ޓޫރިޒަމް ދާއިރާއިން މީގެ ކުރިން ދެމުން އައި ނޭޝަނަލް އެވޯޑު ދިނުމަށް މަސައްކަތް އެބަ ކުރަން: ޑރ. އަބްދުﷲ މައުސޫމް
މި އެވޯޑްތަކަކީ ރައީސުލްޖުމްހޫރިއްޔާ ދެއްވާ އެވޯޑުތަކެއް
ޓޫރިޒަމް މިނިސްޓަރ ޑރ. އަބްދުﷲ މައުސޫމް
ޓޫރިޒަމް ދާއިރައިން މީގެ ކުރިން ދެމުން އައި ނެޝަނަލް އެވޯޑު ދިނުމަށް މަސައްކަތް ކުރައްވަމުން ގެންދަވާ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ހޮނިހިރު ދުވަހުގެ ރޭ ވާހަކަ ދައްކަވަމުން މިނިސްޓަރ ވިދާޅުވީ 3 އޮކްޓޯބަރަކީ ރާއްޖޭގެ ޤައުމީ ފަތުރުވެރިކަމުގެ ދުވަސް ކަމަށް ސަރުކާރުން ކަނޑައަޅާފައިވާއިރު މަސައްކަތް ކުރައްވަމުން ގެންދަވަނީ ޓޫރިޒަމް ދާއިރާއިން މީގެ ކުރިން ދެމުން އައި ނެޝެނަލް އެވޯޑް ދިނުމަށް ކަމަށެވެ. މި އެވޯޑްތަކަކީ ރައީސުލްޖުމްހޫރިއްޔާ ދެއްވާ އެވޯޑުތަކެކެވެ.
ފަތުރުވެރިކަމުގެ ރަން އަހަރާއި ގުޅުވައިގެން ވަރަށް ގިނަ ކަންތައްތައް ކުރުމަށް ހަމަޖެހިފައިވާކަން ފާހަގަކުރައްވާ މިނިސްޓަރ ވިދާޅުވީ މިދާއިރާއަށް ޚާއްސަ ކޮށްގެން 12 އެވޯޑެއް ކޮންމެ އަހަރަކު ވެސް ދިނުމަށް މިނިސްޓްރީން ނިންމާފައިވާ ކަމަށެވެ.
މި އެވޯޑްތަކަށް ޓޫރިސްޓުން ބައިތިއްބާ ޓޫރިސްޓް ރިސޯޓް، ޓޫރިސްޓް ހޮޓެލް، ޓޫރިސްޓް ގެސްޓްހައުސް އަދި ޓޫރިސްޓް އުޅަނދުފަހަރަށް ކުރިމަތިލެވޭނެއެވެ. މި އެވޯޑްތަކަށް ކުރިމަތިލުމުގެ ފުރުސަތު ޖޫން މަހުގެ 1- 30 ނިޔަލަށް ހުޅުވާލެވޭނެއެވެ. އަދި ޓޫރިސްޓް ރިސޯޓް، ޓޫރިސްޓް ހޮޓެލް، ޓޫރިސްޓް ގެސްޓްހައުސް އަދި ޓޫރިސްޓް އުޅަނދުފަހަރު، މިއިން ކޮންމެ ކެޓަގަރީއަކުން ޖުމްލަ މާރކްސް އެންމެ މަތިން ހޯދާ އެއްވަނަ، ދެވަނަ އަދި ތިންވަނަ ފަރާތަކަށް އެވޯޑެއް ދެވޭނެއެވެ.
މޮޅު ރަނގަޅު މުވައްޒަފުން ހޯދުމަކީ ފަތުރުވެރިކަމުގެ ދާއިރާއަށް އޮތް ގޮންޖެހުމެއްކަން ފާހަގަކުރައްވާ މިނިސްޓަރ ވިދާޅުވީ އެންމެ ރަނގަޅަށް މުވައްޒަފުންނާމެދު ކަންތައްތައް ކުރާ ރިސޯޓުތަކަށް މުވައްޒަފުންދާނެ ކަމަށެވެ. އަދި މި އެވޯޑުތައް ދޭން ފެށުމުން މުވައްޒަފުންނަށް އިތުރު މައުލޫމާތު ލިބި، ރިސޯޓުތަކުން ފޯރުކޮށްދޭ ޚިދުމަތްތަކަށް ބަދަލު އަންނާނެ ކަމަށެވެ.
ޓޫރިޒަމް ސަމިޓާއި ބެހޭގޮތުން މިނިސްޓަރ ވިދާޅުވީ ޖޫން 15 ވަނަ ދުވަހު މި ސަމިޓް އޮންނާނެ ކަމަށާއި ބޭރު ޤައުމުތަކުގެ އިސްވެރިން ސަމިޓްގައި ބައިވެރިވެވަޑައިގަންނަވާނެ ކަމަށެވެ. މި ސަމިޓް އެންމެ ބޮޑަށް ބިނާވަނީ ކޮމިއުނިޓީ ބޭސްޑް ޓޫރިޒަމްގެ މައްޗަށް ކަމަށް ވެސް ވިދާޅުވިއެވެ.
އަދި ކަލްޗަރަލް ޓޫރިޒަމަށް ވަކި ކޮންޕޯނަންޓެއް ހިމެނޭ ކަމަށް ވިދާޅުވިއެވެ. ޖޫންގައި މި ސަމިޓް ބާއްވާތީ މޫސުމަށް ސަމާލުކަން ދީގެން އިންތިޒާމުތައް ހަމަޖައްސަވަމުންދާ ކަމަށް ވެސް ވިދާޅުވިއެވެ.
މިނިސްޓަރ ވިދާޅުވީ ޖޫން 14 ގައި އޮންނަ ޔޫއެންޑަބްލިއުޓީއޯގެ ރަސްމީ ބައްދަލުވުން ޗެއަރ ކުރާނީ ރާއްޖޭގެ ޓޫރިޒަމް މިނިސްޓްރީން ކަަމަށާއި އެ ހަރަކާތަށް ވެސް 7 ޓޫރިޒަމް މިނިސްޓަރުން އެކި ޤައުމުތަކުން ވަޑައިގަންނަވާނެ ކަމަށެވެ. މީގެ އިތުރުން ސަރުކާރު ހިއްސާވާ ކުންފުނިތަކާއި ތަފާތު ވިޔާފާރީތައް ބައިވެރިވާނެ ކަމަށް ވެސް ވިދާޅުވިއެވެ.
މީގެ އިތުރުން ސަރފް ޕޮއިންޓުތަކާއި ޑައިވް ޕޮއިންޓުތައްފަދަ ތަންތަން މެނޭޖްކުރާނެ މެކޭނިޒަމެއް ގެންނަން މަސައްކަތް ކުރައްވާކަން ފާހަގަކުރައްވާ މިނިސްޓަރ ވިދާޅުވީ 50 ޑައިވް ސައިޓު މެނޭޖްކުރުމުގެ މަސައްކަތް މިއަހަރު ފެށޭނެ ކަމަށެވެ.
ކުރިއަތް އޮތްތާނގައި އިލެކްޓްރޯނިކް ޓެބުން ސައިޓްތަކުގެ މައުލޫމާތު ލިބިގެންދާނެ ކަމަށާއި ރާއްޖޭގެ ޓޫރިޒަމް އެ އަމާޒަށް ބައްޓަން ކުރަން މަސައްކަތް ކުރައްވާނެ ކަމަށް މިނިސްޓަރ ވިދާޅުވިއެވެ.
