ކުރިއަށް މިއޮތް މަސްތަކުގައި ކުރިމަތިލާންޖެހޭ ކަންތައްތައް, ފާއިތުވި ދުވަސްތަކުގައި ކުރިމަތިލި ކަންތައްތަކަށްވުރެ ދަތިވާނެކަމަށް ސްރީލަންކާގެ ބޮޑުވަޒީރު ރަނިލް ވިކްރަމަސިންގހަ ވިދާޅުވެއްޖެއެވެ.
ބޮޑުވަޒީރު ވިކްރަމަސިންގހަ މިހެން ވިދާޅުވެފައި ވަނީ ހޯމަ ދުވަހު ގައުމާ މުޚާތަބުކުރައްވައި ދެއްކެވި ވާހަކަފުޅުގައެވެ.
އެގޮތުން ވިކްރަމަސިންގހަ ވަނީ، ކުރިއަށް މިއޮތް ދުވަސްތައް ވެގެންދާނީ ރައްޔިތުން ކުރިމަތިލާންޖެހޭ އެންމެ އުނދަގޫ ދުވަސްތަކަށް ކަމަށާއި، މިކަމަށް ގައުމު ތައްޔާރުވާންޖެހޭކަމަށް ވިދާޅުވެފައެވެ. އަދި މިދުވަސްތަކުން އަރައިގަތުމަށްޓަކައި މިކަންތައްތަކާ ކުރިމަތިލައި، ބައެއް ގުރުބާނީތައްވެސް ވާންޖެހޭނެކަމަށް ވިކްރަމަސިންގހަ ވިދާޅުވިއެވެ.
ބުރާސްފަތި ދުވަހު ލަންކާގެ ބޮޑުވަޒީރުކަމާ ހަވާލުވެވަޑައިގެން ވިކްރަމަސިންގހަ ވަނީ، އެއްވެސް ކަމެއް ރައްޔިތުންނަށް ފޮރުވައި އިތުރުފުޅުހައްދަވަން ބޭނުންފުޅު ނުވާކަމަށް ވިދާޅުވެފައެވެ. މިހާރުގެ ހަގީގަތަކީ ބަލައިގަންނަށް ފަސޭހަ ކަންކަން ނޫންނަމަވެސް މިއީ މިހާރުގެ ހަގީގަތްކަމަށް ބޮޑުވަޒީރު ވަނީ ވިދާޅުވެފައެވެ.
މީގެ އިތުރުން މިހާރު ކުރިމަތިލާން ތައްޔާރުވަމުން މިދާ ދުވަސްތަކަކީ ދަތި އުނދަގޫ ދުވަސްތަކެއް ނަމަވެސް، މި ދުވަސްތައް މާ ދިގު މުއްދަތަކަށް ދެމިގެން ނުދާނެކަން ވިކްރަމަސިންގހަ ފާހަގަކުރެއްވިއެވެ. އެގޮތުން ކުރިއަށް އޮތް ދުވަސްތަކުގެ ތެރޭގައި ބޭރުގެ އެހީތައް ލިބެން ފަށާނެ ކަމަށާއި، އެހީ ފޯރުކޮށްދޭން އެ ޖަމިއްޔާތަކާއި ގައުމުތަކުން ވައުދުވެފައިވާކަމަށް ވިކްރަމަސިންގހަ ވިދާޅުވިއެވެ.
އެހެންކަމުން މި އެހީތައް ލިބެންދެން ކުރިއަށް އޮތް ދަތި ދުވަސްތަކާ ކެރިގެން ކުރިމަތިލާންޖެހޭކަމަށް ބޮޑުވަޒީރު ވިދާޅުވިއެވެ.
ވިކްރަމަސިންގހަ ވަނީ އޭނާގެ ސަރުކާރާއެކު ލަންކާގެ ހާލަތު ރަނގަޅުކުރުމަށް އެއްބާރުލުންދޭނެކަމަށް އިދިކޮޅު ޕާޓީތަކުގެ ލީޑަރުން ބުނެފައި ވާތީ އެކަމަށް ޝުކުރު އަދާކުރައްވާފައެވެ. އަދި ވީހާވެސް އަވަހަކަށް ނެޝަނަލް އެސެމްބްލީއެއް ނުވަތަ ޕޮލިޓިކަލް ބޮޑީއެއް ގާއިމުކޮށް، ހުރިހާ ޕާޓީތަކެއް ގުޅިގެން، މިހާރު ކުރިމަތިވެފައިވާ ކަންކަމަށް ހައްލެއް ހޯދުމަށް މަސައްކަތްކުރަން ޖެހޭކަމަށް ވިކްރަމަސިންގހަ ވިދާޅުވިއެވެ. މަޝްވަރާތައް ކުރެވެން ފެށުމުން، ކުރު، މެދު، އަދި ދިގު ރާސްތާ ޕްލޭންތައް އެކުލަވާލެވޭނެކަމަށް ބޮޑުވަޒީރު ވިދާޅުވިއެވެ.
ބޮޑުވަޒީރު ވިކްރަމަސިންގހަ ވަނީ، ގޭހާއި ތެޔޮ ގަންނަން ކިއުގައި ޖެހެން ނުޖެހޭ، އަދި ކަރަންޓު ކެނޑުމުގެ މައްސަލަތަކާ ކުރިމަތިލާން ނުޖެހޭ، ދަނޑުވެރިކަން ރަނގަޅަށް ކުރެވޭ ގައުމަކަށް ލަންކާއަލުން ހައްދަވައިދެއްވާނެކަމަށް ވިދާޅުވެފައެވެ. އަދި ލަންކާގެ ޒުވާނުންނަށް އެމީހުންގެ މުސްތަގުބަލު ކަށަވަރުކުރެވޭ، މިނިވަންކަމާއެކު ހިތްހަމަޖެހިގެން ރައްޔިތުންނަށް ދިރިއުޅެވޭނެ ގައުމަކަށް ލަންކާ ހައްދަވާނެކަމަށްވެސް ވިދާޅުވިއެވެ.
އެމަނިކުފާނު މިހާރު ހަވާލުވެވަޑައިގަންނަވާފައި މިވަނީ ވަރަށް އުނދަގޫ މަސައްކަތަކާ ކަމަށާއި، ގޮންޖެހުންތަކާ ކުރިމަތިލައި ގައުމު ސަލާމަތްކުރަން ތައްޔާރަށް ހުންނެވިކަމަށް ވިކްރަމަސިންގހަ ވިދާޅުވިއެވެ. އަދި މިމަސައްކަތުގައި އެމަނިކުފާނަށް އެއްބާރުލުން ދިނުމަށް އެދިވަޑައިގެންނެވިއެވެ.
މީގެ އިތުރުން ލަންކާގެ ބޮޑުވަޒީރުކަމުގެ މަގާމާ ހަވާލުވުމަށް އަމިއްލަފުޅަށް ހުށަހަޅުއްވާފައި ނުވާނެކަމަށާއި، މި މަގާމާ ހަވާލުވެވަޑައިގެންފައި މިވަނީ ރައީސް ގޮތަބަޔާ ރާޖަޕަކްސަގެ ދައުވަތަކަށް ކަމަށް ވިކްރަމަސިންގހަ ވިދާޅުވިއެވެ. އަދި މިދަނޑިވަޅުގައި މިމަގާމާ ހަވާލުވެވަޑައިގަންނަވާފައި މިވަނީ ހަމައެކަނީ ސިޔާސީ ލީޑަރެއްގެ ހައިސިއްޔަތުން އެކަނި ނޫންކަމަށާއި، ލަންކާއިން ފޯރުކޮށްދޭ ހިލޭ ތައުލީމުގެ ސަބަބުން ޔުނިވަރސިޓީ އޮފް ކޮލޮމްބޯގެ ފެކަލްޓީ އޮފް ލޯއިން ތައުލީމު ހާސިލުކުރުމުގެ ފުރުސަތު ލިބިވަޑައިގެންނެވި ގައުމީ ލީޑަރެއްގެ ހައިސިއްޔަތުންވެސް ކަމަށް ވިކްރަމަސިންގހަ ވިދާޅުވިއެވެ.
