އެމްޑީޕީގެ އަންހެނުންގެ ރޫހުގެ ރައީސްކަމަށް ރޮޒައިނާ

އެމްޑީޕީގެ އެތެރޭގެ އިންތިހާބުގައި އެ ޕާޓީގެ އަންހެނުންގެ ރޫހުގެ ރައީސްކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އިންތިހާބުވެއްޖެއެވެ.

ހޮނިހިރު ދުވަހު ކުރިޔަށްދިޔަ އިންތިޚާބުގެ ވަގުތީ ނަތީޖާއިން އަންހެނުންގެ ރޫހުގެ ރައީސްކަން ރޮޒައިނާ ކާމިޔާބުކުރައްވާފައިވާއިރު ރޮޒައިނާ އާ ވާދަކުރެއްވީ ސަފާތު އަހުމަދު ޒާހިރެވެ. ވަގުތީ ނަތީޖާ ދައްކާގޮތުން ރޮޒައިނާ އަށް 65 އިންސައްތަ ވޯޓު ލިބިވަޑައިގަންނަވާފައިވެއެވެ. ސަފާތުއަށް ލިބިވަޑައިގެންނެވީ 35 އިންސައްތަ ވޯޓެވެ.

ރޮޒައިނާ ވަނީ ހުރިހާ އަތޮޅެއްގައިހެން ސަފާތަށްވުރެ ކުރި ހޯއްދަވާފައެވެ.

އިންތިހާބަށްފަހު ރޮޒައިނާ ކުރެއްވި ޓްވީޓެއްގައި ވިދާޅުވީ މި އިންތިހާބު ނިމުނީ ކަމަށާއި ދެން އޮތީ 2023ގައި އޮންނަ ރިޔާސީ އިންތިހާބު އެމްޑީޕީން ކާމިޔާބު ކުރުމަށް އެންމެން އެކުގައި މަސައްކަތް ކުރުން ކަމަށެވެ. ބޭނުންފުޅުވަނީ އެކަކުވެސް ބާކީ ނުކޮށް ހުރިހާ މެމްބަރުން ބައިވެރިކޮށްގެން ޕާޓީ ހިންގާލަންކަމަށް ރޮޒައިނާ ވަނީ ވިދާޅުވެފައެވެ.

ރޮޒައިނާ އާއެކު އެއްޓީމެއްގެ ގޮތުގައި ނިކުންނެވި އިކޮނޮމިކް މިނިސްޓަރ ފައްޔާޒު އިސްމާއީލްވެސް ވަނީ ޗެއާޕާސަން ކަމުގެ މަގާމު ކާމިޔާބު ކުރައްވާފައެވެ.

މިއިންތިޚާބުގައި އަންހެނުންގެ ރޫހުގެ ރައީސްގެ އިތުރުން ޒުވާނުންގެ ހިތްވަރުގެ ރައީސްވެސް ވަނީ އިންތިޚާބުކޮށްފައެވެ. އެމަގާމަށް ވާދަކުރައްވާފައިވަނީ މުހައްމަދު އަންސަރާއި ރިފްގާ ޝިހާމެވެ. އިންތިޚާބު ކާމިޔާބުކުރައްވާފައިވަނީ ރިފްގާއެވެ.