އޮބްސްޓެކަލް ރޭސް- މިފަހަރު އަނބިމީހާ އުރައިގެން

އޮބްސްޓެކަލް ރޭހަކީ ތަފާތު، މުނިފޫހި ފިލުވުމުގެ މަޖާ ކުޅިވަރެކެވެ. ނަމަވެސް ހަންގޭރީގައި އޮބްސްޓެކަލް ރޭސް ކުރިއަށް މި ގެންދަނީ މުޅިން ތަފާތުކޮށެވެ.

ހަންގޭރީގެ ޓެބިއޮސްކޭގައި ހޮނިހިރު ދުވަހު ކުރިއަށް ގެންދިޔަ "ވައިފް ކެރިއިން ރޭސް" ނުވަތަ އަނބިމީހާ އުރައިގެން ކުރިއަށް ގެންދާ މި ރޭހަކީ އެ ޤައުމުގައި ކުރިއަށްގެންދިޔަ އެފަދަ 3 ވަނަ ރޭހެވެ.

މިފަހަރުގެ ރޭހުގައިވެސް ގާތްގަނޑަކަށް 30 ވަރަކަށް ދެމަފިރިއަކު ބައިވެރިވެފައިވެއެވެ. މިރޭހުގައި އޮބްސްޓެކަލް ގޮތުގައި ފެންގަނޑަކާއި، ޓަޔަރާއި، ތަފާތު އެކި މަރުޙަލާތައް ކަޑައްތުކުރަން ޖެހޭއިރު، ރޭހުގެ ބައިވެރިން ބުނާ ގޮތުގައި މި ރޭހުން މޮޅުވުމަށް ބޭނުންވަނީ ބެލެންސް، ޓީމްވޯކް އަދި މޮޅު ޓެކްނިކެވެ.

ބައެއް ބައިވެރިން ބުނާ ގޮތުގައި ބައިވެރިޔާ ކޮނޑަށް ލައިގެން ދަނިކޮށް ފެންގަނޑަށް ވެއްޓިއްޖެނަމަ، ފުން ނޭވާއެއް ލުމަށްފަހު އަނެއްކާވެސް ތެދުވަނީއެވެ. އެގޮތުން މުޅި ރޭސް ފުރިހަމަ ކުރުމަށް އޮބްސްޓެކަލްތައް ގިރާ ކުރަމުން 260 މީޓަރުގެ ދިގު ޓްރެކުގައި ދުވަން ޖެހެއެވެ.

މި ރޭސް އިންތިޒާމުކުރާ ގެރޯ ގުރަލީ ބުނާ ގޮތުގައި މިއީ އަނބިންނާއި ފިރިންނަށް އާންމު ބިޒީ ދިރިއުޅުމުން ދުރަށް ޖެހިލައި، ހިތްހަމަ ޖެހޭ ވަގުތުކޮޅެއް ހޭދަކޮށްލުމަށް ލިބޭ ފުރުސަތެކެވެ.

ބުނެވޭ ގޮތުގައި މިއީ "ވައިކިންގްސް" ގެ ޒަމާނުއްސުރެ ކުޅެމުން އަންނަ ކުޅިވަރެކެވެ. ފިންލޭންޑުގައިވެސް 1990 ގެ އަހަރުތަކުން ފެށިގެން މި ރޭސް ބާއްވަމުން ގެންދެއެވެ.