ޓެން ހާގް ބޭނުންވާ ބަދަލުތައް ގެންނަންޖެހޭ: ރޮނާލްޑޯ

އިނގިރޭސިވިލާތުގެ މެންޗެސްޓަރ ޔުނައިޓެޑްއާއި މިއަންނަ ސީޒަންގައި ހަވާލުވާ އެރިކް ޓެން ހާގް ބޭނުންވާ ބަދަލުތައް ގެނައުމަށް ފުރުސަތުދޭން ޖެހޭކަމަށް އެޓީމުގެ ތަރި ކްރިސްޓިއާނޯ ރޮނާލްޑޯ ބުނެފިއެވެ.

މިދިޔަ އަހަރުގެ ފަހުކޮޅު ޔުނައިޓެޑްގެ ކޯޗުކަމުން އޮލެ ގުނަ ސޯލްޝެއާ ވަކިކުރުމަށްފަހު މިހާރު އެމަގާމުގައި ހުރީ ރަލްފް ރަންގްނިކްއެވެ. އޭނާ ޔުނައިޓެޑުގެ ކޯޗު ކަމާއި ހަވާލުވީ ހަމަސްދުވަހުގެ މުއްދަތަކަށެވެ. ނަމަވެސް ރަންގްނިކްއަށް ޔުނައިޓެޑާއެކު ރަނގަޅު ނަތީޖާތަކެއް ނުނެރެވުނެވެ. މިއީ ޔުނައިޓެޑުން ޓްރޮފީއަކާއި ނުލާ ނިންމާލާ ފަސްވަނަ ސީޒަންއެވެ. ޕްރިމިއަރ ލީގުގެ ގަދަ ހަތަރެއްގައި ނުހިމެނުމުން މިއަންނަ ސީޒަންގެ ޗެމްޕިއަންސް ލީގުގެ ޖާގައެއްވެސް ޔުނައިޓެޑަކަށް ނެތެވެ.

ރޮނާލްޑޯ ބުނީ ޓީމު ވެއްޓިފައި މިއޮތް ހާލަތުން އަރައިގަތުމަށް ޓެން ހާގް ބޭނުންވާ ބަދަލުތައް ގެންނަން ފުރުސަތު ދޭން ޖެހޭ ކަމަށެވެ. ނަމަވެސް ޓީމު އަލުން ފޯމަކަށް އެޅުވުމަށްޓަކައި ވަގުތު ނަގާނެކަން ރޮނާލްޑޯ ފާހަގަކުރިއެވެ.

ރޮނާލްޑޯ ބުނީ ޓީމުގެ ކޯޗުކަމަށް ޓެން ހާގް ހަމަޖެއްސުމުން ކުޅުންތެރިއެއްގެ ހައިސިއްޔަތުން އަދި ސަޕޯޓަރެއްގެ ހައިސިއްޔަތުންވެސް އުފާކުރާ ކަމަށެވެ. އަދި އަޔެކްސްގައިވެސް ތަފާތު ދައްކާފައިވާ މި ކޯޗަށް ވަގުތު ދީފި ނަމަ ޓީމު އުފާކޮށްދޭނެ ކަމަށެވެ.

މިއަންނަ ސީޒަންގެ ޗެމްޕިއަންސް ލީގަށް ޔުނައިޓެޑް ކޮލިފައި ނުވުމާއެކު މިއަންނަ ސީޒަންގައި އޭނާ ޔުނައިޓެޑްގައި މަޑުކުރާނެ ކަމާއި މެދު މިހާރު ވަނީ ސުވާލު އުފެދިފައެވެ. ޓީމުގެ ފަރާތުން އެދެވޭ ވަރުގެ ކުޅުމެއް ނުފެނުނު ނަމަވެސް އުމުރުން 37 އަހަރުގެ ރޮނާލްޑޯ މި ސީޒަންގައިވެސް މޮޅު ކުޅުމެއް ދެއްކިއެވެ. ރޮނާލްޑޯ ވަނީ މި ސީޒަންގައި ޖުމްލަ 30 ލަނޑު ޖަހާފައެވެ. އޭގެ ތެރެއިން 24 ލަނޑު ޔުނައިޓެޑަށް ޖަހައިދިން އިރު 18 ކާމިޔާބުކުރީ ޕްރިމިއަރ ލީގުގައެވެ. އަދި އޭނާ ޖެހި 30 ލަނޑުގެ ތެރެއިން ހަ ލަނޑު ޖަހައިދިނީ ޕޯޗުގަލް ޓީމަށެވެ.