ސެންޓްރަލް ޒޯނަށް ތައްޔާރުވާނީ ރާއްޖޭގެ ލޯކަލް މުބާރާތް ވަރުގަދަކޮށްގެން- ރަނޭ

މިއަހަރު ރާއްޖޭގެ ވޮލީބޯޅައިގެ އެންމެ ބޮޑު އަމާޒަކީ ޑިސެމްބަރު މަހު އޮންނަ ސެންޓްރަލް ޒޯން މުބާރާތް ކަމަށާއި, އެކަމަކު މުބާރާތަށް ތައްޔާރުވާން ކުރައްވާނެ އެންމެ ބޮޑު ކަމަކީ ލޯކަލް މުބާރާތްތައް ވަރުގަދަކުރުންކަމަށް ވޮލީބޯޅަ އެސޯސިއޭޝަންގެ ރައީސް މުޙައްމަދު ރަނޭޝް (ރަނޭ) ވިދާޅުވެއްޖެއެވެ.

ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަދައްކަވަމުން ރަނޭ ވިދާޅުވީ ކޭމްޕެއް ގޮސްގެން މެޗުތަކެއް ކުޅުމަށްވުރެ, ރާއްޖޭގެ ލީގު ވަރުގަދަކޮށްގެން ވަރުގަދަ މެޗުތަކެއް ކުޅުމުގެ ފުރުޞަތު ގިނަ ކުޅުންތެރިންނަށް ހޯދައިދެވިއްޖެނަމަ ފައިދާ މާބޮޑުކަން ޓެކްނިކަލް ބޭފުޅުންވެސް ފާހަގަކުރައްވާކަމަށެވެ. ތަފްޞީލް ދެއްވަމުން ރަނޭ ވިދާޅުވީ ކޭމްޕެއް ދާނަމަ ފުރުޞަތު ލިބެނީ މަދު ކުޅުންތެރިންނަށް ކަމަށާއި, ކުޅެން ލިބެނީ ދައްކާލުމުގެ މެޗުތަކެއް ކަމަށެވެ. އޭގެ ބަދަލުގައި ރާއްޖޭގެ ލީގު ވަރުގަދަ ކުރުމުން ގިނަ ކުޅުންތެރިންނަށް ވާދަވެރި ވަރުގަދަ މެޗުތަކެއް ކުޅެން ފުރުޞަތު ލިބޭކަމަށް ރަނޭ ވިދާޅުވިއެވެ.

ރާއްޖޭގެ ލޯކަލް ލީގު ވަރުގަދަކުރަން އަޅާ އެންމެ ބޮޑު ފިޔަވަޅަކީ ޓީމްތަކަށް ބޭރުގެ މޮޅު ކުޅުންތެރިން ދިނުމެވެ. އެގޮތުން މާލީ އެހީތެރިކަމުގެ ބަދަލުގައި ޓެކްނިކަލް ސަޕޯޓެއްގެ ގޮތުން ކޮންމެ ޓީމަކަށްވެސް އިންޑިޔާގެ މޮޅު ކުޅުންތެރިން ދޭނެކަމަށް ރަނޭ ވިދާޅުވިއެވެ. އެކުޅުންތެރިން ނަގަނީ މިހާރު އެކުލަވާލާފައިވާ 18 ކުޅުންތެރިންގެ ޕޫލަކުންނެވެ. ފުރަތަމަ މަރުހަލާގައި ފިރިހެން ޑިވިޝަންގެ ޓީމްތަކަށް އަމާޒުކޮށްގެން އެބަދަލު ގެންނަން އެސޯސިއޭޝަނުން ވަނީ ނިންމާފައެވެ. ދެވަނަ ކަމަކީ މުބާރާތްތައް ކައިރިކައިރީގައި ކުޅެ ބިދޭސީ ކުޅުންތެރިންނާއެކު އެންމެ ބޮޑު ތިން މުބާރާތް ނިންމާލުމެވެ. އެއީ އެސޯސިއޭޝަންކަމާއި, ޤައުމީ ލީގާއި, ޤައުމީ މުބާރާތެވެ. ވޮލީބޯޅަ ކަލަންޑަރު ނިމޭއިރު ކޮންމެ ޓީމަކަށް ވަރުގަދަ 41 މެޗު ކުޅެން ފުރުޞަތު ލިބޭނެކަމަށް ރަނޭ ވިދާޅުވިއެވެ.

މިބަދަލުތަކާއެކު ޑިސެމްބަރު 18 ވަނަ ދުވަހު ރާއްޖޭގައި އޮންނަ ސެންޓްރަލް ޒޯނަށް ވަރުގަދަ ޤައުމީ ޓީމެއް ތައްޔާރުކުރެވޭނެކަމަށް ރަނޭ ޤަބޫލުކުރައްވައެވެ. މިބަދަލުތައް ގެންނާނީ ދިގުލާ ސީޒަނެއްގެ ތެރެއިން ގިނަ ވަރުފަދަ މެޗުތަކެއް ކުޅުމުގެ ފުރުޞަތު ކުޅުންތެރިންނަށް ހޯދައިދީގެންނެވެ.