ފައްޔާޒުގެ ކާމިޔާބީއަށް އެމްޑީޕީން ރަސްމީކޮށް މަރުހަބާދަންނަވައިފި
ޗެއަރޕަރސަން ހޮވުމަށް ބޭއްވި އިންތިޚާބު ކާމިޔާބުކުރެއްވީ މިނިސްޓަރ ފައްޔާޒު
އެމްޑީޕީގެ ޗެއަރޕަރސަންގެ މަގާމުގެ ކެމްޕޭނު ރަސްމީކޮށް ލޯންޗުކުރުން، ފައްޔާޒު އިސްމާއީލް
އެމްޑީޕީގެ ޗެއަރޕަރސަން ހޮވުމަށް މިމަހުގެ 14 ވަނަ ދުވަހު ބޭއްވި އިންތިޚާބު ކާމިޔާބުކުރެއްވި އިކޮނޮމިކް މިނިސްޓަރ ފައްޔާޒް އިސްމާއީލްއަށް އެޕާޓީން މަރުހަބާދަންނަވައިފިއެވެ.
މިއީ މިނިސްޓަރ ފައްޔާޒަށް އެމްޑީޕީން ރަސްމީކޮށް މަރުހަބާދެންނެވި މިއީ ފުރަތަމަ ފަހަރެވެ. މީގެ ކުރިން އެމްޑީޕީގެ ރައީސް މުހައްމަދު ނަޝީދު ހިމެނިވަޑައިގަންނަވާހެން ޕާޓީގެ ވަކި ވަކި މެމްބަރުން ވަނީ މިނިސްޓަރ ފައްޔާޒަށް މަރުހަބާ ކިޔާފައެވެ.
ރައީސް މުހައްމަދު ނަޝީދު ވަނީ ފައްޔާޒް އެމްޑީޕީގެ ޗެއަރޕަރސަންގެ މަގާމުގައި ހުންނަވައި އެމްޑީޕީއަށް އިތުރު ކާމިޔާބީތައް ހޯއްދަވައިދެއްވާނެކަމާމެދު ޝައްކުނުކުރައްވާކަމަށް ވިދާޅުވެފައެވެ.
މި އިންތިޚާބުގައި މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ (އިންތި)އާ ވާދަކުރައްވައި 7000އަށްވުރެ ގިނަ ވޯޓުގެ ތަފާތަކުން މިނިސްޓަރ ފައްޔާޒް ވަނީ އިންތިޚާބު ކާމިޔާބުކުރައްވާފައެވެ. އިންތިޚާބުގައި ޗެއަރޕަރސަން ކަމަށް ވާދަކުރެއްވީ އެމްޑީޕީގައި މިހާރު އުފެދިފައިވާ ދެ ފެކްޝަނުންނެވެ. އެހެންކަމުން ކެމްޕެއިންގެ ތެރޭގައި ފެނިގެންދިޔައީ ވާދަވެރިކޮށް ދެ ފަރާތުންވެސް ބަހުގެ ހަމަލާތައް ދެމުން ދިޔަތަނެވެ.
ފައްޔާޒް އިންތިޚާބު ކާމިޔާބުކުރެއްވުމުން އިންތި ވަނީ ފައްޔާޒަށް މަރުހަބާ ދަންނަވާފައެވެ. ދެގޮތެއްނުވެ ޕާޓީގައި ދެމިހުންނަވާނެކަމަށް އިންތި ވަނީ ވިދާޅުވެފައެވެ. އިންތިޚާބުތެރޭގައި ވާދަވެރިކަން އުފެދިފައިވީނަމަވެސް ޕާޓީގެ ލާބައަށް މަސައްކަތްކުރައްވާނެ ކަމަށް ފައްޔާޒް ވަނީ ވިދާޅުވެފައެވެ. ޕާޓީގެ އެންމެ އިސް ލީޑަރު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ޕާޓީގެ ރައީސް ރައީސް މުހައްމަދު ނަޝީދާއެކު ޕާޓީގެ އިދާރީ ކަންކަން މިހާރަށްވުރެ ހަރުދަނާކުރައްވައި، ޕާޓީގެ ހަރަކާތްތައް މުޅި ރާއްޖޭގައި ހިންގޭނެ ގޮތަކަށް ކަންކަން އިންތިޒާމުވެ ތަންފީޒުކުރެއްވުމަށް އިސްކަންދެއްވާނެކަމަށް ފައްޔާޒު ވިދާޅުވިއެވެ. މަގާމާ ހަވާލުވެވަޑައިގަންނަވާ ދުވަހުން ފެށިގެން އެމަސައްކަތް ކުރައްވަން ފައްޓަވާނެކަމަށް ފައްޔާޒު ވަނީ ވިދާޅުވެފައެވެ.
