މި ސީޒަން ނިމުމަށްފަހު ރެއާލް މެޑްރިޑަށް ކުޅެމުން އަންނަ ވޭލްސްގެ ކެޕްޓަން ގަރެތު ބޭލް އެ ޓީމު ދޫކޮށްލަން ނިންމާފައިވާ ކަމަށް މީޑިއާ ރިޕޯޓުތައް ބުނެފިއެވެ.

ޓޮޓެންހަމުން 2013 ވަނަ އަހަރު ބޭލް ވަނީ ރެއާލަށް ބަދަލުވެފައެވެ. އޭރު ބޭލް ރެއާލަށް ބަދަލުވީ ރެކޯޑު އަގަކަށެވެ. އެއީ 100 މިިލިއަން ޔޫރޯއަށެވެ. ރެއާލަށް ބަދަލުވި ފަހުން ބޭލް ވަނީ އެ ޓީމަށް 176 މެޗު ކުޅެދީ 81 ލަނޑު ޖަހާފައެވެ. ބޭލް ވަނީ ރެއާލާއެކު ސްޕެނިޝް ލަލީގާ ތިން ފަހަރު ކާމިޔާބުކޮށްފައެވެ. މީގެ އިތުރުން ކޮޕާ ޑެލްރޭ އާއި ސްޕެނިޝް ސުޕަ ކަޕް އެއް ފަހަރު ހޯދާފައިވެއެވެ. އަދި ޔުއެފާ ޗެމްޕިއަންސް ލީގު ހަތަރު ފަހަރު ހޯދިއެވެ. ޔުއެފާ ސުޕަ ކަޕާއި ފީފާ ކުލަބް ވޯލްޑް ކަޕް ތިން ފަހަރު ހޯދިއެވެ.

އޭގެ ފަހުން 2020 ވަނަ އަހަރު ބޭލް ވަނީ ލޯނު އެއްބަސްވުމެއްގެ ދަށުން އޭނާ ކުރިން ކުޅުނު ކުލަބް ޓޮޓެންހަމަށް ބަދަލުވެފައެވެ. އޭގެ ފަހުން ޓޮޓެންހަމާއެކު ބޭލް ވަނީ 20 މެޗު ކުޅޭ، އެ ޓީމަށް 11 ލަނޑު ޖަހާފައެވެ. މި ސީޒަނަށްފަހު ބޭލް ރެއާލާއެކު ހަދާފައިވާ އެއްބަސްވުން ހަމަވާއިރު އޭނާ ގެންދިޔުމުގެ ޝައުގުވެރިކަން ނިއުކާސަލްހެ ހުރި ކަމަށް މީޑިއާތަކުގައި ރިޕޯޓުކޮށްފައިވެއެވެ. މި ސީޒަނަށް ފަހު ބޭލް ރެއާލް ދޫކޮށްލާނެ ކަން އޭނާގެ އެޖެންޓު ޖޮނަތަން ބާނެޓާ ހަވާލާދީ ރިޕޯޓުކޮށްފައިވެއެވެ.

ރިޕޯޓުގައިވާ ގޮތުން ރެއާލް ދޫކޮށްލުމަށްފަހު ބޭލް ދިޔުން އެންމެ ގާތީ އޭނާގެ ކުރީގެ ކުލަބް ޓޮޓެންހަމަށެވެ. ޓޮޓެންހަމުގައި އޭރު ބޭލް ވަނީ ތަފާތު މޮޅު ކުޅުމެއް ދައްކާފައެެވެ. އަދި ޓޮޓެންހަމްގެ މިހާރުގެ ކޮޗު އެންޓޯނިއޯ ކޮންޓޭ ޓީމު އިތުރަށް ވަރުގަދަ ކުރަން ބޭނުންވާއިރު، ބޭލް ގެންދިޔުން ވަރަށް ގާތް ކަމަށް ވެސް ރިޕޯޓުގައިވެއެވެ.