ކުރިމަގާ މެދު އެމްބާޕޭ ގޮތެއް ނިންމައިފި، ވަރަށް އަވަހަށް ހާމަކުރަނީ

ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުން އަންނަ ފްރާންސްގެ ފޯވާޑް ކީލިއަން އެމްބާޕޭ އޭނާގެ ކުރިމަގާ މެދު ގޮތެއް ނިންމައިފިއެވެ.

މިއަހަރުގެ ޖޫން މަހުގެ ނިޔަލަށް އެމްބާޕޭ ޕީއެސްޖީއާއެކު ހަދާފައިވާ އެއްބަސްވުމުގެ މުއްދަތު ހަމަވާއިރު، އެއަށްފަހު އޭނާ ސްޕެއިންގެ ރެއާލް މެޑްރިޑަށް ބަދަލުވާނެ ކަމުގެ އަޑުތަކެއް ވަނީ ފެތުރިފައެވެ. ނަމަވެސް އެކަމާ ގުޅޭ ގޮތުން އެމްބާޕޭ އޭރު ސީދާ ވަކި އެެއްޗެއް ބުނެފައެއް ނުވެއެވެ.

ފްރާންސް ލީގުގެ އެންމެ މޮޅު ކުޅުންތެރިޔާގެ އެވޯޑާ ހަވާލުވުމަށްފަހު އެމްބާޕޭ ބުނީ ކުރިމަގާ ބެހޭ ގޮތުން އަދި އެއްޗެއް ނުބުނާނެކަމަށާއި، ނަމަވެސް މިހާރު ގާތްގަނޑަކަށް ގޮތެއް ނިންމައިފިކަމަށެވެ. އަދި ވަރަށް އަވަހަށް އެކަން ހާމަކުރާނެ ކަމުގައި ވެސް އޭނާ ބުންޏެވެ. އޭނާ ބުނި ގޮތުގައި ޖޫން މަހުގެ ތެރޭގައި ފްރާންސްގެ ޤައުމީ ޓީމާ ގުޅުމުގެ ކުރިން އޭނާގެ ނިންމުން ހާމަކުރާނެއެވެ.

ޕީއެސްޖީއާއެކު ހަދާފައިވާ އެއްބަސްވުމުގެ މުއްދަތު ހަމަވުމާާއެކު އެމްބާޕޭ އެ ޓީމު ދޫކޮށްލާނެ ކަމުގެ އަޑުތައް ފެތުރެމުން ދަނިކޮށް ފްރާންސްގެ ރައީސް އިމޭނުއެލް މެކްރޯން ވަނީ ޕީއެސްޖީގައި މަޑުކުރުމަށް އެމްބާޕޭ ގާތު އެދިފައެވެ. އަދި ދާދި ފަހުން ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ އެމްބާޕޭ ޕީއެސްޖީގައި މަޑުކުރާނެކަމަށެވެ. އެމްބާޕޭ އަންނަނީ ޕީއެސްޖީގައި މޮޅު ކުޅުމެއް ދައްކަމުންނެވެ.