ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން މި އަހަރުގެ ތެރޭގައި ބާއްވަން ހަމަޖެހިފައިވާ މުބާރާތްތައް ރާވާފައިވާނި އެއް މުބާރަތް އަނެއް މުބާރާތާ ގުޅިގެން ދާނެ ގޮތަށާއި، ވާދަ ކުރާ ކުލަބްތައް ގިންތި ކުރެވިގެންދާނެ ފަދަ ގޮތަކަށް ކަމަށް ވީއޭއެމްގެ ރައީސް މުޙައްމަދު ރަނޭޝް (ރަނޭ) ވިދާޅުވެއްޖެއެވެ.
ރަނޭ މިހެން ވިދާޅުވީ ވީއޭއެމްގެ ވޮލީ ސީޒަން ފެށުމުގެ ގޮތުން ނޫސްވެރިންނަށް މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައެވެ.
މީގެ އިތުރުން ރަނޭ ވިދާޅުވީ މުބާރާތްތައް މި ގޮތަށް ބޭއްވުމަކީ އޭނާ ވީއޭއެމްގެ ރައީސަކަށް އައުމަށް ކުރި މަސައްކަތުގެ ތެރޭގައި ވީ ވައުދެއް ކަމަށެވެ. އަދި ކުލަބުތައް ބާރުވެރި ކުރުވައި ވޮލީ ބޯޅައިގެ ވަރުގަދަ ލޯކަލް މުބާރާތްތަކެއް ބޭއްވުމަކީ ވެސް އޭނާގެ ވައުދެއް ކަމަށާއި، މިއީ އެކަމުގެ ފެށުން ކަމަށް ރަނޭ ވިދާޅުވިއެވެ.
އަޅުގަނޑުގެ ދައުރު ފެށެމުން އައި އިރުގައި މީ އަޅުގަނޑުމެން ކުރިމަތި ލައިގެން އުޅުނު އިރުގައި ދެއްކި ވާހަކައެއް މިއީ. ކުލަބުތައް ބާރުވެރި ކުރުވައި ދިވެހިރާއްޖޭގެ ލޯކަލް ލީގެއް ވަރުގަދަ ކުރާ ވާހަކަ. އޭގެ ފެށުން މިއީ. އިނގޭތޯ!ވީއޭއެމްގެ ރައީސް މުޙައްމަދު ރަނޭޝް (ރަނޭ)
ރަނޭ ވިދާޅުވީ ލީގު ވަރުގަދަ ކުރާ ވާހަކަ އަބަދުވެސް ދައްކަމުން އައި ނަމަވެސް، ލީގު ވަރުގަދަ ކުރުމަށްޓަކައި ކުރަން ހުރި މަސައްކަތް ވަރަށް ގިނަ ކަމަށެވެ. އެ މަސައްކަތްތައް ނިންމައި ވީއޭއެމުން މިފަހަރުގެ ލީގު ފަށަނީ ދާދި އެއްވަރުގެ ހަ ޓީމާއެކު ކަމަށް ރަނޭ ވިދާޅުވިއެވެ. އޭގެ ތެރޭގައި ހިމެނެނީ ފަސްޓް ޑިވިޒަންގެ އަންހެން 10 ޓީމާއި ފިރިހެން 6 ޓީމު ކަމަށް ރަނޭ ވިދާޅުވިއެވެ.
