ގަސްތުގައި ކުޑަކުދިން ރޮއްވުން އެއީ މަޖާ ކަމެއް ނޫން
އެއްވެސް ކަމަކާ ނުލައި ކުޑަކުދިން ރޮއްވުމަކީ އާންމުކޮށް މި މުޖުތަމައުން ފެންނަ ކަމެއް
ކުޑަކުދިންތަކެއް މޫދުގައި މަޖާކުރަނީ
ކޮންމެ ކުއްޖަކުވެސް ހެދި ބޮޑުވަމުން އަންނަ އަހަރުތަކަކީ އެކުއްޖާގެ ހަޔާތުގެ އެންމެ މުހިންމު އަހަރުތަކޭ މީހުން ބުނެއެވެ. އެއީ ސަބަބެއް ނެތިއެއް ނޫނެވެ. ކުޑައިރު އެކުއްޖާ ތަރުބިއްޔަތު ކުރެވޭ ގޮތަކުން އެ ބިނާކުރެވެނީ އެ ކުއްޖާގެ ކުރިމަގެވެ. މިފަދަ މުހިންމު ކަމެއްގެ ބިންގާ އެޅިގެންދާ އުމުރެއްގައި ކުދިންނަށް ފެންނަ ކަންކަމުންނާއި، ތަޖުރިބާ ކުރެވޭ ކަންކަމުން އެކުދިންގެ ދިރިއުޅުމާއި ކުރިމަގު ބަދަލުކޮށްލައެވެ. އެ އުމުރަކީ އެހާވެސް މުހިންމު އުމުރެކެވެ.
މައުސޫމް ތުއްތު ކުދިންނަކީ އެހާވެސް ލޯބި ދީގެން ބަލާ ބޮޑުކުރަންޖެހޭ ބައެކެވެ. އެހެންނަމަވެސް އެ އުމުރުގައި ބޮޑެތި މީހުންނަށް ހެދޭ ބައެއް ގޯސްތައް ހުރެއެވެ. މީގެތެރޭގައި އެކުދިންގެ ނަފްސާނީ ދުޅަހެޔޮކަމަށް އަސަރުކުރާ ކަންކަން ހުރެއެވެ. ދާދި ފަހުން ސޯޝަލް މީޑިއާއިން ފެނުނު ޕޯސްޓެއްގައި މީހަކު ބުނެފައިވާ ބުނުމަކަށް ބަލާލާނަމެވެ. އެ ޕޯސްޓުގައި ވަނީ "ކުޑަކުދިން ރޮއްވުން މިއީ މަޖާ ކަމެއް" މިހެންނެވެ.
މި ޕޯސްޓުގައި ބުނެފައި އޮތް ބުނުން އެއްބަޔަކަށް ވީ މަޖާ ބުނުމަކަށެވެ. އެކަމަށް ތާއީދުކޮށް ހީ ހެދިއެވެ. އެހެންނަމަވެސް މިއީ ކިހާ ނުރަނގަޅު ކަމެއްކަން އެނގޭ މީހުން އެ ބުނުމާ ދެކޮޅަށް ތެދުވިއެވެ. މިއީ އާންމުކޮށް ހުރިހާ މުޖުތަމައަކުންވެސް ފެންނަ މަންޒަރެކެވެ. ގަސްތުގައި އެކުދިން ރުޅިއަރުވައި ރޮއްވައި ހަދަނީ އެކަމުން އެކުދިންގެ މުސްތަޤުބަލަށް ކުރާނެ އަސަރާމެދު އެއްވެސް ވަރަކަށް ވިސްނާލުމެއް ނެތިއެވެ.
މިކަމާއި ގުޅިގެން "ރާއްޖެއެމްވީ" އާ ވާހަކަދެއްކި ޗައިލްޑް އެންޑް ފެމިލީ ޕްރޮޓެކްޝަން ސަރވިސްގެ ސައިކޮލޮޖިސްޓެއް ކަމަށްވާ މަރިޔަމް ޝަހުނާ ވިދާޅުވީ އެއްވެސް ކަމަކާ ނުލާ ކުޑަކުދިން ރޮއްވުމަކީ އާންމުގޮތެއްގައި މި މުޖުތަމައުން ފެންނަ މަންޒަރެއް ކަމަށެވެ. އެކުދިން ރުޅިއެރުވުމާއި، ލަދުގަންނަވާލުމާއި، އެކުދިން ރޯން ފެށުމުން އެކަމާ އެކުދިންނާ ދިމާކުރާކަން ފާހަގަކުރެވޭކަމަށެވެ. އަދި މިކަން ކުރަނީ ބޮޑެތި މީހުން "މަޖާކޮށްލުމަށް" ކަމަށް ޝަހުނާ ވިދާޅުވިއެވެ. އާންމުގޮތެއްގައި މިކަން ލޭބަލްކުރެވިފައިވަނީ އެއިން އެއްވެސް ނޭދެވޭ އަސަރެއް ނުކުރާނެ ކަމެއްގެ ގޮތުގައި ކަމަށް އޭނާ ވިދާޅުވިއެވެ.
އެހެންނަމަވެސް ބޮޑެތި މީހުން ހިތްހަމަޖައްސާލައި މަޖާކޮށްލުމަށް މިކުރާ ކަމުގެ ނޭދެވޭ އަސަރު ކުޑަކުދިންނަށް ކުރެއެވެ. މިފަދަ ކަންކަން ތަކުރާރުކޮށް ކުރުމުގެ ސަބަބުން އެކުދިން އަބަދު ރުޅިއައުން ފަދަ ކަންކަން ފާހަގަކުރެވިފައިވާކަމަށް ޝަހުނާ ވިދާޅުވިއެވެ. ޝަހުނާ ވިދާޅުވީ އާންމުގޮތެއްގައި އެކުދިން ރުޅި އިސްކުރަނީ އެކުދިންނަށް އެކަމުން ފުރަތަމަ ކުރާ އިހުސާސްތައް ފޮރުވުމަށް ކަމަށެވެ. އެކުދިން އެހެން މީހުންނަށް ދައްކަން ބޭނުންނުވާ އިހުސާސްތަކުގެ ތެރޭގައި ލަދުގަތުމާއި، ގޮތްހުސްވުމާއި، އެކަނިވެރިވުމާއި، އެކަމާ ހިތްހަމަނުޖެހުމާއި، އެކަމާ ކުރެވޭނެ އިތުރު ކަމެއް ނެތް ކަމުގެ އިހުސާސް ކުރެވުން ހިމެނެއެވެ. އެކަމާ ރުޅިއަންނަ ހިސާބަށްދަނީ މި އިހުސާސްތައް ފޮރުވުމަށެވެ.
މިއީ މިއަދު އަހަރުމެން އެންމެންވެސް ވިސްނާލަން ޖެހިފައިވާ ކަމެކެވެ. ބޭކާރު ގޮތުގައި ކުޑަކުދިން ރޮއްވުމާއި، ރުޅިއެރުވުން ފަދަ ކަންކަމަކީ އެކަމުގެ ނޭދެވޭ އަސަރު އެކުއްޖާގެ މުޅި ދިރިއުޅުމަށް ކުރާނެ ކަމެކެވެ. މިކަންކަމުގެ ސަބަބުން އެކުއްޖާ ބޮޑުވެގެން އަންނަނީ ރުޅިގަދަ މީހެއްގެ ގޮތުގައެވެ. ރުޅި ކޮންޓްރޯލްކުރަން އުނދަގޫ މީހެއްގެ ގޮތުގައެވެ. ކަމަކާ ނުލައި ކުޑަކުދިން ރޮއްވައި ރުޅިއެރުވުމަކީ އެއްވެސް ވަރަކަށް މަޖާ ކަމެއް ނޫނެވެ.
