އެއީ ޖާދުލެއް ނޫން، އަސްލު ނަތީޖާ!

މިހާރު ދައްކަނީ ޖާދޫ ގަލަމެއްގެ ވާހަކަ އެވެ. ކަރުދާހުގެ ފާހަގަ ވެއްޓޭ ވާހަކަ އެވެ. މޮޅު އަނގޮޓިއެއްގެ ވާހަކަ އެވެ. މި ވާހަކަތަކަށް އިޝާރަތް ކުރައްވައި ގުޅިފައިވާ ޕާޓީތަކުގެ ފަރާތުން އެ މައްސަލައިގައި ކޯޓަށް ހާޒިރުވެވަޑައިގަންނަވާ ގާނޫނީ ވަކީލް ހިސާން ހުސައިން ވިދާޅުވި ގޮތުގައި މިހާރު މަދުވަނީ އަލާއުއްދީނުގެ ޖާދޫގެ މުސައްލަ އެވެ. ހިސާންގެ ވާހަކަ އަށް ބައެއް އެހެން ތަކެތި ވެސް އިތުރުކޮށްލަން ރަނގަޅެވެ. ޖާދޫގެ ފިހިގަނޑާއި، ޖާދޫގެ ކުރައެވެ.

ޖާދޫގެ މުސައްލަ އާއި ފިހިގަނޑު ބޭނުންކުރީ ގުޅިފައިވާ ޕާޓީތަކުގެ މީހުން އެއް ފޮށިން އަނެއް ފޮއްޓަށް ވޯޓުލާން ދިއުމަށް ކަމަށް ބުނެވިދާނެ އެވެ. މަރުވެފައިވާ މީހުންގެ ސިފަ ސިފައިގައި، އަދި ވޯޓުލުމަށް ހާޒިރު ނުވާހެން ހީވާ ކޮންމެ މީހެއްގެ ސިފައިގައި ޖާދޫގެ ކުރައިން ސޫރައެއް ނުކުމެ ވޯޓުލި ކަމަށް ބުނެ ވާހަކަ ދެއްކި ދާނެ އެވެ. ނުފެންނަ ހެދުމުގައި ބަޔަކު ގޮސް ވޯޓުލި ކަމަށް ބުނެވިދާނެ އެވެ. އެކަމުގެ ހެއްކަކަށް ހުޅުމާލޭ ފޮއްޓެއްގައި 25 ވޯޓު ކަރުދާސް އިތުރުވި މައްސަލަ ނަގަންވީ ނޫންތޯ އެވެ.

ބައެއްގެ ބުއްދިއަށް ގަބޫލު ނުކުރެވުނަސް ވާހަކަ ދެއްކި ދާނެ ނޫންތޯ އެވެ. މި އުޅެނީ ހިޔާލީ ވާހަކަތަކެއް ކިޔައިދޭކަށް ނޫނެވެ.

އިންތިޚާބުގައި ދެ ކެންޑިޑޭޓުން ވާދަކުރެއްވިއިރު، އެ އިންތިޚާބު އޮބްޒާވްކުރަން ކިތައް ލޯ ހުރިކަން އެނގޭ ހެއްޔެވެ؟ އޮބްޒާވްކުރަން 2610 މީހުން ތިބިއިރު، މޮނިޓަރުންގެ އަދަދަކީ 3329 އެވެ. އަދި ކޮންމެ ކެންޑިޑޭޓެއްގެ 472 މަންދޫބުން ތިއްބެވެ. އެހެންވެ، އިންތިޚާބުގައި ކަން ހިނގަމުންދިޔަ ގޮތް ބެލުމަށް ޖުމުލަ 6883 މީހުން ތިއްބެވެ.

އޮބްޒާވަރުންގެ ގޮތުގައި ޕީޕީއެމްއާއެކު ކޯލިޝަން ހަދާފައިވާ އެމްޑީއޭގެ 468 އޮބްޒާވަރުންނާއި ޑީއާރުޕީގެ 509 އޮބްޒާވަރުން އަދި ޕީޕީއެމްގެ 372 އޮބްޒވަރުން ހަރަކާތްތެރިވި އެވެ. އެމްޑީޕީގެ އޮބްޒާވަރުންގެ އަދަދަކީ، 414 އެވެ.

އިންތިޚާބު މިނިޓަރކުރަން 3329 މީހުން ހަރަކާތްތެރިވިއިރު، އެންމެ ގިނައީ ދައުލަތުގެ މީޑިއާ މޮނިޓަރުންނެވެ. ޗެނަލް13 ގެ މޮނިޓަރުންގެ އަދަދު ވެސް މަދެއް ނޫނެވެ.

އޮބްޒާވަރުންނާއި މޮނިޓަރުންނާއި މަންދޫބުންގެ އިތުރުން، ފޮށިތައް ކައިރީގައި ތިބި އިލެކްޝަންސް ކޮމިޝަންގެ އޮފިޝަލުންގެ ލިސްޓްގައި ވެސް ގިނައީ ޕީޕީއެމް އަށް ނިސްބަތްވާ މީހުންކަމަށް ބުނެ އެވެ. އެ ލިސްޓް ފޮނުވީ ކޮން ބައެއްކަން އެނގޭނެ އެވެ.

އެ އެންމެންގެ ލޯމަތީގައި، އެބުނާވަރުގެ ގޯސްތަކެއް ހަދައިފި ނަމަ އެ އޮބްޒާވަރުންނާއި މޮނިޓަރުންނަށް އަދި އޮފިޝަލުންއަށް ވެސް އެ ކުރެވެނީ މަލާމާތެކެވެ. އިންތިޚާބުގެ އަދަދުތަކަށް ބަލާއިރު، ޕީޕީއެމް އިން އެ ދައްކާ ވާހަކަތަކަކީ ހަގީގަތެއް ނަމަ، މިފަހަރުގެ އިންތިޚާބަކީ ފަހުގެ އަޖައިބުގެ ތެރެއިން އަޖައިބަކަށް ނުވާނެތޯ އެވެ. ނަމަވެސް އެއީ ޖާދޫއެއް ނޫނެވެ. ނަތީޖާއަކީ އަސްލެކެވެ. މި ބަޔާންކުރި އަދަދުތަކުން އެކަނި ވެސް އެކަން އެނގޭނެ އެވެ.

ރައީސް ޔާމީނު އެވެ. އިންތިޚާބުގެ ނަތީޖާ ގަބޫލުކުރެއްވުމަށް ފަހު ހިޔާލީ ވާހަކަތަކެއް ދައްކައިގެން ލިބޭނެ މޮޅަކީ ކޮބައިތޯ އެވެ. އިންތިޚާބު ބާތިލުކޮށްގެން މަނިކުފާނަށް އިންތިޚާބު އަލުން ކާމިޔާބު ކުރެވިދާނެ ކަމަށް ގަބޫލުކުރަނީ ކިތައް މީހުންތޯ ބައްލަވާލައްވާށެވެ. އަދިވެސް މަނިކުފާނާއި މަނިކުފާނުގެ ކައިރީގައި ތިބި ބައެއް ބޭފުޅުންނަށް ތިޔަ ފެންނަނީ އަވާ މެންދުރެވެ.