު ވަނީ ވިދާޅުވެފައެވެ. މި މަޝްރޫއަށް ބޭނުންވާ ކޮންކްރީޓް ސަޕްލައިކުރުމުގެ ފުރުސަތު އެސްޓީއޯއަށް ލިބިގެންދިއުމަކީ ލިބުނު ޝަރަފެއް ކަމަށް އަމްރު ވިދާޅުވިއެވެ.

މާލެ ތިލަފުށި ލިންކް މަޝްރޫއު ހަވާލުކޮށްފައިވާ އިންޑިޔާގެ ކުންފުނި އެފްކޯން އިންފްރާސްޓްރަކްޗަރއާ އެސްޓީއޯއާ ދެމެދު ވެފައިވާ އެއްބަސްވުމުގެ ދަށުން 7500 ކިއުބިކްމީޓަރގެ ރެޑީމިކްސް ކޮންކްރީޓް އެފްކޮއިން ގަންނާނެއެވެ. އެއް އަހަރު ދުވަހުގެ ތެރޭގައި ކޮންކްރީޓް ސަޕްލައިކޮށް ނިންމަންޖެހެއެވެ.

މިޕްރޮޖެކްޓަށް ކޮންކްރީޓް ސަޕްލައިކުރުމަށް، ވޭތުވެދިޔަ 5 މަސް ދުވަހުގެ ތެރޭގައި މިކަމަށްޓަކައި ވާން ޖެހޭ ތައްޔާރީތައް ފުރިހަމަ ކޮށްފައިވާކަމަށް އެސްޓީއޯއިން މައުލޫމާތުދެއެވެ. އެގޮތުން ސަޕްލައިކުރާ ކޮންކްރީޓަކީ ހައި ސްޓްރެންތު ކޮންކުރީޓަށް ވުމާއެކު، އެކަމަށް ބޭނުންވާ އިތުރު ވަސީލަތްތައް އެސްޓީއޯގެ ރެޑީމިކްސް ޕްލާންޓުގައި މިހާރު ގާއިމްކުރެވިފައިވާކަމަށްވެސް ވަނީ މައުލޫމާތުދީފައެވެ.

ތިލަމާލެ ބްރިޖު އަޅަނީ އިންޑިއާގެ 100 މިލިއަން ޑޮލަރުގެ ހިލޭ އެހީއާއި 400 މިލިއަން ޑޮލަރުގެ ލޯނު ފައިސާއިންނެވެ. މި މަޝްރޫއަށް ފަންޑު ކުރަނީ އިންޑިއާ ސަރުކާރުންނެވެ.

މާލެއާއި، ވިލިމާލެ އަދި ގުޅީފަޅާއި ތިލަފުށި ގުޅުވާ ބުރިޖުގެ އެއްބަސްވުމުގައި އެފްކޯން އިންފްރާސްޓްރަކްޗަރާއި ދިވެހި ސަރުކާރާ ދެމެދު ސޮއިކޮށްފައިވަނީ މިދިޔަ އަހަރުގެ އޮގަސްޓް މަހުގެ 26 ވަނަ ދުވަހުއެވެ. މިއީ 6.7 ކިލޯމީޓަރުގެ ބުރިޖެކެވެ. މި މަޝްރޫއުގެ ދަށުން، ގުޅިފައިވާ 3 ބުރިޖް ހިމެނެއެވެ. އެއީ މާލެއާ ވިލިމާލެ ގުޅުވާ ބުރިޖާއި، ވިލިމާލެއިން ގުޅީފަޅަށް އަދި ގުޅީފަޅުން ތިލަފުއްޓަށް އަޅާ ބުރިޖެވެ.

3 ބްރިޖު ގުޅުވާލަދޭ މަގުތަކާއެކު، 6.7 ކިލޯމީޓަރަށް މި ބްރިޖު ދެމިގެންދާނެއެވެ. ހަމައެކަނި، މާލެއާއި ވިލިގިލި ގުޅުވާލަދޭ ފުރަތަމަ ބްރިޖުގެ ދިގުމިން ވެސް، މިވަގުތު ފެންނާން އޮތް ބްރިޖަށްވުރެ ދިގުވާނެއެވެ. އެއީ ގާތްގަނޑަކަށް 1.3 ކިލޯމީޓަރުގެ ދިގު ބްރިޖެކެވެ. އެހެންކަމުން، ރައީސް ސާލިހުގެ ސަރުކާރުން، އެ މަޝްރޫއެއްގެ މަސައްކަތް، ދެ އަހަރުގެ ތެރޭގައި، ނިންމަން އަމާޒު ހިފާފައިވާ، މި ބިޔަ ބޮޑު މަޝްރޫއު ވެގެންދާނީ، ރާއްޖޭގެ ތާރީޚުގައި ފެނިގެންދާނެ އެންމެ ބޮޑު މަޝްރޫއަށެވެ.

ގްރޭޓަރ މާލޭގެ ކަނެކްޓިވިޓީ ބްރިޖު މަޝްރޫއު ނިންމަން ލަނޑުދަނޑި ކަނޑައަޅައިފައިވަނީ، 2023ގެ އެޕްރީލް ނުވަތަ މޭމަހާ ހިސާބަށެވެ. އަދި މި މަޝްރޫއު ނިންމައި، މި ބިޔަ ބްރިޖު ހުޅުވިގެން ދާއިރު، މި ސަރުކާރުގެ މިވަގުތުގެ ސިޔާސަތަކީ، އެއްވެސް ޓޯލެއް ނެގުމެއްނެތި، ރައްޔިތުންނަށް އެ މަގުތަކުން، ހިލޭ ދަތުރު ކުރެވޭނެ ބްރިޖަކަށް ވުމެވެ.