ލަންކާ ސަރުކާރުގެ މަޖިލީސް މެމްބަރުންގެ ގެތަކަށް ހަމަލާދީ ރޯކޮށްލައިފި

ސްރީލަންކާ ސަރުކާރު ނިސްބަތްވާ ޕާޓީ، ސްރީ ލަންކާ ޕޮޑުޖާނާ ޕެރަމުނާ (އެސްއެލްޕީޕީ)ގެ މަޖިލިސް މެމްބަރެއްގެ ގެއަށް ހަމަލާދީ ރޯކޮށްލައިފިއެވެ.

ޑެއިލީ މިރޯ ލަންކާއިން ރިޕޯޓުކޮށްފައިވާގޮތުން ލަންކާގެ މަޖިލިސް މެމްބަރެއް ކަމަށްވާ ސަނަތު ނިޝަންތާގެ ގެއަށް ހަމަލާދީ ވަނީ ރޯކޮށްލާފައެވެ.

އެނޫހުން ރިޕޯޓުކޮށްފައިވާގޮތުން ސަރުކާރު ނިސްބަތްވާ ޕާޓީގެ މަޖިލިސް މެމްބަރުންގެ ތެރެއިން ގިނަ އަދަދެއްގެ މެމްބަރުންގެ ގެއަށް ވަނީ ހަމަލާދީފައެވެ. އަދި ބައެއް ގެތަކުގައި ރޯކޮށްލާފައިވާކަމަށްވެސް ރިޕޯޓުކޮށްފައިވެއެވެ.

މީގެ އިތުރުން އެސްއެލްޕީޕީގެ ބައެއް އޮފީސްތަކުގައިވެސް ރޯކޮށްލާފައިވާ ކަމަށް ޑެއިލީ މިރޯއިން ރިޕޯޓުކޮށްފައިވެއެވެ.

ހަމަލާތައް އަމާޒުވެފައުވާ އެމްޕީގެ ގެތަކުގެ ތެރޭގައު ސަނަތު ނިޝާންތާގެ އިތުރުން ޖޯންސަން ފެރނަންޑީއާއި ކަންޗަނާ ވިޖެސެކަރާ އަދި ރަމެޝް ޕަތިރަނައާއި ނިމަލް ލަންޒަގެ ގެ ހިމެނެއެވެ.

އެޕާޓީގެ ހުރިހާ މެމްބަރުންގެ ގެތަކުގެ ސެކިއުރިޓީ މިހާރު ވަރުގަދަކޮށްފައިވާކަމަށް އެނޫހުން ރިޕޯޓުކޮށްފައިވެއެވެ.

ލަންކާގެ ސިޔާސީ މަސްރަހު ހޫނުވަމުންދާއިރު، އެގައުމުގައި މުޒާހަރާއެއް ހޫނުވެ ހިނގި ހަމަނުޖެހުމަކުން ފިލި، އެގައުމުގެ ސަރުކާރު ހިއްސާވާ ޕާޓީއަށް ނިސްބަތްވާ މަޖިލީހުގެ މެމްބަރަކު ވަނީ އަމިއްލައަށް މަރުވެފައެވެ.

ލަންކާގެ ފުލުހުންނާ ހަވާލާދީ ނިއުސްވަޔަރއިން ރިޕޯޓުކޮށްފައިވާގޮތުން، އެމްޕީ އަމަރަކީރްރީ އަތުކޮރަލާ ވަނީ މުޒާހަރާގެ ހަމަނުޖެހުން ހޫނުވާން ފެށުމާއެކު އެސަރަހައްދުން ފިލާފައެވެ. އަދި އެތަނުގެ ކައިރީ ހުރި އިމާރާތަކަށް ފިލަން ވަނުމުން މުޒާހަރާގައި ބައިވެރިވި އެތައް ހާސް މީހުން ވަނީ އެއިމާރާތް ވަށާލާފައެވެ. މިއާއެކު އިމާރާތުގައި ތާށިވެފައިހުރި އެމްޕީ، އޭނާ އަމިއްލައަށް ގަޔަށް ބަޑިޖަހައި މަރުވެފައިވާކަމަށް ފުލުހުންނާ ހަވާލާދީ ރިޕޯޓުކޮށްފައިވެއެވެ.