ގްރޫޕް ބީގެ ތިން ޓީމްގެ ޕޮއިންޓް އެއްވަރު، ސެމީއަށް ދިޔައީ ފައިދާ ގޯލުން

ބްލޫޕްރިންޓް ހަބް ފުޓްސަލް ފިއެސްޓާގައި ގްރޫޕް ބީގެ ތިން ޓީމް ޕޮއިންޓްގެ ގޮތުން އެއްވަރުވެ, ފައިދާ ގޯލުން ދެޓީމް ސެމީފައިނަލަށް ދަތުރުކޮށްފިއެވެ.

ގްރޫޕް ބީގެ އެންމެ ކުރީގައި އޮތް ތިން ޓީމްވެސް އޮތީ 9 ޕޮއިންޓާއެކުއެވެ. ފައިދާ ގޯލުން އެއްވަނަ ހޯދީ ސްޕާޓަންސް ސްޕޯރޓްސް ކްލަބެވެ. އެޓީމް ބަލިވީ ގްރޫޕް ސްޓޭޖްގެ ފަހު މެޗުގައެވެ. ފަހު މެޗުގައި އެޓީމް ބަލިވީ ހަސް އެފްސީއާ ވާދަކޮށް 4-3 ނެވެ. މެޗުގައި ހަސް އެފްސީގެ މުހައްމަދު އައްޒާމް ތިން ލަނޑު ޖެހިއެވެ. އެޓީމްގެ އަނެއް ލަނޑު ޖެހީ އަހުމަދު ވިޝާމެވެ. ސްޕާޓަންސްގެ ތިން ލަނޑުޖެހީ އަހުމަދު ސަނާހު, ބަދީއު މުހައްމަދު, އަދި ރިލްވާން ނައީމެވެ.

މިގްރޫޕުން ސެމީގެ ދެވަނަ ޖާގަ ހޯދީ ހަސް އެފްސީއެވެ. އެޓީމް ދެވަނަ ހޯދީ ފައިދާ ހަ ގޯލާއެކުއެވެ. ގްރޫޕްގެ ތިންވަނާގައި އޮތް ޓީމް ވާލުއަށް ސެމީގެ ފުރުސަތު ގެއްލުނީ ފައިދާ ގޯލެއްގެ ތަފާތުންނެވެ. އެޓީމް ގްރޫޕް ސްޓޭޖްގައި ކުޅުނު ފަހު މެޗުގައި ކާޅު އެސްސީއާ ވާދަކޮށް 7-1ން ކާމިޔާބުކުރިއެވެ. އެކަމަކު ފައިދާ ގޯލުން ކުރި ނުލިބި ކެޓީއެވެ.

ސެމީފައިނަލްގައި އެފްސީ ޔުނައިޓެޑް ވާދަކުރާނީ ހަސް އެފްސީއާއެވެ. ސްޕާޓަންސް ވާދަކުރާނީ ޕެންތަރސް ސްޕޯރޓްސް ކްލަބާއެވެ. ސެމީފައިނަލް މެޗުތައް ކުޅޭނީ އަންގާރަ ދުވަހުގެ ރެއެވެ.