ޕެޓްރޯލް ލިބެންދެން ކައިރި ހޮޓަލެއްގައި ހުރެވޭނެ އިންތިޒާމް ހަމަޖައްސައިދޭން ބައެއް އެމްޕީން އެދިއްޖެ
19 މެއި 2022 | ބުރާސްފަތި 15:41އެމްޕީންވެސް ޕެޓްރޯލް ބޭނުންނަމަ އާންމު އެހެން މީހުންނެކޭ އެއްގޮތަަށް ކިއުގައި ޖެހިގެން އެކަން ކުރުމަށް ސިލޯން ޕެޓްރޯލިއަމް ކޯޕަރޭޝަނުން ވަނީ ބުނެފައި
ލަންކާގެ މަޖިލީހުގެ ރައީސް މަހިންދަ ޔަޕަ އަބޭވަރްދަނަ
ޕެޓްރޯލް ލިބެންދެން މަޖިލީހާ ކައިރި ހޮޓަލެއްގައި ތިބެވޭނެ އިންތިޒާމުތައް ހަމަޖައްސައިދިނުމަށް ލަންކާގެ މަޖިލީހުގެ ބައެއް މެމްބަރުން އެދިފައިވާކަމަށް މަޖިލީހުގެ ރައީސް މަހިންދަ ޔަޕަ އަބޭވަރްދަނަ ވިދާޅުވެއްޖެއެވެ.
ލަންކާގައި ޕެޓްރޯލް މަދުވުމާ ގުޅިގެން އެގައުމުގެ ރައްޔިތުންނަށް މިހާރު ވަނީ ޕެޓްރޯލް ގަންނަން ކިއުގައި ޖެހުމަށް މަޖުބޫރުވެފައެވެ. އެގައުމަށް ޕެޓްރޯލް ގަންނަން ބޭނުންވާ ފައިސާ ނުލިބުމުގެ ސަބަބުން ޕެޓްރޯލްގެ ސަޕްލައި ހުސްވި ނަމަވެސް، އައު ޝިޕްމެންޓެއް ގައުމަށް އެތެރެކޮށް ރައްޔިތުންނަށް ފޯރުކޮށްދެވޭކަށް ނެތެއެވެ.
މީގެ ސަބަބުން މެމްބަރުންނަށްވެސް ވަނީ ޕެޓްރޯލް ނުލިބުމުގެ މައްސަލައާ ކުރިމަތިލާން ޖެހިފައެވެ. އެހެންކަމުން ދަތުރުފަތުރުކުރުމަށް ދިމާވާ ގޮންޖެހުންތަކުގެ ސަބަބުން އެ މެމްބަރުންނަށް މަޖިލީހަށް ހާޒިރުވުމަށް އުނދަގޫ ކަމަށާއި، އެހެންކަމުން ފަސޭހައިން ޕެޓްރޯލް ލިބޭނެ އިންތިޒާމަކާއި މައްސަލަ ހައްލުވަންދެން ކައިރި ހޮޓަލެއްގައި ހުރެވޭނެ އިންތިޒާމުތައް ހަމަޖައްސައިދިނުމަށް ވަނީ އެދިފައެވެ.
ލަންކާގައި މަޖިލިސް މެމްބަރުންނަށާއި ސަރުކާރުގެ އިސްފަރާތްތަކަށް ޚާއްސަ އުސޫލެއްގެ ދަށުން ޕެޓްރޯލް ފޯރުކޮށްދޭ ކަމަށާއި، ޚާއްސަ އަގެއްގައި ޕެޓްރޯލް ފޯރުކޮށްދޭކަމަށް ބުނެ ދެކެވޭ ވާހަކަތަކާ ގުޅިގެން ސިލޯން ޕެޓްރޯލިއަމް ކޯޕަރޭޝަނުން ވަނީ އެކަން ދޮގުކޮށްފައެވެ. އަދި އެމްޕީންވެސް ޕެޓްރޯލް ބޭނުންނަމަ އާންމު އެހެން މީހުންނެކޭ އެއްގޮތަަށް ކިއުގައި ޖެހިގެން އެކަން ކުރުމަށް އެކޯޕަރޭޝަނުން ވަނީ ބުނެފައެވެ.
