ވޯލްޑްކަޕްގެ މެޗެއް ބައްލަވާލެއްވުމަށް ރައީސްއަށް ދައުވަތު ދެއްވައިފި
12 މެއި 2022 | ބުރާސްފަތި 17:51މުބާރާތް ކުރިއަށްދާނީ އަންނަ ނޮވެމްބަރުމަހުގެ 21 ވަނަ ދުވަހުން ފެށިގެން ޑިސެމްބަރުމަހުގެ 18 ވަނަ ދުވަހުގެ ނިޔަލަށް
ރައީސް ސާލިހާއި އުރީދޫ މޯލްޑިވްސްގެ އެމްޑީ ބައްދަލުކުރެއްވުން
މިއަހަރުގެ ފަހުކޮޅު ގަތަރުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕް 2022 ގެ މެޗެއް ބައްލަވާލެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް ދައުވަތު ދެއްވައިފިއެވެ.
ރައީސް ސާލިހަށް މި ދައުވަތު ދެއްވާފައިވަނީ އުރީދޫ މޯލްޑިވްސްގެ މެނޭޖިންގ ޑިރެކްޓަރު އަދި ޗީފް އެގްޒެކެޓިވް އޮފިސަރު ޚާލިދު ޙަސަން އަލް ހަމާދީއެވެ. ރައީސުލްޖުމްހޫރިއްޔާގެ އޮފީހުގައި ބުރާސްފަތި ދުވަހު އެމަނިކުފާނު ވަނީ އުރީދޫ މޯލްޑިވްސްގެ މެނޭޖިންގ ޑިރެކްޓަރާއި ބައްދަލުކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާއާ އުރީދޫ މޯލްޑިވްސްގެ ސީ.އީ.އޯ ވަނީ އުރީދޫއިން ރާއްޖޭގައި ދެމުން އަންނަ ޚިދުމަތްތަކާ ގުޅޭގޮތުން މަޝްވަރާކުރައްވާފައެވެ. އަދި އުރީދޫ މޯލްޑިވްސްގެ ސީ.އީ.އޯ ވަނީ ވޯލްޑްކަޕްގެ މެޗެއް ބައްލަވާލެއްވުމަށް ވަޑައިގެންނެވުމަށް ރައީސުލްޖުމްހޫރިއްޔާއަށް ދަޢުވަތު ދެއްވާފައެވެ. އަދި ވޯލްޑްކަޕްގައި ބޭނުންކުރުމަށް ތައްޔާރުކޮށްފައިވާ ބޯޅައެއް މި ބައްދަލުކުރެއްވުމުގައި ރައީސުލްޖުމްހޫރިއްޔާއަށް ވެދުމަށް އަރުވާފައިވެއެވެ.
މިއަހަރުގެ ވޯލްޑްކަޕް ބޭއްވުމަށް ހަމަޖެހިފައި ވަނީ ގަތަރުގައެވެ. މުބާރާތް ކުރިއަށްދާނީ އަންނަ ނޮވެމްބަރުމަހުގެ 21 ވަނަ ދުވަހުން ފެށިގެން ޑިސެމްބަރުމަހުގެ 18 ވަނަ ދުވަހުގެ ނިޔަލަށެވެ.
