ސްރީލަންކާގެ ބޮޑުވަޒީރު ކަމުގެ މަގާމަށް ރަނިލް ވިކްރެމެސިންހަ އައްޔަނު ކުރައްވައިފިއެވެ.
ލަންކާގެ ނޫސްތަކުން ރިޕޯޓުކޮށްފައިވާގޮތުން ރަނިލް ވިކްރެމެސިންހަ ބޮޑުވަޒީރުކަމުގެ ހުވާކުރައްވާފައި ވަނީ ބުރާސްފަތި ދުވަހުއެވެ.
ލަންކާގެ ބޮޑުވަޒީރުކަމުގެ މަގާމަށް ރަނިލް ވިކްރެމެސިންހަ ރައީސް ގޮތަބަޔާ ރާޖަޕަކްސަ އައްޔަނުކުރައްވާފައިވާއިރު، އޭނާ ވަނީ މީގެ ކުރިން އެކި ފަހަރުމަތިން ލަންކާގެ ބޮޑުވަޒީރުކަމުގެ މަގާމު އަދާކުރައްވާފައެވެ. މިއީ ވިކްރަމަސިންހަ ލަންކާގެ ބޮޑުވަޒީރުކަމުގެ މަގާމާ ހަވާލުވެވަޑައިގެން ހަ ވަނަ ފަހަރެވެ.
ވިކްރެމެސިންހަ ބުދަ ދުވަހު ވަނީ ބޮޑުވަޒީރުކަމުގެ މަގާމާ ހަވާލުވެވަޑައިގަތުމާ ގުޅޭގޮތުން ރައީސް ގޮތަބަޔާއާއެކު މަޝްވަރާކުރައްވާފައެވެ. ބޮޑުވަޒީރުކަމުގެ މަގާމާ ވިކްރެމެސިންހަ ހަވާލުވެވަޑައިގެންފައި މިވަނީ ކުރިން އެމަގާމުގައި ހުންނެވި މަހިންދަ ރާޖަޕަކްސަ ހޯމަ ދުވަހު މަގާމުން އިސްތިއުފާ ދެއްވުމާ ގުޅިގެންނެވެ.
ބޮޑުވަޒީރުކަމުގެ މަގާމާ ވިކްރެމެސިންހަ ހަވާލުވެވަޑައިގެންނެވުމުން މިކަމާ ގިނަ ބަޔަކު ވަނީ ނުރުހުން ފާޅުކޮށްފައެވެ.
ވިކްރެމެސިންހަ އެންމެ ފުރަތަމަ ލަންކާގެ ބޮޑުވަޒީރުކަމާ ހަވާލުވެވަޑައިގެންފައި ވަނީ 1993 ވަނަ އަހަރު ރައީސް ރަނަސިންހަ ޕްރެމަދާސާގެ ވެރިކަމުގައެވެ. އެގޮތުން 1993 ވަނަ އަހަރުން 1994 ވަނަ އަހަރަށް ބޮޑުވަޒީރު ކަމުގެ މަގާމު އަދާކުރެއްވުމަށް ފަހު ދެ ވަނަ ފަހަރަށް އެމަގާމު އަދާކުރައްވާފައި ވަނީ 2001 ވަނަ އަހަރުން 2004 ވަނަ އަހަރަށެވެ. އެއީ ރައީސް ޗަންދްރިކާ ބަންޑާރަނަޔަކެގެ ވެރިކަމުގައެވެ.
ލަންކާގެ ބޮޑުވަޒީރު ކަމުގެ މަގާމު ތިންވަނަ ފަހަރަށް ވިކްރެމެސިންހަ ހަވާލުވެވަޑައިގެންފައި ވަނީ ރައީސް މައިތިރިޕަލަ ސިރިސެނާގެ ވެރިކަމުގައި، 2015 ވަނަ އަހަރުއެވެ.
އޭގެ ފަހުން 2018 ވަނަ އަހަރުގެ އޮކްޓޫބަރު ރައީސް ސިރިސޭނާ އޭނާ ބޮޑުވަޒީރުކަމުގެ މަގާމުން ވަކިކުރެއްވުމަށްފަހު، ހަމަ އެއަހަރުގެ ޑިސެމްބަރު މަހު ވަނީ އަލުން އެމަގާމަށް އައްޔަނުކުރައްވާފައެވެ. 2019 ވަނަ އަހަރުގެ ނޮވެމްބަރު މަހު ޔޫއެންޕީގެ ކެނޑިޑޭޓަށް ކާމިޔާބު ނުކުރެެއްވުމުން އޭނާ ވަނީ މަގާމުން އިސްތިއުފާ ދެއްވާފައެވެ.
ވިކްރެމެސިންހައަށް ލަންކާގެ ބޮޑުވަޒީރު ކަމުގެ މަގާމު ރައީސް ގޮތަބަޔާ ރާޖަޕަކްސަ ހަވާލުކުރައްވާފައި މިވަނީ އެމަގާމަށް އައްޔަނުކުރެއްވުމަށް އިދިކޮޅުން ތިން ބޭފުޅުންގެ ނަން ހުށަހަޅުއްވާފައި ވަނިކޮށެވެ. އެގޮތުން ލަންކާގެ ކުރީގެ ރައީސް އަދި ސްރީލަންކާ ފްރީޑަމް ޕާޓީ (އެސްއެލްއެފްޕީ)ގެ ލީޑަރު މައިތިރިޕާލަ ސިރިސޭނާގެ ފަރާތުން ލަންކާގެ ބޮޑުވަޒީރުކަމަށް ހުށަހެޅުއްވި ތިން ބޭފުޅުންނަކީ ނިމާލް ސިރިޕާލާ ޑި ސިލްވާ، ވިޖެދާސަ ރާޖަޕަކްސަ އަދި ދުލާސް އަލަހަޕްޕެރޫމާއެވެ.
ސިރިސޭނާ ވިދާޅުވީ 11 ޕާޓީއަކާއި ގާނޫނު ހަދާ މަޖިލީހުގެ މިނިވަން ގްރޫޕެއް އެކުވެގެން، ހުސްވެފައިވާ ބޮޑުވަޒީރުކަމުގެ މަގާމަށް އައްޔަނުކުރަން ބޭނުންވާ ތިން ނަމެއް ބަޔާންކުރައްވައި ރައީސަށް ސިޓީ ފޮނުވާފައިވާކަމަށެވެ. ސިރިސޭނާ ވިދާޅުވީ މިނިވަން ގްރޫޕަށް 53 މެމްބަރުންގެ ތާއީދު ލިބިފައިވާކަމަށެވެ.
ގައުމާ މުޚާތަބުކުރައްވައި ވާހަކަދައްކަވަމުން ލަންކާގެ ރައީސް ގޮތަބަޔާ ރާޖަޕަކްސަ ވަނީ ސްރީލަންކާއަށް އައު ބޮޑުވަޒީރަކު އައްޔަނުކޮށް ކެބިނެޓް އެކުލަވާލައްވާނެކަމަށް ވިދާޅުވެފައެވެ. ގޮތަބަޔާ ވިދާޅުވީ ގާނޫނު ހަދާ މަޖިލީހަށް އިތުރު ބާރުތައް ދޭ ގޮތަށް ގާނޫނު އަސާސީ އިސްލާހުކުރައްވާނެ ކަމަށެވެ.
ގޮތަބަޔާ ވިދާޅުވީ އައު ސަރުކާރެއް އެކުލަވާލުމަށް އެކި ޕާޓީތައް ގުޅިގެން އެއްބަސްވެވޭ ޕްރޮޕޯސަލްއެއް ހުށަހަޅާފައިވާކަމަށެވެ. އޭގެތެރޭގައި ގިނައީ ގާނޫނު ހަދާ މަޖިލީހުގައި ހިމެނޭ ޕާޓީތައްކަމަށް ގޮތަބަޔާ ވިދާޅުވިއެވެ. އަދި ފާއިތުވި ދުވަސްތަކުގައި އައު ސަރުކާރެއް އެކުލަވާލުމަށް ގިނަ ޕާޓީތަކެއްގެ ލީޑަރުންނާއެކު ގިނަ މަޝްވަރާތަކެއް ކުރައްވާފައިވާކަމަށް ގޮތަބަޔާ ވިދާޅުވިއެވެ. މިހާރު ހުރި މައްސަލަތަކަށް ހައްލެއްހޯދުމަށް އުނދަގޫ ކަންތައްތަކަކަށް އެއްބަސްވެފައިވާކަމަށްވެސް ގޮތަބަޔާ ވިދާޅުވިއެވެ.
