5 އަހަރަށް ބަހާލައިގެން، ކޮންމެ އަހަރަކު 15 ސްކޮލާރޝިޕް ދޭނެ
ހަންގޭރީގެ ސްކޮލާރޝިޕް ލިބުނު ދަރިވަރުން
ސްޓައިޕެންޑިއަމް ހަންގޭރިކަމް ސްކޮލާރޝިޕް ރާއްޖޭގެ 13 ދަރިވަރަކަށް ދީފިއެވެ.
ސްޓައިޕެންޑިއަމް ހަންގޭރިކަމް ސްކޮލާރޝިޕްއަކީ މިނިސްޓްރީ އޮފް ހަޔަރ އެޑިޔުކޭޝަނާއި މިނިސްޓްރީ އޮފް ފޮރިން އެފެއަރޒް އެންޑް ޓްރޭޑް އޮފް ހަންގޭރީއާ ދެމެދު 8 ނޮވެމްބަރ 2021ގައި ސޮއިކުރެވުނު މެމޮރެންޑަމް އޮފް އަންޑަރސްޓޭންޑިންގ އެއްގެ ދަށުން، 2022 ވަނަ އަހަރު ދިވެހި ދަރިވަރުންނަށް ކޯހުގެ ފީއާއި، އެކޮމޮޑޭޝަނާއި، ލައިބްރަރީގެ ޚިދުމަތް، އަދި ކަނޑައެޅިފައިވާ ސްޓައިޕެންޑެއް، ކިޔެވުމުގެ މުއްދަތުގެ ތެރޭގައި ކޮންމެ މަހަކު ދަރިވަރުންނަށް ލިބިދޭ ސްކޮލާރޝިޕްތަކެކެވެ. މި ސްކޮލާރޝިޕްގައި ދަރިވަރުން މާލެއިން ހަންގޭރީއަށް ދިއުމާއި އައުމުގެ ދަތުރުގެ ޚަރަދާއި، ދިއްލީއަށް ދަތުރުކޮށްގެން ވިސާ ނެގުމަށް ދިޔަ ޚަރަދު ހަމަޖައްސައިދީފައިވަނީ މިނިސްޓްރީ އޮފް ހަޔަރ އެޑިޔުކޭޝަނުންނެވެ.
މިއީ 5 އަހަރަށް ބަހާލައިގެން، 75 ސްކޮލާރޝިޕް ފުރުސަތު ދިނުމަށް ފަށާފައިވާ ޕްރޮގްރާމެކެވެ. އެގޮތުން ކޮންމެ އަހަރަކުވެސް 15 ދަރިވަރަކަށް މި ސްކޮލާރޝިޕް ދެވިގެންދާނެއެވެ.
މި ސްކޮލާރޝިޕް ތަކަށް 14 ޑިސެމްބަރ 2021ގައި 15 ފުރުސަތަށް ހުޅުވާލާފައިވާއިރު، އެއީ 6 ބެޗެލަރސް ޑިގްރީ، 7 މާސްޓަރސް ޑިގްރީ އަދި 2 ޑޮކްޓޯރަލް ޑިގްރީ ސްކޮލާރޝިޕެވެ. މި ސްކޮލާރޝިޕްތަކަށް އެދި 48 ދަރިވަރަކު ހުށަހަޅާފައިވާކަމަށް ހަޔަރ އެޑިއުކޭޝަން މިނިސްޓްރީން ބުނެފައިވެއެވެ. މީގެތެރެއިން 15 ޖާގައަށް، ސްޓައިޕެންޑިއަމް ހަންގޭރިކަމް އިން އެދުނުގޮތަށް 15 ދަރިވަރުން ނޮމިނޭޓްކޮށް، ހަންގޭރީގެ ޔުނިވަރސިޓީތަކުން ދަރިވަރުންގެ ފައިނަލް ސިލެކްޝަން ހަދަން ފޮނުވާފައިވާކަމަށާއި، އޭގެ ތެރެއިން ކޮލިފައިވީ 13 ދަރިވަރުން ކަމަށް މިނިސްޓްރީން ބުނެފައިވެއެވެ.
މި 13 ދަރިވަރުން ކިޔެވުމަށް ޖާގަ ހަމަޖެހިފައިވަނީ ހަންގޭރީގެ 9 ޔުނިވަރސިޓީ އަކުންނެވެ. މި ދަރިވަރުން ކިޔަވާ ދާއިރާތަކަކީ:
މި ދަރިވަރުން ކިޔެވުން ފެށުމަށް ހަމަޖެހިފައިވަނީ ސެޕްޓެމްބަރ މަހުއެވެ.
މިކަމާގުޅޭގޮތުން ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވީ، ތަރައްގީވެފައިވާ ތަހުޒީބީ ގައުމުތަކުން ދިވެހި ދަރިވަރުންނަށް މަތީ ތައުލީމުގެ ފުރުސަތުތައް ހޯދައިދިނުމަކީ ޚާއްސަ އިސްކަމެއްދެއްވާ ކަމެއް ކަމަށާއި، އެ މަސައްކަތްތައް ކުރިއަށްގެންދާ ކަމަށެވެ.
އެފަދަ ގައުމުތަކުން މަތީ ތައުލީމު ހޯދުމުގެ ފުރުސަތު ދަރިވަރުންނަށް ލިބިގެންދިއުމަކީ ކަންކަމަށް ލޯ ހުޅުވި، ކިޔަވާ މާއްދާއެއްގެ އިތުރުން ވަރަށް ގިނަ ކަންތައްތައް ދަސްވެ، ފަރިތަވުމުގެ ފުރުސަތު ލިބިގެންދާނެ ކަމަށެވެ. އަދި އެނބުރި ގައުމަށް ޚިދުމަތްކުރުމަށް އަންނަ ޒުވާނުންގެ ފަރާތުން ކުރާ ފައިދާ މާ ފުރިހަމަވެގެންދާނެކަމަށާއި، މިއީ ވަރަށް ރަނގަޅު ފުރުސަތެއް ކަމަށް މިނިސްޓަރ ވިދާޅުވިއެވެ.
