ޖަރުމަނުގެ ބަޔާން މިއުނިކަށް ކުޅެމުން އަންނަ ރޮބާޓް ލެވަންޑޯސްކީގެ ކޮންޓްރެޖްޓް އައުނުކުރުމަށް އޭނާ ނިންމައިފިއެވެ.
ބަޔާންއާއެކު ލެވަންޑޯސްކީ ހަދާފައިވާ އެއްބަސްވުމުގެ މުއްދަތު ހަމަވާނީ މިއަންނަ އަހަރުގެ ޖޫން މަހަށެވެ. އެހެންކަމުން ބަޔާންއިން މަސައްކަތްކުރަމުން އައީ އުމުރުން 33 އަހަރުގެ ލެވާންޑޯސްކީއާއެކު ހަދާފައިވާ އެއްބަސްވުން އައުކުރުމަށެވެ. މިއާއެކު ލެވާންޑޯސްކީ މީގެ ކުރިން ޑިމާންޑްކުރީ މުސާރަ ބޮޑުކޮށް، އިތުރު ދެއަހަރުގެ މުއްދަތަކަށް ކޮންޓްރެކްޓް އައުކުރުމަށެވެ. މިހާރުވެސް ބަޔާންގައި އެންމެ ބޮޑު މުސާރައެއް ދެނީ އޭނާއަށެވެ.
ލެވަންޑޯސްކީ ކޮންޓްރެކްޓް އައުނުކުރުމަށް ނިންމާފައިވާއިރު، އޭނާ ދިއުން އެންމެ ގާތީ ބާސެލޯނާއަށް ކަމަށް ރިޕޯޓުތައް ބުނެއެވެ. ލެވަންޑޯސްކީގެ ރިލީޒް ކްލޯސްގެ ގޮތުގައި ބޮޑު އަދަދެއް ދައްކަން ޖެހޭއިރު، މާލީ ދަތިކަން ދިމާވެފައިވާ ބާސެލޯނާއަށް، އޭނާ ހޯދުމަކީ އުނދަގޫ ކަމަކަށް ވާނެއެވެ.
ލެވަންޑޯސްކީ ވަނީ މިހާތަނަށް ބަޔާނަށް ކުޅެދިން 373 މެޗުން 343 ގޯލު ޖަހާފައެވެ. ބަޔާނާއެކު 19 ތަށި ހޯދިއިރު، އޭގެ ތެރޭގައި ޗެމްޕިއަންސް ލީގާއި ކްލަބް ވޯލްޑް ކަޕް އެއް ފަހަރު، އަދި ޖަރުމަނު ލީގު އަށް ފަހަރު ހޯދުން ހިމެނެއެވެ.
