މިއަހަރު 4 ކުއްޖަކަށް ޤާނޫނީ ބެލެނިވެރިކަން ހޯދައިދީފައިވޭ
ދައުލަތުގެ ބެލުމުގެ ދަށަށް ނަގާ ކުދިންނަކީ ދައުލަތުގެ ބެލުމުގެ ދަށުގައި އެކުދިންގެ އުމުރު ދުވަހު ބައިތިއްބަން ނަގާ ކުދިންނެއް ނޫން
މިނިސްޓަރ އޮފް ސްޓޭޓް ފޯރ ޖެންޑަރ އެންޑް ސޯޝަލް ސަރވިސަސް މުހައްމަދު ޝިހާބު
މިއަހަރު 4 ކުއްޖަކަށް ޤާނޫނީ ބެލެނިވެރިކަން ހޯދައިދީފައިވާ މިނިސްޓަރ އޮފް ސްޓޭޓް ފޯރ ޖެންޑަރ އެންޑް ސޯޝަލް ސަރވިސަސް މުހައްމަދު ޝިހާބު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ބައިވެރިވެވަޑައިގެން ވާހަކަފުޅުދައްކަވަމުން ޝިހާބު ވިދާޅުވީ، ދައުލަތުގެ ބެލުމުގެ ދަށަށް ނަގާ ކުދިންނަކީ ދައުލަތުގެ ބެލުމުގެ ދަށުގައި އެކުދިންގެ އުމުރު ދުވަހު ބައިތިއްބަން ނަގާ ކުދިން ނޫން ކަމަށެވެ. އެކުދިން ދައުލަތުގެ ބެލުމުގެ ދަށަށް ނަގަނީ، އެވަގުތެއްގެ ހާލަތަށް ބެލުމަށްފަހު އެ ކުއްޖަކަށް ރައްކާތެރިކަން ހޯދައި ދިނުމަށް ކަމަށެވެ. އެއަށްފަހު ރަނގަޅު މުސްތަޤުބަލެއް ހޯދައި ދިނުމަށް ހުއްޓުމެއް ނެތި މަސައްކަތް ކުރައްވާކަމަށް ވިދާޅުވިއެވެ.
މިއަހަރު 4 ކުއްޖެއްގެ ޤާނޫނީ ބެލެނިވެރިކަން ހަވާލުކުރެވިފައިވާ ކަމަށާއި، އިތުރު ދެ ކުއްޖެއްގެ ޤާނޫނީ ބެލެނިވެރިކަން ހަވާލު ކުރުމުގެ މަސައްކަތް މިހާރު އޮތީ ކޯޓު މަރުހަލާގައި ކަމަށް ޝިހާބު ވިދާޅުވިއެވެ.
މިހާރު މިކަމަށް ހޭލުންތެރިކަން ވަރަށް ބޮޑުވެފައިވާ ކަމަށާއި، މިހާރުވެސް 6 ފަރާތަކުން ޤާނޫނީ ބެލެނިވެރިކަން ހޯދުމަށް އެދި ހުށަހަޅާފައިވާކަމަށް ޝިހާބު ވިދާޅުވިއެވެ. އޭގެ ތެރެއިން 3 ފަރާތަކުން އެދިފައިވަނީ 6 މަހުގެ ކުއްޖެއް ޤާނޫނީ ބެލެނިވެރިކަން ހޯދުމަށް ކަމަށްވެސް ފާހަގަކުރެއްވިއެވެ.
މިހާރު ޤާނޫނީ ބެލެނިވެރިކަން ހޯދުމަށް ކުރިއާ އަޅާބަލާއިރު ފަސޭހަވާނެކަމަށްވެސް ޝިހާބު ވިދާޅުވިއެވެ.
