ލަންކާއިން ގެއްލުނު ދިވެހި މީހާ ފެނިއްޖެ
12 މެއި 2022 | ބުރާސްފަތި 01:43ފޮރިން މިނިސްޓްރީން ބުނީ އޭނާ ފެނުނީ ކޮލަންބޯގެ ހޮސްޕިޓަލެއްގައި ފަރުވާ ހޯދަމުން ދަނިކޮށް ކަމަށް
ލަންކާގައި ގެއްލިގެން ހޯދަމުންދިޔަ އިބްރާހިމް އަލީ
ސްރީލަންކާ އަށް ބޭސްފަރުވާއަށް ގޮސް އުޅެނިކޮށް ގެއްލިގެން ހޯދަމުން ދިޔަ ދިވެހި މީހާ ފެނިއްޖެއެވެ.
މީގެ ނުވަ ދުވަސްކުރިން ގެއްލުނު މިމީހާ ފެނުނުކަން ހާމަކޮށް ފޮރިން މިނިސްޓްރީން ބުނީ އޭނާ ފެނުނީ ކޮލަންބޯގެ ހޮސްޕިޓަލެއްގައި ފަރުވާ ހޯދަމުން ދަނިކޮށް ކަމަށެވެ. އޭނާއަށް އެއްވެސް އަނިޔާއެއްވެފައި ނުވާ ކަމަށް ފޮރިން މިނިސްޓްރީން ބުންޏެވެ.
ކޮންސިއުލާ ސްޓާފަކަށް އޭނާ ފެނުނީ ކޮލަންބޯގެ ހޮސްޕިޓަލެއްގެ ތެރެއިންކަމަށާއި އޭރު ދިޔައީ އޭނާ ހޯދަން އެ ސަރަހައްދުގެ ހުރިހާ ހޮސްޕިޓަލެއް ބަލަމުން ކަމަށް މިނިސްޓްރީން ބުންޏެވެ.
މިދިޔަ ހަފުތާގެ އަންގާރަ ދުވަހުގެ ހެނދުނުން ފެށިގެން ވީނުވީއެއް ނޭނގި ގެއްލިގެން ހޯދަމުން ދިޔައީ އިބްރާހިމް އަލީ ނަމަކަށް ކިޔާ 62 އަހަރުގެ މީހެކެވެ. އޭނާ އަކީ ކިޑްނީ ބައްޔަށް ފަރުވާ ހޯދަމުން ދާ މީހެކެވެ.
އިބްރާހިމްގެ ހަބަރެއް ނުވެގެން މޯޗަރީ ވެސް ބަލާފައިވެއެވެ.
