ދިފާއީ ވަކީލު އެދިގެން މާވިންގެ އަޑުއެހުން ކެންސަލް
16 މެއި 2022 | ހޯމަ 10:03ދިފާއުން ވަނީ ދައުވާއަށް މުތުލަޤުކޮށް އިންކާރުކޮށްފައި
މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި އޭނާގެ ފިރިމީހާ މާވިން އެސްވައި ވާރގަސްގެ މައްޗަށް އުފުލާފައިވާ ދައުވާގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ތާވަލު ކުރުމަށްފަހު ކެންސަލް ކޮށްފިއެވެ.
މި އަޑުއެހުން ތާވަލު ކޮށްފައިވަނީ ހޯމަ ދުވަހުގެ މެންދުރު 13:00 އަށެވެ. އެހެންނަމަވެސް، އަޑުއެހުން ކެންސަލް ކުރީ މާވިންގެ ވަކީލު އާލާސްކަންފުޅާ އުޅުއްވާތީ ކޯޓަށް ސިޓީ ހުށައަޅުއްވާފައިވުމާއި ގުޅިގެންނެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 26 އޭޕްރީލް 2022 ގައެވެ.
އެ އަޑުއެހުމަކީ މާވިންގެ މައްޗަށް ކުރާ ދައުވާ އިއްވުމާއި ޖަވާބުދާރީވުމަށް ބޭއްވި އަޑުއެހުމެކެވެ.
ދައުލަތުން މާވިންގެ މައްޗަށް ކުރާ ދައުވާއަކީ އެނގިހުރެ މީހަކު މެރުމުގެ ކުށުގެ ދައުވާއެވެ. ދައުލަތުން ދައުވާ އިއްވަމުން ބުނެފައިވާ ގޮތުގައި މި ކުށުގެ އަސާސީ އަދަބަކީ 10 އަހަރަށް ޖަލަށް ލުމެވެ. އެހެންނަމަވެސް، މާވިން އިއުތިރާފު ވެއްޖެނަމަ، ކުށުގެ އަސާސީ އަދަބު 1 ދަރަޖަ ދަށްކޮށް، އަންނާނެ އަދަބަކީ 7 އަހަރާއި 6 މަސްކަމަަށް ދައުލަތުގެ ވަކީލު ވިދާޅުވިއެވެ.
މި މައްސަލައިގައި މާވިންގެ މައްޗަށް އެނގިހުރެ މީހަކު މެރުމުގެ ކުށުގެ ދައުވާ އުފުލާފައިވާއިރު، ސަބަބެއްގެ ގޮތުން ޕީޖީ އޮފީހުން ބުނީ، މާވިން 19 އޮކްޓޫބަރު 2021 ދުވަހުގެ 12:00 އާއި 12:49 އާ ދެމެދުގެ ވަގުތެއްގައި، އޭނާ ދިރިއުޅޭ މއ.އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި އޭނާގެ އަންހެނުން، ފިލިޕީންސްގެ ރައްޔިތެއްކަމަށްވާ މޭރީ ގްރޭސް އޮނެޑް ޕިނެޑާގެ ބޮލާއި ކަރަށް ހަމަލާދީގެންނާއި، ނޭވާ ހާސްކޮށްގެން މަރާލާފައިވާ ކަމަށެވެ.
ދައުލަތުން ބުނާ ގޮތުގައި މޭރީއަކީ އިސްލާމީ ދައުލަތެއްގެ ބެލުމުގެ ދަށުގައި ހުރި މީހެއްކަމަށްވުމާއެކު، މި ދައުވާ ސާބިތުވެއްޖެނަމަ، މަރުގެ އަދަބުވެސް ދެވިދާނެއެވެ. މޭރީގެ އާއިލާއިން އެދޭނަމަ މާވިންގެ ކިބައިން ޤިސާސް ހިފިދާނެކަމަށް ދައުލަތުން ދެކެއެވެ.
ދައުލަތުން ދައުވާ އިއްވުމުން ދިފާއުން ވަނީ ދައުވާއަށް މުތުލަޤުކޮށް އިންކާރު ކޮށްފައެވެ. ދިފާއުން ބުނާ ގޮތުގައި މާވިން އެއްވެސް އިރެއްގައި، ގަސްތުގައިވެސް އަދި ގަސްތެއް ނެތިވެސް މޭރީއަށް އެއްވެސް ބާވަތެއްގެ ޖިސްމާނީ އަނިޔާއެއް ކޮށްފައެއް ނުވާނެއެވެ.
މި މައްސަލައިގައި ދައުވާ އިއްވައި، ދައުވާއަށް ޖަވާބުދާރީވެފައިވުމާއެކު، ދެން އޮންނަ އަޑުއެހުމެއްގައި އޮންނާނީ ދެފަރާތުން ހެކި ހާމަ ކުރުމެވެ. މި މައްސަލަ ކްރިމިނަލް ކޯޓުގައި ބައްލަވަނީ ގާޒީ ހުސައިން ފާއިޒު ރަޝާދެވެ.
