މިހަފްތާތެރޭގައި ސްރީލަންކާއަށް އައު ބޮޑުވަޒީރަކު އައްޔަނުކޮށް ކެބިނެޓް އެކުލަވާލާނެކަމަށް ލަންކާގެ ރައީސް ގޮތަބަޔާ ރާޖަޕަކްސަ ވިދާޅުވެއްޖެއެވެ.

ސްރީލަންކާގައި ހިނގި ހަމަނުޖެހުންތަކާއެކު ބޮޑުވަޒީރުކަމުގައި ހުންނެވި ގޮތަބަޔާގެ ބޭބޭފުޅު މަހިންދަ ރާޖަޕަކްސަ ވަނީ އިސްތިއުފާ ދެއްވާފައެވެ. އޭގެފަހުން ގައުމާ މުޚާތަބުކުރައްވާ ވާހަކަދައްކަވަމުން ގޮތަބަޔާ ވިދާޅުވީ އައު ބޮޑުވަޒީރާއި ކެބިނެޓް ވެގެންދާނީ ލަންކާގެ ގާނޫނު ހަދާ މަޖިލީހުގެ 225 ގޮނޑީގެ މެޖޯރިޓީ ހިމެނިގެންދާނެ ކެބިނެޓަކަށް ކަމަށެވެ. މީގެއިތުރުން ގާނޫނު ހަދާ މަޖިލީހަށް އިތުރު ބާރުތައް ދޭ ގޮތަށް ގާނޫނު އަސާސީ އިސްލާހުކުރައްވާނެ ކަމަށްވެސް ގޮތަބަޔާ ވިދާޅުވިއެވެ.

ގޮތަބަޔާ ވިދާޅުވީ އައު ސަރުކާރެއް އެކުލަވާލުމެއް އެކި ޕާޓީތައް ގުޅިގެން އެއްބަސްވެވޭ ޕްރޮޕޯސަލްއެއް ހުށަހަޅާފައިވާކަމަށެވެ. އޭގެތެރޭގައި ގިނައީ ގާނޫނު ހަދާ މަޖިލީހުގައި ހިމެނޭ ޕާޓީތައްކަމަށް ގޮތަބަޔާ ވިދާޅުވިއެވެ. އަދި ފާއިތުވި ދުވަސްތަކުގައި އައު ސަރުކާރެއް އެކުލަވާލުމަށް ގިނަ ޕާޓީތަކެއްގެ ލީޑަރުންނާއެކު ގިނަ މޝްވަރާތަކެއް ކުރައްވާފައިވާކަމަށް ގޮތަބަޔާ ވިދާޅުވިއެވެ. އަދި މިހާރު ހުރި މައްސަލަތަކަށް ހައްލެއް ހޯދުމަށް އުނދަގޫ ކަންތައްތަކަކަށް އެއްބަސްވެފައިވާކަމަށް ގޮތަބަޔާ ވިދާޅުވިއެވެ.

މީގެއިތުރުން އަލަށް އެކުލަވާލެވޭ ސަރުކާރަކީ ރައްޔިތުންގެ އިތުބާރު ލިބިގެންދާނެ ސަރުކާރެއްކަމަށް ގޮތަބަޔާ ވިދާޅުވިއެވެ.

ގޮތަބަޔާ މިމޭރުމުން ބަޔާނެއް ދެއްވާފައިމިވަނީ ލަންކާގެ ސެންޓްރަލް ބޭންކުގެ ގަވަރުނަރު ޕީ. ނަންދަވާލް ވީރަސިންގްހް ލަންކާގެ ސިޔާސީ މަސްރަހު ކުރިޔަށް އޮތް ހަފްތާތަކުގައި ހަމައަކަށް ނޭޅިއްޖެނަމަ އިސްތިިއުފާދެއްވާނެކަމަށް ވިދާޅުވި ތަނާއެވެ.

އައު ގަވަރުނަރެއް އައްޔަނުކޮށްފައިވަނީ 22 މިލިއަން މީހުން ދިރިއުޅެމުން އަންނަ ލަންކާއަށް ދިމާވެފައިވާ އިގްތިޞާދީ އަޑިގުޑަނުން އަރައިގަތުމަށެވެ. ނޫސްވެރިންނާ ވާހަކަދައްކަވަމުން އައު ގަވަރުނަރު ވިދާޅުވީ ރައީސް އާއި ސިޔާސީ އެހެން ލީޑަރުން އަރިހު ކުރިޔަށް އޮތް ދެ ހަފްތާ ތެރޭގައި ސިޔާސީ ހަމަޖެހުމެއް ނައިސްފިނަމަ އިސްތިއުފާދޭނެކަމަށް ދެންނެވިކަމަށެވެ.

މަހަކަށްވުރެ ގިނަ ދުވަސްވަންދެން ސުލްހަވެރިކަމާއެކު ލަންކާގައި ކުރިޔަށްދިޔަ މުޒާހަރާތައް މިހަފްތާތެރޭގައި ވަނީ ހޫނުވެ ހަމަނުޖެހުންތަކަކަށް ބަދަލުވެފައެވެ. ސަރުކާރަށް ތާއީދުކުރާ މީހުންނާއި ސަރުކާރާ ދެކޮޅު މީހުންނާ ދެމެދު ވަރުގަދަ ހަމަނުޖެހުންތަކެއް ހިނގާފައިވާއިރު އެހޫނުގަނޑުގެ ތެރޭގައި މަހިންދަ ވަނީ އިސްތިއުފާދެއްވާފައެވެ. މަހިންދަ ރާޖަޕަކްސަ އިސްތިއުފާދެއްވަމުން ވިދާޅުވެފައިވަނީ އިސްތިއުފާދެއްވަނީ އެއްބައިވަންތަ ސަރުކާރެއް އެކުލަވާލެވޭނެކަމުގެ އުންމީދުގައި ކަމަށެވެ.

ނަމަވެސް ރުޅިގަދަވެފައިވާ ފަރާތްތަކުން ވަނީ މަހިންދަ ރާޖަޕަކްސަ އާއި ސަރުކާރުގެ އިސްވެރިންނާއި ގާނޫނު ހަދާ މަޖިލީހުގެ މެމްބަރުންނަށް އަމާޒުކޮށް ހަމަލާތައް ދީފައެވެ. އެމީހުން ދިރިއުޅޭ ގެތަކާއި މުދަލުގައި ރޯކޮށް ގެއްލުންދީފައެވެ. އެންމެފަހުން މަހިންދަ ރާޖަޕަކްސަ ވަނީ ހިމާޔަތް ހޯއްދެވުމަށް ލަންކާގެ އިރުއުތުރު އަސްކަރީ ބޭސްއަކަށް ވަޑައިގަންނަވާފައެވެ.

މީހުންނަށް އިންޒާރުދީ ތަކެއްޗަށް ގެއްލުންދޭ މީހުންނަށް އަމާޒުކޮށް ބަޑިޖެހުމަށް ލަންކާގެ ސަލާމަތީ ބާރުތައް ކަމުގައިވާ ސިފައިންނާއި ފުލުހުންނަށް މިހާރު ވަނީ އަންގާފައެވެ. ހަތިޔާރާއެކު ސިފައިން އަންނަނީ ކޮލަމްބޯގެ މަގުތަކުގައި ފޯރިމަރަމުންނެވެ.

މިހާތަނަށް އައިއިރު ހަމަނުޖެހުންތަކުގައި 9 މީހުން މަރުވެފައިވާއިރު އޭގެތެރޭގައި ފުލުހުންގެ ދެ މީހުންވެސް ހިމެނެއެވެ. ހަމަނުޖެހުންތަކުގައި ޒަޚަމްވި މީހުންގެ އަދަދު 200ން މައްޗަށް އަރާއިރު ގެއްލުންދިން ގެތަކުގެ އަދަދު 136ށް އަރައެވެ.

މުޒާހަރާކުރާ ފަރާތްތަކުން ގޮވަމުން އަންނަނީ ރައީސް އިސްތިއުފާ ދެއްވުމަށެވެ. މަސްރަހު ދިރާސާކުރާ ފަރާތްތަކުން ބުނަނީ ރައީސް އިސްތިއުފާ ދެއްވުމަށް ދެކޮޅު ހައްދަވާނަމަ މަގާމުން ދުރުކުރެވޭނެކަމަށެވެ. ނަމަވެސް އެކަން ކުރުމަށް ގާނޫނު ހަދާ މަޖިލީހުގެ ތިންބައިކުޅަ ދެ ބައި ވޯޓު ބޭނުންވާއިރު އެއްބައިވަންތަ ސަރުކާރެއް އެކުލަވާލައިފިނަމަ އެކަން ކާމިޔާބެއް ނުކުރެވޭނެއެވެ.

މިހާތަނަށް އައިއިރު ލަންކާގެ އެއްވެސް ރައީސެއް މަގާމުން ދުރުކުރެވިފައެއް ނުވެއެވެ.