ސްރީލަންކާގައި އުފެދިފައިވާ ނުތަނަވަސްކަމާއި ހަމަނުޖެހުމާމެދު އެމްއާރްއެމްއިން ކަންބޮޑުވުން ފާޅުކޮށްފިއެވެ.
އެމްއާރްއެމުން ކުރި ޓްވީޓެއްގައި ބުނީ، އަވަށްޓެރި ސްރީލަންކާގެ ސިޔާސީ، އިޤުތިޞާދީ އަދި ދާޚިލީ ހާލަތު ބަދަލުވަމުންދާ ގޮތާއި ގުޅިގެން އުފެދިފައިވާ ނުތަނަވަސްކަމާއި ހަމަނުޖެހުމާ މެދު އެމްއާރްއެމްއިން ނިހާޔަތަށް ކަންބޮޑުވާކަމަށެވެ.
ސްރީލަންކާއަކީ ގިނަ އަދަދެއްގެ ދިވެހިން ވެސް ދިރިއުޅެމުންދާ ޤައުމަކަށްވީ ހިނދު، މިފަދަ ނާޒުކު ދަނޑިވަޅެއްގައި ކޮންމެ ދިވެހި ރައްޔިތަކުވެސް އެބައެއްގެ ސަލާމަތާއި ރައްކާތެރިކަން ކަށަވަރުކޮށްގެން ތިބުމަށް އެމްއާރްއެމުން ވަނީ ގޮވާލާފައެވެ. އަދި ސްރީލަންކާގައި މިހާރު ހިނގަމުންދާ ހަމަނުޖެހުމާ ގުޅިގެން އެ ޤައުމުގައި ތިބި ދިވެހީންނަށް ވީ އެންމެ އަވަހަށް، ވެދެވެން އޮތް އެހީއެއް ވެދެއްވުމަށް ދިވެހި ސަރުކާރަށް އެމްއާރްއެމުން ވަނީ ގޮވާލާފައެވެ.
ހަމަ މިއާއިއެކު ސްރީލަންކާގެ ރައްޔިތުންގެ ޙައްޤުތަކާއި ސަލާމަތާއި ރައްކާތެރިކަން ކަށަވަރުވެ، އަވަސް މުއްދަތެއްގައި މިހާރު ކުރިމަތިވެފައިވާ ހާލަތުން އަރައިގަނެވޭނެ ކަމަށް އުއްމީދު ކުރާކަމަށް އެމްއާރްއެމުން ވަނީ ބުނެފައެވެ.
ސްރީލަންކާގައި ދިރިއުޅޭ އަދި އެގައުމަށް ދަތުރުކުރާ ދިވެހިން، އިރުޝާދުތަކަށް ސަމާލުކަން ދިނުމަށް ސަރުކާރުންވެސް ވަނީ ގޮވާލާފައެވެ. ފޮރިން މިނިސްޓްރީން ބުނީ، މުޅި ސްރީލަންކާ ހިމެނޭގޮތަށް މިވަގުތު ކާފިއު އިއުލާނުކޮށްފައި ވާކަމަށެވެ. އެހެންކަމުން ސްރީލަންކާގައި ދިރިއުޅޭ، އަދި ސްރީލަންކާއަށް ދަތުރުކުރާ އެންމެހާ ދިވެހި ރައްޔިތުންވެސް، ސްރީލަންކާގެ ކަމާބެހޭ ފަރާތްތަކުން ދޭ އިރުޝާދުތަކަށް ސަމާލުކަން ދިނުމަށް އިލްތިމާސްކުރާ ކަމަށެވެ.
