ސްރީލަންކާގެ ހަމަނުޖެހުންތަކުގައި މަރުވި ފަސް މީހުންގެ ތެރޭގައި މަޖިލިސް މެމްބަރެއްވެސް ހިމެނޭ

ސްރީލަންކާގެ ހަމަނުޖެހުންތަކުގައި މަރުވި ފަސް މީހުންގެ ތެރޭގައި ގާނޫނު ހަދާ މަޖިލީހުގެ މެމްބަރެއްވެސް ހިމެނޭކަމަށް ބައިނަލްއަގުއާމީ މީޑިއާތަކުން ރިޕޯޓުކޮށްފިއެވެ.

މި ހަމަނުޖެހުންތަކުގެ ތެރޭގައި ބޮޑުވަޒީރު މަހިންދަ ރާޖްޕަކްސާވެސް ވަނީ އިސްތިއުފާ ދެއްވާފައެވެ. ސްރީލަންކާ ސަރުކާރު ނިސްބަތްވާ ޕާޓީ، ސްރީލަންކާ ޕޮޑުޖާނާ ޕެރަމުނާ (އެސްއެލްޕީޕީ)ގެ މެމްބަރުންނަށް އަމާޒުކޮށް އަންނަނީ ހަމަލާ ދެމުންނެވެ.

ހޯމަ ދުވަހު، ސްރީލަންކާގެ ބޮޑު ވަޒީރުގެ ރަސްމީ ގެކޮޅުގެ ތެރެއިން ބަޑީގެ ހަމަލާތަކެއް ދީފައިވާކަމަށްވެސް ބައެއް ރިޕޯޓުތައް ބުނެއެވެ. މުޒާހަރާ ކުރަމުންދިޔަ އެތައް ހާސް ބަޔަކުވަނީ ގެކޮޅުގެ ގޭޓު ހަލާކުކޮށްލުމަށްފަހު އެތަނުގައި ހުރި ބައެއް ވެހިކަލްތަކުގައިވެސް ހުޅުޖަހާފައެވެ.

ހޯމަ ދުވަހުގެ ވަގުތެއްގައި ސަރުކާރަށް ނިސްބަތްވާ ޕާޓީގެ ގާނޫނު ހަދާ މަޖިލީހުގެ މެމްބަރެއް ކަމަށްވާ އަމަރަކީރްތި އަތުކޯރަލާ އަށް ނިތަމްބުވާ ސަރަހައްދުން ހަމަލާދޭން މަސައްކަތްކުރި ބަޔަކަށް އަމާޒުކޮށް ބަޑި ޖެހުމަށްފަހު، އޭނާ ސެކިއުރިޓީއާއެކު އެތަނުން ދިޔުމަށް މަސައްކަތްކުރާ ވީޑިއޯ ފުޓޭޖެއްވެސް ވަނީ އާންމުވެފައެވެ. އޭގެ ފަހުން އަތުކޯރަލާ މަރުވެފައި އޮއްވާ ފެނިފައިވާ ކަމަށް އަލްޖަޒީރާގައިވަނީ ރިޕޯޓުކޮށްފައެވެ.

ސަރުކާރަށް ތާއީދުކުރާ މީހުންނާއި ސަރުކާރާ ދެކޮޅަށް ސުލްހަވެރި މުޒާހަރާތައް ކުރަމުންގެންދާ މީހުންނާ ދެމެދު ހިނގި ހަމަނުޖެހުންތަަކުގައި ގާތްގަނޑަކަށް 150 މީހުންނަށް ވަނީ އަނިޔާވެފައެވެ.

ސްރީލަންކާގައި ކުއްލި ނުރައްކަލުގެ ހާލަތު އިއުލާންކޮށްފައިވީ ނަމަވެސް މުޒާހަރާތައް ކުރުން ހުއްޓުމަކަށް ނާދެއެވެ. ސަރުކާރަށް ތާޢީދުކުރާ ފަރާތްތަކާއި އިދިކޮޅު ފަރާތްތަކާމެދު ބޮޑެތި ހަމަނުޖެހުންތައް ހިނގައި ސަރުކާރަށް ތާއީދުކުރާ ފަރާތްތަކުގެ މުދަލަށް ބޮޑެތި ގެއްލުންތައްވަނީ ދީފައެވެ.

މިނިސްޓަރު ޖޯންސްޓަން ފެނާންޑޯ، ކަންޗަނާ ވިޖެސޭކަރް އަދި ޕްރަސައްނާ ރަނަތުންގާ އަދި މަޖިލިސް މެމްބަރު ސަނަތް ނިޝާންތާ، ރަމޭޝް ޕަތިރަނާ އާއި ނިމާލް ލަންޒަވާގެ އަމިއްލަ ގެކޮޅުގައިވެސްވަނީ ހުޅު ޖަހާފައެވެ.

ރާޖަޕްސާގެ އާއިލާއާ ގުޅުންހުރި ބައެއް ހޮޓެލްތަކުގައިވެސް ހުޅުޖަހާފައިވާކަމަށް ލަންކާގެ ފުލުހުންނާ ހަވާލާދީ ރިޕޯޓުކޮށްފައިވެއެވެ.

މިހުރިކާމެއްގެ ތެރެއިންވެސް ޑިފެންސް މިނިސްޓަރު ރިޓަޔާރޑް މޭޖެރ ޖެނެރަލް ކަމާލް ގުނަރަތްނެ އަންނަނީ ރުޅިގަދަވެފައިވާ ރައްޔިތުން ހަމަޖެހުމަށް އިރުޝާދު ދެމުންނެވެ.