މީހުންނާއި ތަކެއްޗަށް ހަމަލާދޭ މީހުންނަށް އަމާޒުކޮށް ބަޑިޖެހުމަށް ލަންކާގެ ޑިފެންސް މިނިސްޓްރީން އަމުރުކޮށްފި

މީހުންނާއި ތަކެއްޗަށް ހަމަލާދޭ މީހުންނަށް އަމާޒުކޮށް ބަޑިޖެހުމަށް ލަންކާގެ ޑިފެންސް މިނިސްޓްރީން އަމުރުކޮށްފިއެވެ.

މިއަމުރު ލަންކާގެ ޑިފެންސް މިނިސްޓްރީން ނެރެފައިވަނީ ލަންކާގައި ކުރިއަށްދާ މުޒާހަރާތައް ހޫނުވެ، ގިނަ ހަމަނުޖެހުންތަކެއް ހިނގާފައިވަނިކޮށެވެ. އަދި އެގައުމުގެ ސަރުކާރުން މިހާރު ވަނީ އަސްކަރިއްޔާއަށް ކުއްލި ބާރުތަކެއްވެސް ދީފައެވެ.

އަންގާރަ ދުވަހު ސަރުކާރުން އަސްކަރިއްޔާއަށް ދިން ކުއްލި ބާރުތަކާއެކު، އަމުރަކާނުލައި މީހުން ހައްޔަރުކޮށް ފުލުހުންނާ ހަވާލުނުކޮށް 24 ގަޑިއިރު ވަންދެން މީހުން ހައްޔަރުގައި ބައިތިއްބުމުގެ ބާރު އަސްކަރިއްޔާއަށް މިހާރު ވަނީ ލިބިފައެވެ. އަދި ފުލުހުންނާއި އަސްކަރިއްޔާއަށް މިހާރު ވަނީ އަމުރަކާ ނުލައި ތަންތަން ބަލައި ފާސްކުރުމުގެ ބާރުވެސް ދީފައެވެ. އެގޮތުން މީހުންގެ ގެދޮރާ އުޅަނދު ބަލައި ފާސްކުރެވޭނެއެވެ.

މިފަދަ ބާރުތައް އަސްކަރިއްޔާއަށް ދިނުމާއެކު، ބާރުގެ ބޭނުން ނަހަމަގޮތުގައި ކޮށްފާނެކަމުގެ ކަންބޮޑުވުންތައް ބައެއް ފަރާތްތަކުން ވަނީ ފާޅުކޮށްފައެވެ.

ރޮއިޓަރސްއިން ރިޕޯޓުކޮށްފައިވާގޮތުގައި، ސްރީލަންކާއިން ވަނީ އަންގާރަ ދުވަހު މިބާރުތައް އަސްކަރިއްޔާއަށާއި ފުލުހުންނަށް ދީފައެވެ. މިއާއެކު އަމުރަކާ ނުލައި މީހުން ހައްޔަރުކުރުމުގެ ބާރު ފުލުހުންނަށާއި އަސްކަރިއްޔާއަށް ވަނީ ލިބިފައެވެ.

ހޯމަ ދުވަހު ސްރީލަންކާގައި ކުރިއަށްދިޔަ ހަމަނުޖެހުންތަކުގައި 7 މީހުން މަރުވެފައިވާކަމަށް ރިޕޯޓުތައް ބުނާއިރު، 200 މީހުންނަށް އެކި ވަރުގެ އަނިޔާތައް ލިބި، ހޮސްޕިޓަލްތަކުގައި ފަރުވާދެމުންދާކަމަށް ރިޕޯޓުކޮށްފައިވެއެވެ.

ހޯމަ ދުވަހު ސްރީލަންކާގެ މަސްރަހު ހޫނުވާން ފަށާފައިވަނިކޮށް، އެގައުމުގެ ބޮޑުވަޒީރުކަމުގެ މަގާމުގައި ހުންނެވި މަހިންދަ ރާޖަޕަކްސަ ވަނީ މަގާމުން އިސްތިއުފާދެއްވާފައެވެ. އެމަނިކުފާނުގެ އިސްތިއުފާގެ ސިޓީ ރައީސް ގޮތަބަޔާ ރާޖަޕަކްސް ވަނީ ގަބޫލުކުރައްވާފައެވެ.

ސްރީލަންކާއަށް ދިމާވެފައިވާ އިގުތިސާދީ ކާރިސާއާއެކު އެގައުމު ހަލަބޮލިވެ، ހުކުރު ދުވަހު ރައީސް ގޮތަބަޔާ ވަނީ ކުއްލި ހާލަތު އިއުލާންކުރައްވާފައެވެ. އަދި ކާފިއުވެސް އިއުލާނުކޮށްފައި ވަނިކޮށް، އެތައް ހާސް ބަޔަކު ވަނީ މަގުތަކަށް ނުކުމެ މުޒާހަރާކޮށް ސަރުކާރުގެ އިސްވެރިންނަށް އަމާޒުކޮށް ހަމަލާތައް ދީފައެވެ. އެގޮތުން ސަރުކާރުގެ ވަޒީރުންނާ މަޖިލިސް މެމްބަރުންގެ ގެތަކާއި ވިޔަފާރިތަކާއި އޮފީސްތައް، އަދި އުޅަނދުތަކުގައި ރޯކޮށް ގެއްލުންދީފައިވެއެވެ.

ސްރީލަންކާގެ ފުލުހުންނާ ހަވާލާދީ ރިޕޯޓުކޮށްފައިވާ ގޮތުގައި ހޯމަ ދުވަހު އެގައުމު ހަލަބޮލިވެގެން ދިޔަނަމަވެސް އަންގާރަ ދުވަހު ގައުމު ވަނީ ހަމައަކަށް އެޅިފައެވެ.