ސްޕެނިޝް ލަލީގާގައި ޗެމްޕިއަން ރެއާލް މެޑްރިޑަށް ރެލިގޭޝަންގައި އޮތް ކަޑިޒް އަތުން މޮޅެއް ނުވެވުނެވެ.
ލީގު ޗެމްޕިއަންކަން ހޯދާ އުފާފާޅުކުރުންތައްވެސް ކުރިއަށްގެންގޮސްފައިވާ ރެއާލް ފުއްދާލީ ޕޮއިންޓަކުންނެވެ. މެޗު އެއްވަރުވީ 1-1 ނެވެ. މެޗުގެ ފަސްވަނަ މިނިޓްގައި މަރިއާނޯ ލަނޑު ޖަހާ ރެއާލްއަށް ކުރި ހޯދައިދިނެވެ. އެކަމަކު ފުރަތަމަ ހާފް ނިމުމުގެ ކުރިން ކަޑިޒްގެ ސޮބްރީނޯ ލަނޑުޖަހާ ކަޑިޒްއަށް ނަތީޖާ ހަމަހަމަކޮށްދިނެވެ. މެޗުން މޮޅުވާން އެންމެ ރަނގަޅު ފުރުޞަތެއް ލިބުނީވެސް ކަޑިޒްއަށެވެ. ދެވަނަ ހާފްގައި ލިބުނު ޕެނަލްޓީ ރެއާލްގެ ގޯލް ބެލެހެއްޓި ދެވަނަ ކީޕަރު މަތަކުރިއެވެ. މެޗަށް ރެއާލް ނިކުތީ ބެންޒިމާއާއި, މޮޑްރިޗްއާއި ވިނީޝިއުސް ފަދަ މުހިއްމު ކުޅުންތެރިން ނުހިމަނައެވެ. ދެވަނަ ހާފްގައި ހަޒާޑްއަށް ކޯޗު ފުރުޞަތު ދިނެވެ.
ރެއާލްގެ އިތުރުން ދެވަނާގައި އޮތް ބާސެލޯނާއަށްވެސް މެޗުން މޮޅެއް ނުވެވުނެވެ. ގެޓަފޭއާ ވާދަކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ. ލީގުގައި ދެޓީމަށްވެސް ބާކީ އޮތީ އެއް މެޗެވެ.
