ރާޅާއެޅުންތެރިންނަށް ޙާއްސަކުރި އެމްޓީސީސީ ފެރީގެ ދަތުރުތައް ފަށައިފި

ޓޫރިޒަމް މިނިސްޓްރީ އާއި އެމްޓީސީސީން ގުޅިގެން ރާޅާއެޅުންތެރިންނަށް ހިލޭ ކ.ތަނބުރުދޫއަށް ދެވޭ ގޮތަށް ހަމަޖެއްސި ފެރީގެ ދަތުރުތައް ހުކުރު ދުވަހު ފަށައިފިއެވެ.

އެމްޓީސީސީ ގެ އިޖްތިމާއީ ޒިންމާގެ ދަށުން އެ ކުންފުނިން ހަމަޖައްސައިދީފައިވާ މި ފެރީގެ ފުރަތަމަ ދަތުރު ކޮށްފައިވަނީ ހުކުރު ދުވަހު މެންދުރުފަހު 14:00 ގައި، ޖެޓީ ނަމްބަރު 6 އިން ތަނބުރުދޫއަށެވެ.

މި ފެރީ ހަމަޖެއްސުމަށްޓަކައި ޓޫރިޒަމް މިނިސްޓްރީއާއި އެމްޓީސީސީ އަދި މޯލްޑިވްސް ބޮޑީބޯޑިން އެސޯސިއޭޝަނާއި ދެމެދު ފާއިތުވި މެއި މަހުގެ ތެރޭގައި ވަނީ އެއްބަސްވުމެއްގައި ސޮއިކޮށްފައެވެ. ހަ މަސްދުވަހުގެ މި އެއްބަސްވުމުގެ ދަށުން ކޮންމެ ދުވަހަކު މާލެ އާއި ތަނބުރުދޫ އާއި ދެމެދު ފެރީ ދަތުރު ކުރާނެއެވެ. އެގޮތުން ބަންދު ނޫން ކޮންމެ ދުވަހަކު މެންދުރުފަހު 1:30 ގައި މާލެއިން، އަދި އިރުއޮއްސި 6:00 ގައި ތަނބުރުދޫއިން ފެރީ އޮންނާނެއެވެ. އަދި ބަންދު ދުވަސްތަކުގައި ހެނދުނު 7:00 ގައި މާލެއިން އަދި އިރުއޮއްސި 6:00 އިން ފެރީ އޮންނާނެއެވެ.

އެއްބަސްވުމުގައި ސޮއެކުރުމަށްފަހު ޓޫރިޒަމް މިނިސްޓަރ މޫސާ ޒަމީރު ވިދާޅުވީ ބްރިޖް އެޅުމައްޓަކާ ރާޅުގަނޑު ބަންދުކުރީ އެތަނުގައި ރާޅާއެޅުމަކީ ރައްކާތެރި ކަމަށް ނުވާތީ ކަމަށާއި، އެހެންމަކަމުން ރާޅާއެޅުންތެރިންނަށް އެހެން ގޮތަކަށް އެ ފުރުސަތު ތަނަވަސް ކޮށްދިނުމަށް ސަރުކާރުން ނިންމީ ކަމަށެވެ. އަދި މިނިސްޓަ ވިދާޅުވީ އަންނަ އަހަރު ބްރިޖް ހުޅުވެންދެން ރާޅާއެޅުންތެރިންނަށް ސަރުކާރުން އެ ފުރުސަތު ތަނަވަސް ކޮށްދޭނެ ކަމަށެވެ.

ރާޅާއެޅުންތެރިން މިހާރު ބޭނުން ކުރަމުންދާ ތަނބުރުދޫ ސަރފިން ޕޮއިންޓަކީ ދުނިޔޭގެ ފެންވަރުގައިވެސް ފާހަގަ ކޮށްލެވޭފަދަ ސަރފިން ޕޮއިންޓެކެވެ. އެގޮތުން ސީއެންއެންއިން ހޮވި އެންމެ ރަނގަޅު 50 ސަރފިން ޕޮއިންޓުގެ ތެރެއިން ތަނބުރުދޫ ރާޅު ޕޮއިންޓް ރެކޯޑް ކުރެވިފައިވަނީ 11 ވަނައިގައެވެ.