ލަމްހާއަށް ކުރާ 3 ދައުވާއަށްވެސް އޭނާ އިންކާރު ކުރޭ
12 މެއި 2022 | ބުރާސްފަތި 06:21އޭނާގެ ފަރާތުން މުޖުތަމައުގެ ސަލާމަތަށް ނުރައްކާވާނެ ކަމަށް ބެލެވެން ނެތް ކަމަށް ދިފާއުން ބުނޭ
މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނު
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނުގެ މައްޗަށް އުފުލާފައިވާ ދައުވާގެ އަޑުއެހުމެއް ބުރާސްފަތި ދުވަހު ކުރިއަށް ގެންގޮސްފިއެވެ.
މި މައްސަލައިގައި 24 އޭޕްރީލްގައި ބޭއްވި އަޑުއެހުމުގައި ދައުލަތުން ވަނީ ލަމްހާގެ މައްޗަށް ކުރާ އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އިއްވާފައެވެ. އަދި ލަމްހާގެ ފަރާތުން ވަނީ އެ ދައުވާއަށް އިންކާރުކޮށްފައެވެ.
ބުރާސްފަތި ދުވަހުގެ އަޑުއެހުން:
މި އަޑުއެހުމުގައި ގާޒީ ހުސައިން ފާއިޒު ރަޝާދު ވަނީ ފުރަތަމަ އިއްވި ދައުވާއާ ގުޅިގެން ދެފަރާތުން ހެކި ހާމަ ކުރެއްވުމަށް ދަންނަވާފައެވެ. އެހެންނަމަވެސް، ދިފާއުން ވަނީ، ހެކި ހާމަ ކުރުމަށް ދިފާއަށް އިތުރު ވަގުތު ބޭނުންވާކަމަށް ބުނެފައެވެ. އެކަމަށް ދައުލަތުންވެސް އިއުތިރާޒު ނުކުރާތީ ގާޒީ ވަނީ ބާކީ ހުރި ދައުވާތައް އިއްވުން ކުރިއަށް ގެންދަވާފައެވެ.
ލަމްހާގެ މައްޗަށް ކުރާ ދެވަނަ ދައުވާއަކީ ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދައުވާއެވެ.
ދައުލަތުން ބުނާ ގޮތުގައި ލަމްހާ ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލައި ފާސްކުރިއިރު، ލަމްހާ ދިރިއުޅޭ ކޮޓަރި ތެރެއިން، ހޮސްޕިޓަލްތަކާއި ފަރުވާ ދޭ މަރުކަޒުތަކުގެ ބޭނުމަށް އެކަނި, ދޫކުރެވޭ ބާވަތުގެ ބޭސްތަކެއް ވަނީ ފެނިފައެވެ.
އެ ބޭސްތަކަކީ "އެޗް-1" ދަރަޖައިގެ ހަމައެކަނި ހޮސްޕިޓަލުތަކާއި ސިއްޙީ ޚިދުމަތްދޭ ތަންތަނުގެ ބޭނުމަށް އެކަނި ދޫކުރެވޭ ބޭސްތަކެއްކަމަށް ދައުލަތުން ބުނެއެވެ. މި ކުށުގެ އަސާސީ އަދަބަކީ 2 މަހާއި 12 ދުވަހަށް ޖަލަށް ލުމެވެ.
އެ ދައުވާ އެކަށީގެންވާ ގޮތެއްގައި ސާފު ކޮށްދެވިއްޖެކަމަށް ޝަރީއަތުން ނިންމެވުމުން، ދިފާއުން ވަނީ އެ ދައުވާއަށް އިންކާރުކޮށްފައެވެ. ދިފާއުން ބުނާ ގޮތުގައި ދައުވާއަށް އިންކާރު ކުރި ނަމަވެސް، ދައުވާގެ "ލީގާލިޓީއާމެދު" ދިފާއުގެ ސުވާލުތައް އަދިވެސް އެބަހުއްޓެވެ.
އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރުހިންގުމުގެ ކުށުގެ ދަޢުވާވެސް ލަމްހާގެ މައްޗަށް އުފުލާފައިވާއިރު، ދައުލަތުން މި އަޑުއެހުމުގައި ވަނީ އެ ދައުވާ އިއްވާފައެވެ.
އެ ދައުވާ އުފުލާ ސަބަބެއްގެ ގޮތުގައި ދައުލަތުން ބުނަނީ، މި މައްސަލައާ ގުޅިގެން 27 އޮކްޓޫބަރު 2021 ދުވަހު ލަމްޙާ ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލައި ފާސްކުރިއިރު، އެ ގޭގައި އޭނާ ދިރިއުޅޭ ކޮޓަރީގެ ތެރެއިން ފެނުނު ސިޓީ އުރައެއްގެ ތެރެއިން، އިންދިރާ ގާންދީ މެމޯރިއަލް ހޮސްޕިޓަލުގެ ހުއްދައަކާ ނުލައި އެ ހޮސްޕިޓަލުން އޭނާ ނަގާފައިވާ، ހޮސްޕިޓަލުން ބޭރަށް ގެންދިއުން މަނާ، އަދި ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތަކެއް ފެނިފައިވާތީއެވެ.
އެގޮތުން ލަމްހާގެ ގެ ބަލާ ފާސްކުރިއިރު ފެނިފައިވާ 3 އިންޖެކްޝަންގެ ތެރޭގައި "ސަކްސިނައިލްކޮލިން" އާއި، "ޕޮޓޭސިއަމް ކްލޮރައިޑް" ހިމެނޭއިރު، އެ އިންޖެކްޝަންތަކަކީ މީހުން ހޭނައްތަން ބޭނުންކުރާ އަދި މީހަކު މަރާލެވިދާނެ ފަދަ އިންޖެކްޝަނެއްކަން ދައުލަތުން މީގެ ކުރިން ފާހަގަކޮށްފައިވެއެވެ.
ދިފާއުން ވަނީ އެ ދައުވާއަށްވެސް އިންކާރު ކޮށްފައެވެ.
ވުމާއެކު، ދެން އޮންނާނީ މި މައްސަލައިގެ ދެފަރާތުން ހެކި ހާމަ ކުރުމެވެ.
ބުރާސްފަތި ދުވަހުގެ އަޑުއެހުމުގައިވެސް ވަނީ ލަމްހާގެ ބަންދު މުރާޖައާއާ ގުޅޭގޮތުން ދެފަރާތުން ތަފްސީލީ ގޮތެއްގައި ވާހަކަ ދައްކާފައެވެ. އެގޮތުން ލަމްހާއަށް "ބެޑްރެސްޓް" ބޭނުންވާކަމަށް ދިފާއުން ބުނެއެވެ. އަދި އޭނާ ޑޮކްޓަރަށް ދައްކާފައިވާއިރު، ޑޮކްޓަރު ދީފައިވާ ރެކޮމެންޑޭޝަންއާއި ގުޅިގެން އަޅުއްވާފައިވާ ފިޔަވަޅުތަކާއި، ދިފާއުން ބަންދު މުރާޖައާއާ ގުޅޭގޮތުން ދައްކާފައިވާ ވާހަކަތަކަށް ލިއުމުން ޖަވާބު ދިނުމަށް ޝަރީއަތުން ވަނީ ދައުލަތަށް 5 ދުވަހުގެ މުއްދަތެއް ދެއްވާފައެވެ.
ދެން މި މައްސަލައިގެ އަޑުއެހުމެއް އޮންނާނީ 19 މެއި ގައެވެ.
