މިންތީގެ ހަމަހަމަކަން ގާއިމްކުރުމަށް ކުރާ މަސައްކަތް ސްކޫލް ކަރިކިއުލަމްގައި ހިމަނަން ޖެހޭ - ޒިފްލީނާ
މައުލޫމާތު ދިނުމަށް ފިރިހެނުންނަށް ޚާއްސަ ޕްރޮގްރާމްތަކެއް މިނިސްޓްރީން ވަނީ ފަށާފައި
މިނިސްޓަރ އޮފް ސްޓޭޓް ފޮރ ޖެންޑަރ، ފެމިލީ އެންޑް ސޯޝަލް ސަރވިސަސް ޒިފްލީނާ ހަސަން
މިންތީގެ ހަމަހަމަކަން ގާއިމްކުރުމަށް ކުރާ މަސައްކަތް ސްކޫލް ކަރިކިއުލަމްގައި ހިމަނަން ޖެހޭ ކަމަށް މިނިސްޓަރ އޮފް ސްޓޭޓް ފޮރ ޖެންޑަރ، ފެމިލީ އެންޑް ސޯޝަލް ސަރވިސަސް ޒިފްލީނާ ހަސަން ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ބައިވެރިވެވަޑަައިގެން ވާހަކަފުޅުދައްކަވަމުން ޒިފްލީނާ ވިދާޅުވީ، ބަދަލު ގެނައުމަށް އެންމެ ފުރަތަމަ އާއިލާ ތެރެއިން ކުޑަކުދިން މިކަމަށް ހޭލުންތެރި ކުރުވަން ޖެހޭ ކަމަށާއި، ސްކޫލްތަކުގެ ޒިންމާވެސް މިކަމުގައި ބޮޑުކަމަށް ޤަބޫލުކުރައްވާ ކަމަށެވެ. ޒިފްލީނާ ވިދާޅުވީ، ރަނގަޅު މުޖުތަމައެއް ބިނާ ކުރުމަށްޓަކައި ޅަދަރިންގެ ކިބައިގައި މި އާދަ ހަރުލައްވަން ޖެހޭ ކަމަށެވެ.
މިއީ ކުއްލިއަކަށް ގެނެވޭނެ ބަދަލެއް ނޫން ކަމަށާއި، ދެވޭ ތަމްރީނުތަކާ ދެވޭ މެސެޖްތަކުން ހެޔޮ ބަދަލެއް ކައިރި މުސްތަޤްބަލެއްގައި ފެންނަން ފަށާނެ ކަމަށް އުންމީދު ކުރައްވާ ކަމަށް ވިދާޅުވިއެވެ. މިހާރުވެސް ބަދަލު އަންނަތަން ކޮންމެވެސް ވަރަކަށް ފެންނަކަން ޒިފްލީނާ ފާހަގަކުރެއްވިއެވެ.
ޒިފްލީނާ ވިދާޅުވީ، ބަދަލުކުރަންޖެހޭ ބައެއް އާދަތައް އެބަހުރި ކަމަށާއި، އެކަންތަކުގެ މައުލޫމާތު ދިނުމަށް ފިރިހެނުންނަށް ޚާއްސަ ޕްރޮގްރާމްތަކެއް މިނިސްޓްރީން ފަށާފައިވާ ކަމަށެވެ. އެ ޕްރޮގްރާމް ވަރަށް ކާމިޔާބުކަމަށްވެސް ވިދާޅުވިއެވެ. ވަކި ޖިންސަކަށް ވީތީ ނުކުރެވޭނެ ކަމަށް ޒަމާނުއްސުރު ޤަބޫލުކުރެވިފައި ހުރި ކަންކަން ބަދަލު ކުރަން ޖެހޭ ކަމަށާއި، ޕްރޮގްރާމްތަކުގެ މައިގަނޑު ބޭނުމަކީ، އާއިލާގެ ތެރޭގައި ކޮންމެ ޒިންމާއެއްގައިވެސް ދެބައި މީހުންގެ ހިއްސާ ބުނެދިނުން ކަމަށް ޒިފްލީނާ ވިދާޅުވިއެވެ.
މިހާރު މާލޭގައި މިފަދަ ޕްރޮގްރާމްތައް ހިންގި ނަމަވެސް އަތޮޅުތެރޭގައިވެސް ޕްރޮގްރާމްތައް ހިންގުމަށް ރޭވިފައިވާކަމަށް އޭނާ ވިދާޅުވިއެވެ.
