އިންޓަރ އޮފީސް ބެޑްމިންޓަން ޗެމްޕިއަންޝިޕް: ޗެމްޕިއަންކަން އެމްޓީސީސީ އާއި ކަސްޓަމްސް އަށް

ސަރުކާރު އޮފީސް އަދި ކުންފުނިތަކަށް ހުޅުވާލައިގެން ބޭއްވި ފަސްވަނަ ބެޑްމިންޓަން ޗެމްޕިއަންޝިޕްގެ ފިރިހެން ޑިވިޝަނުގެ ޗެމްޕިއަންކަން އެމްޓީސީސީ ހޯދިއިރު، އަންހެން ޑިވިޝަނުގެ ޗެމްޕިއަންކަން ކަސްޓަމްސް ހޯދައިފި އެވެ.

މި މުބާރާތުގެ ފިރިހެން ބައިގައި 13 ޓީމެއް ވާދަކުރިއިރު، މި ބައިގެ ކުޅުން ކުރިއަށް ގެންގޮސްފައިވަނީ 4 ގްރޫޕަކަށް ބަހާލައިގެންނެވެ. ފިރިހެން ބައިގެ ޗެމްޕިއަންކަން އެމްޓީސީސީ ހޯދީ ހޯމަ ދުވަހުގެރޭ ކުޅިވަރު އެކުވެނި ބެޑްމިންޓަން ހޯލުގައި ކުޅުނު ފައިނަލް މެޗުގައި އެމްއެންޑީއެފްއާ ވާދަކޮށް 20-13 ޕޮއިންޓުން މޮޅުވެގެންނެވެ.

މި ފައިނަލްގެ ޑަބަލްސް ފުރަތަމަ މެޗުން އެމްޓީސީސީގެ މުހައްމަދު އަޖުފާން ރަޝީދާއި ޔޫސުފް ނިޔާޒްގެ ޕެއާ ބަލިވި ނަމަވެސް، ސިންގަލްސް ފުރަތަމަ މެޗުން އަޖުފާން ވަނީ އަހުމަދު ސޮބާހު އަތުން މޮޅުވެފައެވެ. އޭގެ ފަހުން ކުޅުނު ޑަބަލްސް ދެވަނަ މެޗާއި ސިންގަލްސް ދެވަނަ މެޗުންވެސް އެމްޓީސީސީގެ ކުޅުންތެރިން ވަނީ ބަލިވެފައެވެ. އެކަމަކު ޑަބަލްސް އަނެއް ދެ މެޗާއި ސިންގަލްސް ތިންވަނަ މެޗު ކާމިޔާބުކޮށް އެމްޓީސީސީން ވަނީ ޗެމްޕިއަންކަން ހޯދާފައެވެ.

މި މުބާރާތުގެ އަންހެން ބައިގައި 8 ޓީމެއް ވާދަކުރިއިރު، މި ބައިގެ ކުޅުން ކުރިއަށްދިޔައީ 2 ގްރޫޕަކަށް ބަހާލައިގެންނެވެ. އަންހެން ބައިގެ ޗެމްޕިއަންކަން ކަސްޓަމްސް ހޯދީ ހޯމަ ދުވަހުގެރޭގެ ފައިނަލް މެޗުގައި އެމްއޭސީއެލްއާ ވާދަކޮށް 19-10 ޕޮއިންޓުން މެޗު ކާމިޔާބުކޮށްގެންނެވެ.

ފައިނަލްގެ ޑަބަލްސް ފުރަތަމަ މެޗުގައި ކަސްޓަމްސްގެ އާމިނަތު ނަބީހާ އާއި އާމިނަތު އިރުފާގެ ޕެއާ މޮޅުވިއިރު، ދެވަނައަށް ކުޅުނު ސިންގަލްސް ފުރަތަމަ މެޗުން ކަސްޓަމްސްގެ އާމިނަތު ޒީނާ ވަނީ އެމްއޭސީއެލްގެ ނަބާހާ އަތުން ބަލިވެފައެވެ. ޑަބަލްސް ދެވަނަ މެޗުން ކަސްޓަމްސްގެ ނަބީހާ އާއި އާމިރާ ދޮއްތުގެ ޕެއާ މޮޅުވި ނަމަވެސް، ސިންގަލްސް ދެވަނަ މެޗުން ކަސްޓަމްސްގެ އައިޝަތު ޔަޝްފާ ވަނީ އެމްއޭސީއެލްގެ ފިރުޝާނާ ނަސީރު އަތުން ބަލިވެފައެވެ. ފައިނަލް މެޗު ކަސްޓަމްސްއިން ކާމިޔާބުކުރީ ޑަބަލްސް ތިންވަނަ މެޗާއި ސިންގަލްސް ތިންވަނަ މެޗުން މޮޅުވެގެންނެވެ.