އެމްޓީސީސީ ސާފް ލީގުގެ ދެވަނަ މުބާރާތް މިހާރު ފެށިގެން ކުރިއަށްދާއިރު، މުބާރާތުގެ ކުއާޓާ ފައިނަލްގެ މެޗުތައް މިއަދު ފަށާނެއެވެ.

މ.މުލީގައި ކުރިއަށްދާ މިމުބާރާތަކީ މުލީކޮޅު ރާޅުގަނޑުގެ ނަމުގައި ބާއްވާ މުބާރާތެކެވެ. މުބާރާތުގެ އޯޕަން ބައިގެ ފިރިހެން ޑިވިޒަންގައި 32 ރާޅާ އެޅުންތެރިން ވާދަކުރިއެވެ. އަދި ޖޫނިއާ ބައިގައި 16 ރާޅާ އެޅުންތެރިން ވާދަކުރިއެވެ.

މުބާރާތުގެ ކުއާޓާ ފައިނަލަށް ދަތުރުކޮށްފައިވަނީ މިދިޔަ އަހަރުގެ ގައުމީ ޗެމްޕިއަން ހޫދުގެ އިތުުރުން ޤައުމީ ސާފަރު ނަޖާހު މުހައްމަދާއި ޖިނާން އަހުމަދެވެ. މި މުބާރާތުގައި ވާދަކުރި ރާއްޖޭގެ އެންމެ މޮޅު ސާފަރު އިސްމާއިލް ރަޝީދު (ސްމައިލީ) ވަނީ މުބާރާތުން ކަޓައިފައެވެ. އޭނާ ކަޓާފައިވަނީ ހަތަރު ވަނަ ބުރުންނެވެ.

ޤައުމީ ޗެމްޕިއަން ހޫދު ކުއާޓާއަށް ދަތުރުކުރީ މުލީ އައިހަމް އަދުނާންގެ މައްޗަށް ކުރި ހޯދައިގެންނެވެ. ކުއާޓާއަށް ނަޖާހު ދަތުރުކުރީ މުއީން އިބްރާހީމްގެ ބޮލަށް ލިބުނު އަނިޔާއެއްގެ ސަބަބުން މުބާރާތުގައި ކުރިއަށް ނުދެވުމުންނެވެ. ނަޖާހު ވާދަކުރަން ޖެހުނީ މުއީންއާއެވެ. އަދި ޖިނާނު ކުއާޓާއިން ޖާގަ ހޯދީ އަހުމަދު އަޒަންގެ މައްޗަށް ކުރި ހޯދައިގެންނެވެ.

ދެން އޮތް އަނެއް ކުއާޓާގައި ވާދަކުރާނީ މުހައްމަދު ފަޔާޒްް، އަހުމަދު އާގިލް (އައްމަޑޭ)ގެ އިތުރުން ޖައިލަމް ނިޒާރުއެވެ. މުބާރާތުގެ ކުއާޓާ ފައިނަލްގެ ހީޓުތަކާއި ސެމީ ފައިނަލްގެ ހީޓުތައް އޮތީ މިއަދުއެވެ. ކުއާޓާގައި ވާދަ ކުރާ 6 ރާޅާ އެޅުންތެރިންގެ ތެރެއިން ސެމީއިން ޖާގަ ލިބޭނީ ހަަތަރު ރާޅާ އެޅުންތެރިންނަށެވެ.

މޯލްޑިވްސް ސާފިން އެސޯސިއޭޝަނުން ނިންމާފައިވަނީ ޤައުމީ ސާފް ލީގު މި އަހަރު ރާއްޖޭގެ އެކި ކަންކޮޅުތަކުގައި ބޭއްވުމަށެވެ. އެގޮތުން ފަސް ސަރަހައްދެއްގައި މުބާރާތް ބާއްވަން ނިންމައި، ފުރަތަމަ މުބާރާތް ބޭއްވި ގދ. ގައްދޫގައެވެ. މުލީގައި ކުރިއަށް ދަނީ ދެ ވަނަ މުބާރާތެވެ. ތިން މުބާރާތް ބޭއްވުމަށް ތާވަލްކޮށްފައި އޮތި ޖުލައި 5-9 އަށް ރ.ކިނޮޅުހުގައެވެ. ހިންމަފުށީގައި ހަތަރު ވަނަ މުބާރަތް ކުރިއަށް ގެންދާނީ އޮކްޓޫބަރު 4-8 އަށެވެ. އަދި ފަސް ވަނަ މުބާރާތް ކުރިއަށް ގެންދާނީ މާލޭގައެވެ. ރަންނަމާރި ޗެލެންޖުގެ ނަމުގައި މާލޭގައި މުބާރާތް އޮންނާނީ ނޮވެމްބަރު 18-25 އަށެވެ.