ނ.ހޮޅުދޫ ބާފާ ޖަމްއިއްޔާއިން އެރަށުގައި ކުރިއަށްގެންދިޔަ ބާފާ ސޮކަރ ކަޕްގެ ޗެމްޕިއަންކަން އެފްސީ ބޭސްސިޓީން ހޯދައިފިއެވެ. އެޓީމް ޗެމްޕިއަންކަން ހޯދީ ފައިނަލްގައި ހެނބަދޫ ޑީޓޫ ސްޕޯރޓްސް ކްލަބް 1-0 ން ބަލިކޮށްގެންނެވެ.

ފައިނަލް މެޗުގެ ހަމައެކަނި ލަނޑު ޖެހީ ސަމްދޫހު މުޙައްމަދެވެ. ފައިނަލް މެޗުގެ މޮޅު ކުޅުންތެރިއަކީވެސް ފުރަތަމަ ޑިވިޝަންގައިވެސް ކުޅެމުން އަންނަ ކުޑަފަރިއަސް ނިސްބަތްވާ ސަމްދޫހުއެވެ. މުބާރާތުގެ އެންމެ ގިނަ ލަނޑު ޖަހައިގެން ރަންބޫޓް ހޯދީ ކުރިން ޓީސީއަށް ކުޅުނު އޭދަފުށި އިޝާން އިބްރާހީމް (ސައްޓު) އެވެ. 21 އަހަރުން ދަށުގެ އެންމެ މޮޅު ކުޅުންތެރިއަކީ ޑީޓޫ ސްޕޯރޓްސް ކްލަބްގެ އަހުމަދު އަބުދުއްރަހުމާނެވެ. ފެއަރޕްލޭ ޓީމަކީ ޗެމްޕިއަން އެފްސީ ބޭސް ސިޓީއެވެ. ފަސް ޓީމް ވާދަކުރި މުބާރާތުގެ އެންމެ މޮޅު 11 ކުޅުންތެރިންވެސް ވަނީ ހޮވާފައެވެ.

މިއީ ބާފާ ޖަމްއިއްޔާއިން މިމުބާރާތް ބޭއްވި 13 ވަނަ ފަހަރެވެ. މުބާރާތް މެދުކެނޑުނީ ކޯވިޑާ ގުޅިގެން ކުޅިވަރު ހަރަކާތްތައް މެދުކަނޑާލި ދެ އަހަރެވެ.