އޭއެފްސީ އޭޝިއަން ކަޕް ޗައިނާގައި ނުބޭއްވޭނެ

މިއަންނަ އަހަރު ޗައިނާގައި ބޭއްވުމަށް ހަމަޖެހިފައިވާ އޭއެފްސީ އޭޝިއަން ކަޕް 2023 އެގައުމުގައި ނުބޭއްވޭނެކަމަށް ޗައިނާއިން ނިންމައިފިއެވެ.

ޗައިނާއިން މި ގޮތަށް ނިންމީ އެގައުމުގައި ކޮވިޑުގެ ހާލަތު ގޯސްވުމުގެ ސަބަބުންނެވެ. ޗައިނާއިން އެކަން އޭއެފްސީއަށް އެންގުމުން އޭއެފްސީން ވަނީ އެނިންމުން ބަލައިގެންފައެވެ.

އޭއެފްސީން މިއަދު ނެރުނު ބަޔާނެއްގައި ބުނީ، މި މުބާރާތް ކުރިއަށް ގެންދިއުމަށްޓަކައި ޗައިނާގެ ފުޓްބޯޅަ އެސޯސިއޭޝަނާއި ލޯކަލް އޯގަނައިޒިންގ ކޮމިޓީއާ ވަރަށް ގާތުން މަސައްކަތްކޮށްފައި ވާނެކަމަށެވެ. އެގޮތުން މުބާރާތުގެ ލޯގޯ ލޯންޗުކުރުމުގެ އިތުރުން، މުބާރާތަށް ޗައިނާގައި ހެދި އައު ސްޓޭޑިއަމް "ޝެންހައި ޕޫޑޮންގ ސްޓޭޑިއަމް"ވެސް މިދިޔަ އަހަރު ހުޅުވާފައިވާކަން އޭއެފްސީން ފާހަގަކުރިއެވެ.

ނަމަވެސް ޗައިނާއަށް މި މުބާރާތް ހޯސްޓު ނުކުރެވޭ ސަބަބު ގަބޫލުކުރާކަމަށް އޭއެފްސީގެ ބަޔާނުގައިވެއެވެ. އޭއެފްސީން ބުނީ މިއަންނަ އަހަރުގެ މުބާރާތް ހޯސްޓުކުރާނެ ގައުމަކާގުޅޭ މައުލޫމާތު ކުރިއަށް އޮތްތަނުގައި ހިއްސާކުރަމުން ގެންދާނެކަމަށެވެ.

މިއަންނަ އަހަރު އޮންނަ މި މުބާރާތަށް މިހާތަނަށް 13 ޓީމެއް ވަނީ ކޮލިފައިވެފައެވެ. މުބާރާތުގައި ވާދަކުރާނެ ބާކީ 11 ޓީމު ހޮވުމަށް ކުޅޭ ކޮލިފައިން ފަހު ބުރުގެ މެޗުތައް މިއަންނަ ޖޫން މަހު އޮންނާނެއެވެ.