މުޒާހަރާގެ ހަމަނުޖެހުންތަކުން ފިލި، ލަންކާ ސަރުކާރުގެ މަޖިލިސް މެމްބަރަކު މަރުވެއްޖެ
9 މެއި 2022 | ހޯމަ 16:05އުސްވަޔަރގައި ރިޕޯޓުކޮށްފައިވާގޮތުން، ލަންކާ ސަރުކާރު ނިސްބަތްވާ ޕާޓީ، ސްރީ ލަންކާ ޕޮޑުޖާނާ ޕެރަމުނާ ޕާރލިމެންޓަރީ މެމްބަރު، އަމަރަކީރްރީ އަތުކޮރަލާ ވަނީ އަމިއްލައަށް ބަޑިޖަހައިގެން މަރުވެފައި
ލަންކާ ސަރުކާރު ނިސްބަތްވާ ޕާޓީ، ސްރީ ލަންކާ ޕޮޑުޖާނާ ޕެރަމުނާ (އެސްއެލްޕީޕީ)ގެ ޕަރލިމެންޓަރީ މެމްބަރަކު، ލަންކާގެ މުޒާހަރާއެއް ހޫނުވެ ހިނގި ހަމަނުޖެހުމެއްގެ ތެރޭގައި ވަނީ އަމިއްލައަށް މަރުވެފައި
ލަންކާގެ މުޒާހަރާތައް ހޫނުވެ ހިނގި ހަމަނުޖެހުމަކުން ފިލި އެގައުމުގެ ސަރުކާރު ހިއްސާވާ ޕާޓީއަށް ނިސްބަތްވާ މަޖިލީހުގެ މެމްބަރަކު އަމިއްލައަށް މަރުވެއްޖެއެވެ.
އޭފްޕީއާ ހަވާލާދީ ނިއުސްވަޔަރގައި ރިޕޯޓުކޮށްފައިވާގޮތުން ލަންކާ ސަރުކާރު ނިސްބަތްވާ ޕާޓީ، ސްރީ ލަންކާ ޕޮޑުޖާނާ ޕެރަމުނާ (އެސްއެލްޕީޕީ)ގެ ޕާރލިމެންޓަރީ މެމްބަރެއް ކަމަށްވާ އަމަރަކީރްރީ އަތުކޮރަލާ ވަނީ ލަންކާ ސަރުކާރާ ދެކޮޅަށް ކުރަމުންދިޔަ މުޒާހަރާތައް ހޫނުވެ ހިނގި ހަމަނުޖެހުންތަކުގައި އަމިއްލައަށް ބަޑިޖަހައި މަރުވެފައެވެ.
އެނޫހުން ރިޕޯޓުކޮށްފައިވާގޮތުން އެމްޕީ އަމަރަކީރްރީ އަތުކޮރަލާގެ ކާރެއްގައި ނިޓަމްބުވާ ސަރަހައްދަށް ދިޔަ ބަޔަކު އެސަރަހައްދުގައި މުޒާހަރާކުރަމުންދިޔަ ބަޔަކަށް އަމާޒުކޮށް ބަޑީގެ ހަމަލާތައް ވަނީ ދީފައެވެ. މިހަމަލާތަކުގައި ތިން މީހުންނަށް އެކިވަރުގެ އަނިޔާތަށް ލިބި ހޮސްޕިޓަލްގައި އެޑްމިޓްކޮށްފައިވާ ކަމަށާއި އެކެއްގެ ހާލު ވަރަށް ސީރިއަސް ކަމަށް އެނޫހުން ވަނީ ރިޕޯޓުކޮށްފައެވެ.
ލަންކާގެ ފުލުހުންނާ ހަވާލާދީ ނިއުސްވަޔަރއިން ރިޕޯޓުކޮށްފައިވާގޮތުން އެމްޕީ އަމަރަކީރްރީ އަތުކޮރަލާ ވަނީ މުޒާހަރާގެ ހަމަނުޖެހުން ހޫނުވާން ފެށުމާއެކު އެސަރަހައްދުން ފިލާފައެވެ. އަދި އެތަނުގެ ކައިރީ ހުރި އިމާރާތަކަށް ފިލަން ވަނުމުން މުޒާހަރާގައި ބައިވެރިވި އެތައް ހާސް މީހުން ވަނީ އެއިމާރާތް ވަށާލާފައެވެ. މިއާއެކު އިމާރާތުގައި ތާށިވެފައިހުރި އެމްޕީ، އޭނާ އަމިއްލައަށް ގަޔަށް ބަޑިޖަހައި މަރުވެފައިވާކަމަށް ފުލުހުންނާ ހަވާލާދީ ރިޕޯޓުކޮށްފައިވެއެވެ.
މިހާދިސާ ހިނގާފައި ވަނީ ލަންކާގައި ކުއްލި ނުރައްކަލުގެ ހާލަތު އިއުލާނުކޮށް ކާފިއުވެސް ހިންގާފައިވަނިކޮށެވެ.
